Xi chiguni Reinu stiʼ Dios pur lii

Casi bíʼyaluʼ lu ca tema ni maʼ gudídinu ca, nabé risaca Reinu stiʼ Dios para ca testigu stiʼ Jiobá. Ne zándaca riuuláʼdxiluʼ caadxi de cani maʼ bizabiruaa Dios chiguni Reinu ca, peru zándaca guiníʼ íqueluʼ nabé galán cani para guni creluʼ cani.

Jneza nga gapaʼ tobi laa ne cadi guni cré guiráʼ ni gábicabe laa (Proverbios 14:15). Ngapeʼ nga ni biʼniʼ ca xpinni Cristu guidxi Bereaa guyuu dxiqué. Ora binadiágacabe de Reinu stiʼ Dios primé biaje qué ñuni crécabe ni casi zécabe. Ni bíʼnicabe nga biiyacabe lu Stiidxaʼ Dios «pa jneza ni caziidi ca[be] que» (Hechos 17:11). Laacabe bichaagacabe ni binadiágacabe ne ni na Stiidxaʼ Dios ne zaqué biiyacabe dxandíʼ cani.

Laadu ca testigu stiʼ Jiobá, runi invitardu lii gúniluʼ cásica biʼniʼ ca xpinni Cristu ni bibani lu primé siglu. Modo rusíʼdidu binni de Biblia sin quixe zacaneni lii guchaagaluʼ cani rinidu de Reinu ca ne ni na Stiidxaʼ Dios, Biblia.

Pa gacanedu lii guiziidiluʼ de Biblia la? cadi puru de Reinu si zaziidiluʼ, sínuque zánnaluʼ modo ricabi Biblia caadxi guendarinabadiidxaʼ nabé risaca casi cani zeeda raríʼ:

• Padé zeeda binni.

• Xi pur nabani binni.

• Xiñee rudii Dios lugar gacananu.

• Xi rizaacanu ora gátinu.

• Ñee zanitilú Guidxilayú riʼ la?

• Ximodo zanda guibani guiráʼ familia nayecheʼ.

Peru nuu ti cosa ni jma risaca, ora gúʼndaluʼ Biblia zacaneni lii chuʼluʼ gaxha de Dios (Santiago 4:8). Ne ra jma gaca xhamíguluʼ Dios, jma nagueenda zuuyaluʼ ca cosa galán chiguni Reinu ca pur lii yanna ne despué. Sicaríʼ gudxi Jesús Bixhoze: «Ne zacaa cabe enda nabani ca ra gunibiáʼ cabe lii ne ra gunibiáʼ cabe Jesucristu ni biseenda luʼ. Lii nga tobi lucha Dios ni dxandíʼ» (Juan 17:3).