CA TEMA NI ZEEDA LU CA PRIMÉ YAZA | XI CHIGUNI REINU STIʼ DIOS PUR LII
Reinu stiʼ Dios Xiñee nabé risácani para Jesús
Dxi guyuu Jesús lu Guidxilayú riʼ, guníʼ de stale cosa. Casi dxi gúdxibe ca discípulo stibe ximodo guni orarcaʼ, ximodo gusiéchecaʼ Dios ne ximodo guibánicaʼ nayecheʼ (Mateo 6:5-13; Marcos 12:17; Lucas 11:28). Peru de ni jma guniʼbe ne de ni jma guyuuláʼdxibe guiniʼbe nga de Reinu stiʼ Dios (Lucas 6:45).
Casi bidúʼyanu lu tema gudídinu ca, biquiiñeʼ Jesús xquendanabani para gucheeche «ca diidxaʼ nacubi ne galán stiʼ reinu stiʼ Dios» (Lucas 8:1, TNM). Bíʼnibe stipa ne guzabe stale kilómetru guidubi naca guidxi Israel para guiníʼnebe binni de gobiernu riʼ. Ne lu guidapaʼ Evangeliu, ra rieeteʼ de dxiiñaʼ bíʼnibe, rieeteʼ jma de ti gayuaa biaje diidxaʼ Reinu. Stale de laacani Jesús peʼ guníʼ cani. Peru, caadxi si de cani guníʼ Jesús de Reinu riʼ nga ruzeeteʼ ca Evangeliu riʼ (Juan 21:25).
Xiñee nabé bisaca Reinu ca para laabe yaʼ. Primé la? purtiʼ maca gulí Dios laabe para gácabe rey lu Reinu ca (Isaías 9:6; Lucas 22:28-30). Peru cadi gucuá ique diʼ Jesús gapa poder ne gusisaca binni laa (Mateo 11:29; Marcos 10:17, 18). Gúpabe razón jma risaca para guiniʼbe de Reinu ca. Laabe gúnnabe, ne nánnabe zuni gobiernu ca stale cosa galán para ca binni ni jma nadxiibe: Bixhózebe ne ca discípulo stibe.a
NI CHIGUNI REINU CA PUR BIXHOZE JESÚS
Nadxii Jesús Bixhoze de guidubi ladxidóʼ (Proverbios 8:30; Juan 14:31). Rusisácabe ca guenda napa, casi guendarannaxhii, guendariáʼ ne pur runi ni jneza (Deuteronomio 32:4; Isaías 49:15; 1 Juan 4:8). Nga runi nanaláʼdxibe guiráʼ ni cadi dxandíʼ riníʼ binni de Bixhózebe. Casi nuu tu riníʼ qué rizaalaʼdxiʼ Dios pa cayacaná binni o dede nacaʼ, laabe nga rúnibe ca cosa malu ca. Nga nga tobi de ca razón gupa Jesús para bicheeche «ca diidxaʼ nacubi ne galán stiʼ reinu»: purtiʼ Reinu ca zusiá lá Bixhózebe (Mateo 4:23; 6:9, 10, TNM). Ximodo zaca nga yaʼ.
Ra guchaani stale cosa para guibani binni jma galán lu Guidxilayú riʼ. Zaquiiñeʼ Jiobá Reinu riʼ para «[g]uchaa be nisa riete lú» binni. Zabeebe ca cosa ni rucaa binni guʼnaʼ, «ne ma qué ziuu ru enda guti nin enda ruuna nin enda racaná ladxidóʼ nin yuubaʼ» (Apocalipsis 21:3, 4). Pur Reinu stiʼ Dios maʼ qué ziuu dxi gacaná binni guidxilayú.b
Nga runi qué ridxagayaanu bisiidiʼ Jesús de Reinu ca, purtiʼ gobiernu ca nga ni gusihuinni riáʼ Bixhózebe binni ne napa stale poder (Santiago 5:11). Peru cadi zuni si Reinu ca stale cosa galán para Dios, sínuque laaca zacaneni ca binni ni nadxii Jesús: ca discípulo stiʼ.
NI CHIGUNI REINU PUR CA DISCÍPULO STIʼ JESÚS
Ante gueeda Jesús lu Guidxilayú riʼ, maca bibaninebe Bixhózebe guibáʼ stale iza. Gucanebe laa para guyáʼ guiráʼ cosa ni nuu, casi guibáʼ sicarú ni ridúʼyanu ne guiráʼ beleguí stini ni qué randa rugábanu ne ca galaxia ca dede ne planeta sicarú stinu riʼ ne guiráʼ ni nabani luni (Colosenses 1:15, 16). Peru de lade guiráʼ ni bizáʼcabe ca, jma gunnaxhii Jesús binni guidxilayú (Proverbios 8:31).
Guendarannaxhii ca nga tobi de ca razón gupa Jesús para bicheeche diidxaʼ. Laabe maca guniʼbe beedabe lu Guidxilayú riʼ para guiniʼbe «diidxa ni usieche» cani caquiiñeʼ gacanécabe laacaʼ (Lucas 4:18). Peru Jesús cadi guníʼ si, sínuque biʼniʼ cani guníʼ. Casi dxi bidagulisaa ti grupu de binni para gucaadiágacaʼ laabe, «biá be laacaʼ. Para bisianda be cani huará ni nuu lade caʼ» (Mateo 14:14). Sti biaje ti hombre napa ti guendahuará feu gudxi laabe: «Pa na lu la? zanda usianda lu naa». Pur guendarannaxhii nápabe ne pur biabe binni que la? bicábibe laa: «Zusianda lii, ne mápeca bianda luʼ», zaqué bisiándabe laa (Lucas 5:12, 13). Ne ora bíʼyabe cayuunaʼ xhamígabe María pur guti bizaʼnaʼ, Lázaro, «uyuu yuuba [ladxidoʼbe] dede uca diti» ne biinabe (Juan 11:32-36). Óraque bíʼnibe xiixa ni bidxagayaa binni: neca maʼ tapa dxi de guti Lázaro, bisibánibe laa sti biaje (Juan 11:38-44).
Nanna Jesús qué zandaa diʼ ca milagru biʼniʼ que. Zadxiñaʼ dxi zaca huará ne zati ca binni ni bisiándabe ne ni bisibánibe que. Peru laaca nánnabe zuni chaahuiʼ Reinu ca guiráʼ guendanagana napa binni ne maʼ qué ziuuruʼ dxi guninani laacaʼ. Nga runi, qué niguixhe íquebe ñúnibe puru si milagru, sínuque jma gucuá íquebe gucheechebe «ca diidxaʼ nacubi ne galán stiʼ reinu» (Mateo 9:35, TNM). Ca milagru bíʼnibe ca naca cani caadxi de ca cosa ni chiguni Reinu stiʼ Dios lu guidubi naca Guidxilayú. Guidúʼyanu xi ruzeeteʼ Biblia chiguizaaca.
Zaree guiráʼ guendahuará.
«Dxi ca cani nacheepaʼ lú zaxaleʼ lucaʼ, ne zunadiaga cani qué runadiaga. Dxi ca binni nachiitaʼ ñee zaguiʼbaʼ dani casi runi ti bidxiña, ne ni qué riníʼ zucaacaʼ ridxi ne stale guendanayecheʼ». Ne «guirutiʼ tu cueza racá zaníʼ: “Huaraʼyaʼ”» (Isaías 33:24; 35:5, 6).
Zaree guendaguti.
«Cani runi jneza zacaacaʼ guidxilayú, ne zabánicaʼ luni guiráʼ dxi.» (Salmo 37:29.)
«Dxandipeʼ [zabi Dios] guendaguti ne maʼ qué ziuuruʼ ni, ne Jiobá, Señor Ni Jma Nandxóʼ, zuchaa nisa rieeteʼ lú guiráʼ binni.» (Isaías 25:8.)
Ziasa cani maʼ guti.
«[Z]una diaga irá cani nuu ndaani baʼ stidxi Xiiñi be, ne zaree caʼ.» (Juan 5:28, 29.)
«Zusibani Dios gueʼtuʼ.» (Hechos 24:15.)
Guiráʼ tu zapa lidxi ne zápacaʼ dxiiñaʼ gúnicaʼ.
«Zucuícabe yoo, ne zabézacabe ndaaniʼ ni; ne dxandipeʼ zuzuhuaacabe lubáʼ uva ne zócabe cuananaxhi stini. Qué zucuícabe yoo ne gadxé tu cueza ndaaniʼ ni; qué zúnicabe dxiiñaʼ layú ne gadxé tu gó guiráʼ ni gudiini [...;] ziecheʼ ca binni ni maʼ gulieeʼ ora guireendú guirá|ʼ dxiiñaʼ gúnicaʼ.» (Isaías 65:21, 22.)
Maʼ qué ziuuruʼ guerra.
«Runduuxe [Dios] guendaridinde stiʼ ca guidxi ca dede ra jma zitu de guidxilayú.» (Salmo 46:9.)
«Qué zandisaʼ ti guidxi roʼ espada stiʼ para gucaalú sti guidxi roʼ, ne maʼ qué zaziidicaʼ tíndecaʼ para checaʼ lu guerra.» (Isaías 2:4.)
Ziuu stale ni gó binni.
«Guidxilayú riʼ dxandipeʼ zudii cuananaxhi stiʼ; Dios, Dios stinu, zaguu ndaayaʼ laanu.» (Salmo 67:6.)
«Ziuu stale biidxiʼ lu guidxilayú; lu ca dani ca jma stale ziuu.» (Salmo 72:16.)
Maʼ qué ziuuruʼ binni pobre.
«Cadi guiráʼ diʼ biaje ziaandaʼ binni pobre.» (Salmo 9:18.)
«Zulabe binni pobre ni canabaʼ gacanécabe laa, ne cani nuu triste ne tutiica ni qué gapa tu gacané laa. Ziabe cani caquiiñeʼ gacanécabe laacaʼ ne ca binni pobre ne zulabe xhialma ca pobre.» (Salmo 72:12, 13.)
Despué de maʼ bidúʼyanu cani maʼ bizabiruaa Dios riʼ, ñee riéneluʼ xiñee nabé risaca para Jesús guiníʼ de Reinu stiʼ Dios la? Laabe guníʼnebe guiráʼ binni ni guná gucaadiaga laabe, purtiʼ nánnabe Reinu ca si nga ni zanda guni chaahuiʼ ca guendanagana stiʼ binni.
Ñee riuuláʼdxiluʼ cani maʼ bizabiruaa Dios chiguni ca la? Pa zacá ni, Ximodo zanda gúniluʼ para guiziidiluʼ jma de Reinu stibe yaʼ. Xi zanda gúniluʼ para guicaaluʼ ca ndaayaʼ stiʼ Reinu ca yaʼ. Sti tema ca zacabi ca guendarinabadiidxaʼ ca.
a Lu tema riʼ caninu nanna Jesús. Xiñee yaʼ. Purtiʼ biásabe de lade gueʼtuʼ ne nuube guibáʼ yanna. Dede dxicá jma risaca Reinu ca para laabe (Lucas 24:51).
b Pa racalaʼdxuʼ gannuʼ xiñee cudiiruʼ Dios lugar gacaná binni la? biiyaʼ capítulo 11 stiʼ libru Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá.