TEMA STIʼ PORTADA | ÑEE RISACA GÚNINU NI JNEZA LA?

Ora qué raca ni jneza runiná ni guiranu

«Stale biaje, ora gusiguii binni racané ni laa» (Samantha, Sudáfrica).

Ñee laaca zacaca riníʼ íqueluʼ la? Stale biaje ridídinu lu xiixa guendanagana ni rucaa laanu gusiguiinu. Peru ni gúninu ora guidxaagalunu ni zusihuinni tu clase de binni laanu. Casi pa ni jma rizaaláʼdxinu nga guiníʼ binni galán de laanu la? neca cadi jneza bíninu ti cosa ruyúbinu pretextu para guininu jneza ni. Peru ora guihuinni ni dxandíʼ la? nápanu xidé guni huantarnu ni gueeda luguianu pur bisiguiinu. Yanna, guidúʼyanu paraa nga runiná ni laanu.

GUIRUTIʼ RUNI CRÉ NI RUSIGUII

Riuʼnu seguru ora nápanu confianza ti binni purtiʼ racaneni chuʼnu tobi si. Peru cadi casi zeʼ binni rapa confianza. Randa rapa binni ni ora riuucaʼ tobi si stale tiempu, ruiʼcaʼ diidxaʼ ne cadi de laasicaʼ riníʼ íquecaʼ. Peru triste nga ora guirá confianza ca pur gusiguii binni o guni xiixa ni cadi jneza. Ne ora guirá ni la? maʼ nagana guibiguetaʼ gápacabe ni sti biaje.

Ñee huasiguii tuuxa lii ni nabé ridxaagaluʼ la? Pa zacá ni, zándaca nabé bininá ni lii purtiʼ qué nibézaluʼ ni de laabe. Rihuinni dxíchica ora qué runi binni ni jneza rutinde ni laacaʼ, neca xhamígucaʼ.

RICÁ NI CADI JNEZA BINNI

Lu ti estudiu ni biʼniʼ Robert Innes, ti profesor de Economía ni runi dxiiñaʼ ra Universidad de California, biiyabe «ricá guenda qué runi ni jneza xcaadxi binni». Zeeda gácani casi ti virus: ra guieegunu ti binni rusiguii, ni jma nagueenda gúninu nga laaca gusiguiinu.

Xi zanda gúninu para cadi guicá ni laanu yaʼ. Zanda gacané Biblia laanu. Biiyaʼ caadxi principiu zeeda lu Biblia.

Ra qué runi binni ni jneza

Gusiguii

XII NI. Laani nga gábinu binni xiixa ni cadi dxandíʼ. Laaca laani nga guchaʼnu modo guca ti cosa para guchéndanu tuuxa, cadi guininu guiráʼ ni guca para quítenu binni o cuʼnu jma luni para guni cré binni laanu.

NI RUSIIDIʼ BIBLIA: «Nanalaʼdxiʼ Jiobá binni ni rucaachiʼ tu naca [o ni rusiguii], peru cani runi ni jneza nga xhamígube» (Proverbios 3:32). «Lausaana de usiguii tu, ne ora güi tu diidxa lainíʼ ni dxandíʼ» (Efesios 4:25).

Guiníʼ mal de stobi

XII NI. Laani nga guininu xiixa ni cadi dxandíʼ de stobi maca para guninanu laa.

NI RUSIIDIʼ BIBLIA: «Hombre ni riuulaʼdxiʼ guni ni qué iquiiñeʼ qué racané chuʼ binni tobi si, ne tuuxa ni riníʼ mal de stobi ruxheleʼ binni de xhamigu» (Proverbios 16:28, El libro del Pueblo de Dios). «Ra gastiʼ yaga, rizuíʼ gui, ne ra cadi nuu tuuxa ni riníʼ mal de stobi, guirutiʼ ridinde» (Proverbios 26:20).

Gusiguii para cuanaʼ

XII NI. Gusiguiicabe binni para gáxhacabe xpueltu o cani napa.

NI RUSIIDIʼ BIBLIA: «Cadi quíteluʼ trabajador stiluʼ ni nuu pobre para cuanaluʼ ni caquiiñeʼ» (Deuteronomio 24:14, 15). «Ni ruxhii binni pobre la? ruchiichi ni bizáʼ laa, peru ni guiaʼ binni la? rusisaca Dios» (Proverbios 14:31, La Palabra de Dios para Todos).

Cuanaʼ

XII NI. Guicaacabe xiixa stiʼ stobi sin gábicabe laa.

NI RUSIIDIʼ BIBLIA: «Ni uca gubaana la? ma cadi cuanaʼ, sínuque ma iquiiñe ná para guni dxiiña jneza, ti ganda gapa xiixa para acané cani qué gapa gastiʼ» (Efesios 4:28). «Nin ca gubaanaʼ, nin cani rucaa ique puru si gapa bidxichi, nin ca binni güeʼ, nin cani riguu dí, nin cani ruxhii pobre, nin tobi de ca nga qué ziuu ra runi mandar Dios» (1 Corintios 6:9, 10).