Guendaquéruni ni jneza: ni zeeda gaca casi cáncer nuu lu Guidxilayú

Ora riquiiñeʼ tuuxa puestu stiʼ para guicaa xiixa o para guni ti cosa ni racalaʼdxiʼ la? cadi jneza ni cayuni, ne stale biaje nabé rihuinni ni lade cani runi xhiiñaʼ ti gobiernu. Cadi deruʼ yanna nga cadúʼyanu guendanagana riʼ. Maʼ raca biaʼ 3,500 iza bihuinni maca nuu binni runi zacá, purtiʼ guyuu ti ley ni rieeteʼ ndaaniʼ Biblia ni bisietenalaʼdxiʼ ca juez que cadi gudiicaʼ lugar ugadxe tuuxa lu nacaʼ ora guni juzgarcaʼ (Éxodo 23:8). Peru cadi ugadxe si binni lu naʼ stobi nga guendaquéruni ni jneza. Nuu caadxi de cani runi xhiiñaʼ gobiernu riquiiñecaʼ ca cosa stiʼ gobiernu neca qué gápacaʼ derechu para gúnicaʼ ni, para gacanecaʼ binnilídxicaʼ ne ca xhamígucaʼ, ne dede qué rituí lucaʼ ribáʼnacaʼ bueltu neca ganna binni xi cayúnicaʼ.

Nécapeʼ lu intiica si organización ridúʼyanu qué runi binni ni jneza, ra jma rihuínnini nga lu ca gobiernu ca. Barómetro Global de la Corrupción 2013, ni bicaa Transparencia Internacional, bizeeteʼ cani na binni jma qué runi ni jneza nga gaayuʼ grupu ni nuu, ne laacani nga ca partidu políticu, ca pulicía, cani runi xhiiñaʼ gobiernu, poder legislativo ne poder judicial. Raríʼ zeeda caadxi ejemplu de laacani:

• ÁFRICA: Lu iza 2013, biaʼ 22,000 ni runi xhiiñaʼ gobiernu de Sudáfrica bihuinni qué rúnicaʼ ni jneza.

• SUDAMÉRICA: Lu iza 2012, ndaaniʼ guidxi Brasil bigaanicabe donda ique 25 binni pur biquiiñecaʼ bueltu stiʼ guidxi que para gacanecaʼ ca políticu. Ládecabe nuu ni gucaʼ guiropa hombre jma bisaca stiidxaʼ ndaaniʼ guidxi que, jefe stiʼ Gabinete stiʼ presidente ni biasa que.

• ASIA: Lu iza 1995 guti 502 binni ra bixá ti edificiu naroʼbaʼ ndaaniʼ guidxi Seúl (Corea del Sur). Bidii ca investigador que cuenta bigadxe cani bicuí edificiu que lu naʼ cani runi xhiiñaʼ gobiernu para gudiicaʼ lugar iquiiñecabe material ni cadi naguidxi neca gucheenécabe ca ley ni nuu para gucuí binni edificiu.

• EUROPA: Cecilia Malmström, ni naca comisaria de Asuntos de Interior de la Comisión Europea, guníʼ: «Nabé ridxagayaanu modo [qué runi binni ni jneza Europa]», ne guníʼrube: «Para ganda guiree guendaquéraca ni jneza de xcu la? caquiiñeʼ chuʼ ca políticu ca tobi si, peru zuluaʼsiaʼ qué zanda diʼ gaca nga».

¡Ne dxandipeʼ, guizáʼ maʼ gueteʼ nuu xcu guendaquéruni ni jneza ca! Susan Rose-Ackerman, ti profesora ni nanna ximodo gudxiilúcabe guendaquéruni ni jneza, bicaabe naquiiñeʼ «guchaa» modo runi gobiernu dxiiñaʼ para guireendú ni runi. Ruluíʼ qué ziuu dxi gaca chaahuiʼ nga, peru Biblia cadi rábisi laanu zanda guidxaa cani, sínuque dxandíʼ zácani.