«Ti binnigola nabé nachaʼhuiʼ ne nadxii ca xhamigu laa»

JOHN BARR biluxe xquendanabani ndaaniʼ Guidxilayú riʼ sábadu siadóʼ 4 stiʼ diciembre iza 2010 dxi nápabe 97 iza, ca xhamígube gúdxicaʼ laabe Jack. Guyuube lade Grupu ni Zaniruʼ stiʼ ca Testigu stiʼ Jiobá, ne para cani binibiáʼ laabe gúcabe «ti binnigola nabé nachaʼhuiʼ ne nadxii ca xhamigu laa».

Bixhózebe ne jñaabe gúcacaʼ xpinni Cristu ni bibí, gúpacaʼ chonna xiiñicaʼ ne ni jma nahuiiniʼ nga Jack Barr, familia stícabe naca de Aberdeen, Escocia. Nabé sicarú riniʼbe de modo biniisibe ralídxibe ne rudiibe xquíxepeʼ bixhózebe ne jñaabe pur ejemplu sicarú bidiicaʼ laabe dede dxi nahuiinibe.

Dxi jma maʼ ziniisibe gúcabe ti hombrehuiiniʼ nabé natuí. Ngue runi, gupa xidé bíʼnibe stale stipa para cadi guidxíbibe ora guiníʼnebe binni. Peru despué maʼ qué nidxíbibe. Ne ti domingu huadxí de iza 1927, dxi nápabe 14 iza, gúdxibe bixhózebe maʼ nuube listu para chigucheechenebe laa diidxaʼ de yoo pur yoo. Dxi cá nga bizulú cayúnibe xhiiñaʼ Dios, casi ñaca nuzulube ti carrera. Dede dxi gútibe bicheechebe ca diidxaʼ nacubi ne galán ca né stale gana.

Bizaaca jñaa Jack ti accidente ne bilá ñati. Ni bizaaca jñaabe que bicaani Jack guiníʼ ique xi pur nabani ne bicaani laa gudii laa Jiobá lu iza 1929. Peru qué ñanda diʼ ñuunísabe, sínuque gulézabe dede lu iza 1934. Gaayuʼ iza despué guyebe Londres para bizulú bíʼnibe dxiiñaʼ Betel ni nuu Inglaterra, raqué nga bizulú cayúnibe jma lu xhiiñaʼ Dios ne bíʼnibe dxiiñaʼ ca 71 iza.

Lu 29 stiʼ octubre iza 1960, bichaganáʼ Jack Barr ti baʼdudxaapaʼ ni láʼ Mildred Willett. Gunaa riʼ nabé riuulaʼdxiʼ gucheeche diidxaʼ purtiʼ gúcabe precursora ne para dxi que maʼ misionera laabe. Barr guníʼ «nabé risaca ngue bichaganabe xheelabe». Dede dxi biluxe Mildred xquendanabani lu Guidxilayú riʼ, lu octubre iza 2004, bisihuínnicabe rúnicabe xhiiñaʼ Jiobá tobi si. Dede dxi bichaganácabe biindacabe Biblia guiráʼ dxi juntu, ne nin ti dxi qué nusaana de ñúnicabe ni.

Para cani binibiáʼ Jack Barr la? ora gunadiágacabe labe riníʼ íquecabe de tuuxa ni nanna gudii conseju, tuuxa ni qué runi jma pur tobi que pur stobi, nachaʼhuiʼ ne qué nixélebe de ni na Stiidxaʼ Dios. Laaca gúcabe ti binni nabé biʼniʼ dxiiñaʼ, ti xpinni cristu nabé gunnaxhii binni ne nabé gucanebe ca xhamígube. Cani guniʼbe, ca libana bidiibe ne ca oración bíʼnibe rusihuínnicani pabiáʼ guyuuláʼdxibe cani biziidibe lu Biblia ne pabiáʼ guyuuláʼdxibe chuʼbe gaxha de Jiobá.

Nabé zabánanu Jack Barr xpinni Cristu riʼ. Peru riéchenu ora gánnanu maʼ gucuaabe guendanabani ni qué ziuu dxi guiluxe guibáʼ, ti ndaayaʼ ni nabé gulézabe ne nabé bizeetebe ora maʼ caniʼbe. Ndaayaʼ ca nga ni maʼ xadxí rápabe gana guicaabe (1 Cor. 15:53, 54).a

[Cani cá ñee yaza]