TEMA STIʼ PORTADA | ÑEE RISACA GÚNINU NI JNEZA LA?
Ñee maʼ bisaana binni de guni ni jneza la?
Hitoshi biʼniʼ dxiiñaʼ lu departamentu de contabilidad stiʼ ti agencia ni rudii dxiiñaʼ binni ndaaniʼ guidxi Japón. Ti biaje cayuninebe jefe stibe ti informe de cuenta, laa gudxi laabe gucaabe gadxé cuenta luni. Peru bisiene Hitoshi laabe qué zanda guni ni purtiʼ ruchiiñaʼ xquendabiaaniʼ laa. Jefe stibe gudxi laabe zuchuuguʼ laabe de dxiiñaʼ pa qué gúnibe ni, ne biʼniʼ hombre que ni guníʼ.
Nabé triste guyuu Hitoshi lu chupa chonna beeu gudiʼdiʼ, purtiʼ qué nidxela ti dxiiñaʼ ra cadi naquiiñeʼ gusiguii. Ti biaje cayuni entrevistárcabe laabe para ti dxiiñaʼ, bizeetebe qué ziuu dxi gúnibe ni cadi jneza lu dxiiñaʼ stibe. Ni cayuni entrevistar laabe que guníʼ: «¡Biaa modo riníʼ ique ndiʼ biaa!». Familia stibe ne ca xhamígube guluucaʼ gana laabe, peru guníʼ íquebe pa biáʼsiruʼ ngue cayúnibe ni jneza. Laabe guniʼbe: «Gunabadiidxaʼ laca naa pa zanieruáʼ riuuladxeʼ guneʼ ni jneza».
Triste guininu ni, peru ni bizaaca Hitoshi ca rusihuinni ni cadi guiráʼ diʼ binni runi ni jneza. Stale binni na qué rusaana ni gastiʼ, jmaruʼ si lu negocio. Ti gunaa de Sudáfrica guníʼ: «Stale binni qué runi ni jneza ra runeʼ dxiiñaʼ. Ne nabé nagana nga gucueeza tobi laa para qué guni cásica rúnicabe».
Ra jma rusihuinni ti binni qué runi ni jneza nga ora rusiguii. Lu ti estudiu ni biʼniʼ ti psicólogo láʼ Robert Feldman ndaaniʼ Universidad nuu Massachusetts, biiyabe cada chii minutu de cayuíʼ binni huaniisi diidxaʼ, 60% de laacaʼ rusiguiicaʼ. Feldman guníʼ: «Nabé bidxagayaadu ni. Qué lica niníʼ íquedu pa nabé rusiguii binni guiráʼ dxi». Pa qué riuulaʼdxiʼ binni gusiguiicabe laa, xiñee laani nga ni jma runi yaʼ.
Xiñee nabé maʼ stale binni rusiguii, ribaʼnaʼ ne rúnicaʼ xcaadxi cosa ni cadi jneza pue. Ximodo ruuyaʼ binni ora qué runi xcaadxi ni jneza yaʼ. Xi zanda gúninu para cadi gácanu casi ca binni ca yaʼ.