Xiñee rudii Dios lugar gacananu

XI RUNI SENTIR DIOS ORA GUʼYAʼ CAYACANANU

Michelle: Padiuxi, Sofía. Galanpeʼ bidxelaʼ lii.

Sofía: Galanpeʼ zeedagannuʼ naa.

Michelle: Nase que guninu xi runi sentir Dios ora guʼyaʼ cayacananu.a Lii guʼdxuʼ naa maʼ xadxí racaláʼdxiluʼ gannuʼ xi runi sentirbe. Ne jmaruʼ si dede dxi bizaaca jñaaluʼ desgracia que. Yanna, ximodo nuube pue.

Sofía: Pue nuu dxi nuube galán ne nuu dxi coʼ, peru yannadxí la? galán birabe gueelaʼ.

Michelle: Galán xa. Purtiʼ nagana nga ra cadíʼdibe riʼ.

Sofía: Guizáʼ xa, ne nuu biaje riníʼ iqueʼ padxí ndiʼ guiluxe ca yuubaʼ stibe.

Michelle: Dxandíʼ, nga nga ni riníʼ ique binni ora guizaaca zacá. Zándaca rietenaláʼdxiluʼ gunabadiidxaʼ lii xiñee cudii Dios lugar cayacaná binni pa nápabe poder para cueebe guiráʼ ni runiná laanu.

Sofía: Rietenaladxeʼ.

Michelle: Ante guidúʼyanu xiná Biblia la? racalaʼdxeʼ guzeeteʼ chupa chonna cosa ni guninu nase que.

Sofía: Biaʼsi.

Michelle: Primé la? guninu ruzeeteʼ Biblia de ti hombre ni gunabadiidxaʼ xiñee rudii Dios lugar gacaná binni. Peru bidúʼyanu qué nidindené diʼ Dios laabe, ne qué ñabi laabe cayaadxaruʼ gápabe jma fe.

Sofía: Qué lica huaníʼ iqueʼ nga.

Michelle: Laaca bizíʼdinu qué riuulaʼdxiʼ diʼ Jiobá guʼyaʼ cayacaná binni. Biblia na «biaʼ tiempu bindaa yuubaʼ» stiʼ ca xpínnibe «biáʼqueca bindaa yuubaʼ stibe».b Ñee cadi dxandíʼ ratadxí ladxidoʼno gánnanu laaca racaná Dios ora racananu la?

Sofía: Ratadxí, pue.

Michelle: Ne guninu napa Dios stale poder, nga runi ora tiica si zanda cueebe guiráʼ ni runiná laanu.

Sofía: Yanna, pa napa Dios poder, xiñee cudiibe lugar cayaca stale cosa malu.

TUU NGA CANÍʼ NI DXANDÍʼ

Michelle: Guidúʼyanu xiná Génesis, primé libru stiʼ Biblia para guicábinu ni canabadiidxuʼ ca. Ñee nannuʼ historia stiʼ Adán ne Eva ra cayeeteʼ de ti cuananaxhi ni cadi naquiiñeʼ ñócabe la?

Sofía: Nannaʼ, bisiidicabe ni naa dxi guyaaʼ catecismo. Gudxi Dios laacabe cadi gócabe cuananaxhi stiʼ ti yaga, peru qué nuzuubacabe stiidxabe.

Michelle: Biáʼsipeʼ nga modo guniʼluʼ ca. Peru guidúʼyanu xi bizaaca ante guchee Adán ne Eva. Ne racá zánnanu xiñee cayacananu. Ñee zanda gúʼndaluʼ Génesis capítulo 3, versículo 1 dede 5 la?

Sofía: Zanda pue. «Beeda gaca beendaʼ que maniʼ ni jma nexhená lade guiráʼ maniʼ guiʼxhiʼ ni bizáʼ Jiobá Dios. Ngue runi gudxi beendaʼ riʼ gunaa que: “Ñee dxandíʼ guníʼ Dios cadi naquiiñeʼ goto ca cuananaxhi stiʼ guiráʼ yaga nuu ndaaniʼ jardín riʼ la?”. Óraque na gunaa que rabi beendaʼ que: “Ca cuananaxhi stiʼ ca yaga ni nuu ndaaniʼ jardín riʼ zanda guidoʼdo. Peru cuananaxhi stiʼ yaga ni zuhuaa galahuiʼ jardín ca la? Dios guníʼ: «Cadi naquiiñeʼ goto cuananaxhi stini, coʼ, cadi naquiiñeʼ cánatu ni ti cadi gátitu»”. Óraque gudxi beendaʼ que gunaa que: “Dxandipeʼ qué zátiditu. Purtiʼ nanna Dios zaxeleʼ lutu ne zácatu casi laa dxi goto cuananaxhi stini, ne zánnatu xii nga ni jneza ne ni cadi jneza”.»

Michelle: Biaʼsi. Raríʼ cayeeteʼ primeru guniʼné ti beendaʼ Eva. Sti textu zeeda lu Biblia ruzeeteʼ Binidxabaʼ ngue biquiiñeʼ ti beendaʼ para guniʼné Eva.c Laabe gunabadiidxabe Eva xi mandatu bidii Dios laacaʼ de ti yaga. Ñee biiyaluʼ xi guníʼ Dios zazaacacabe pa gócabe cuananaxhi stiʼ yaga que la?

Sofía: Racá na záticabe.

Michelle: Biaʼsi. Despué guniʼbe xcaadxi diidxaʼ ni cusihuinni cugaanibe donda ique Dios. Biaa gúʼyaluʼ xi guniʼbe: «Dxandipeʼ qué zátiditu». ¡Raríʼ caniʼbe rusiguii Dios!

Sofía: Qué huayunadiaʼgadiáʼ nga.

Michelle: Binidxabaʼ guníʼ rusiguii Dios ne para guihuinni pa dxandíʼ ni o pa coʼ, la? naquiiñeʼ tiidiʼ stale tiempu. Nannuʼ xiñee la?

Sofía: Mmm... qué gannadiáʼ.

Michelle: Guidúʼyanu ti ejemplu para guiénenu ni. Pa málasi ti dxi ñabeʼ lii naa jma nadipaʼ que lii, ximodo nusihuínniluʼ cadi dxandíʼ ni caniéʼ yaʼ.

Sofía: Pue, ñúninu xiixa para nihuinni tuu nga ni jma nadipaʼ xa.

Michelle: Ngapeʼ nga ni naquiiñeʼ ñúninu. Ne qué licapeʼ iganna nga. Ñuanu xiixa ni nanaa ti nihuinni tu laa nga jma nadipaʼ.

Sofía: Maʼ nannaʼ xii ndiʼ caniʼluʼ.

Michelle: Peru pa niniéʼ cadi dxandíʼ guiráʼ ni riniʼluʼ yaʼ. Ñee cadi jma nagana para nihuinni tuu nga cusiguii la?

Sofía: Jma pue.

Michelle: Cadi nagana diʼ guihuinni tuu nga jma nadipaʼ, peru jma nagana nga guihuinni tuu nga cusiguii.

Sofía: Dxandíʼ ni nouʼ ca.

Michelle: Naquiiñeʼ tiidiʼ dxi para guʼyaʼ binni pa lii o pa naa nga cusiguii.

Sofía: Naquiiñeʼ pue.

Michelle: Guidúʼyanu sti biaje xiná Génesis. Ñee guníʼ Binidxabaʼ jma nadipaʼ que Dios la?

Sofía: Coʼ.

Michelle: Pa ñaca nga niniʼbe la? nagueendaca nusihuinni Dios jma nadipaʼ para laabe. Peru ni guníʼ Binidxabaʼ nga rusiguii Dios. O casi ñaca ñábibe Eva: «Cusiguii Dios lii, peru naa dxandíʼ nga ni cayabeʼ lii».

Sofía: Qué huaníʼ iquediáʼ pa zacá ni.

Michelle: Cumu nabé nuu xpiaaniʼ Dios la? nanna xii nga ni jma jneza guni. Nga runi, cudiibe lugar tiidiʼ tiempu ti zacá chaahuidugá guihuinni tuu nga caníʼ ni dxandíʼ ne tuu nga cusiguii.

TI COSA NABÉ RISACA

Sofía: Peru ñee cadi bihuinni dxandíʼ ngue ni guníʼ Dios ora gutiʼ Eva la?

Michelle: Dxandíʼ, peru cadi nga si nga ni naquiiñeʼ guihuinni, guidúʼyanu xiná versículo 5. Xiruʼ gudxi Binidxabaʼ Eva.

Sofía: Gudxi laabe pa gobe cuananaxhi stiʼ yaga que zaxeleʼ lube.

Michelle: Biaʼsi, ne laaca gúdxibe Eva: «Zácatu casi laabe [Dios], ne zánnatu xii nga ni jneza ne ni cadi jneza». Ne ca diidxaʼ ca casi ñaca niníʼ Binidxabaʼ cucaachi Dios xiixa ni galán para binni.

Sofía: Dxandíʼ.

Michelle: Nabé naxoo nga ni guniʼbe caʼ.

Sofía: Xiñee yaʼ.

Michelle: Né ca diidxaʼ guníʼ Binidxabaʼ ca bisihuinni cadi caquiiñeʼ diʼ Eva Dios para guibani galán, ne zaqueca guiráʼ binni. Peru Jiobá Dios nanna ni jma jneza nga gudii lugar tiidiʼ tiempu para gusihuinni Binidxabaʼ pa dxandíʼ ngue ni guníʼ. Nga runi, bidiibe lugar laa guni mandar binni guidxilayú ti tiempu. Pur nga napa binni stale yuubaʼ, purtiʼ ni dxandíʼ cayuni mandar guidxilayú riʼ nga Binidxabaʼ, cadi Dios diʼ.d Peru napaʼ caadxi diidxaʼ sicarú gabeʼ lii.

Sofía: Caadxi diidxaʼ sicarú naluʼ la?

Michelle: Biblia rusiidiʼ chupa cosa sicarú de Dios. Primé la? rusiidini nuu Jiobá gaxha de laanu ora cayacananu. Guidúʼyanu xi bicaa rey David lu Salmo 31:7. Laabe nabé gucanabe, peru biiyaʼ xi gúdxibe Dios. Ñee zanda gúʼndaluʼ versículo ca la?

Sofía: Zanda pue. «Dxandipeʼ ziuaaʼ nayecheʼ ne laaca ziuaaʼ nayecheʼ purtiʼ nacháʼhuiluʼ, ne maʼ biiyaluʼ cayacanaʼyaʼ; maʼ nannuʼ xi guiráʼ yuubaʼ cadideʼ.»

Michelle: Ngue runi, neca gucaná David stale la? gutadxí ladxidoʼbe ora gúnnabe cayuuyaʼ Jiobá guiráʼ ni cadíʼdibe. Yanna, lii yaʼ, ñee laaca ratadxí ladxidoʼloʼ gánnaluʼ ruuyaʼ Jiobá guiráʼ ni cadídinu, ne riénebe laanu ora naná nuu ladxidoʼno neca xcaadxi binni nagana raca para laacaʼ guiénecaʼ laanu.

Sofía: Ratadxí pue.

Michelle: Guiropa cosa rusiidiʼ Biblia nga qué zudii Dios lugar gacanaruʼ binni. Laani rusiidini maʼ qué zudii diʼ Dios lugar guni mandar Binidxabaʼ guidxilayú riʼ. Laaca zuni chaahuibe guiráʼ ra maʼ biʼniʼ feu Binidxabaʼ, ne dede zabeebe cani cayuniná lii ne jñaaluʼ. Ñee zanda guibiguetaʼ sti semana ca para guluéʼ lii xiñee zanda guni crenu mayaca cuee Dios guiráʼ yuubaʼ cadídinu la?e

Sofía: Zanda pue.