Ora ruluíʼ maʼ qué zanda guni huantarnu

Guzéʼtenu caadxi ejemplu, ti gunaa de Estados Unidos láʼ Sally,a biniti casi guiráʼ ni napa runi ti huracán. Sicaríʼ guniʼbe: «Guníʼ iqueʼ maʼ qué zanda guneʼ huantar. Stale biaje bineʼ sentir mayaca guirá stipa stinneʼ».

Laaca guizáʼ naná nga ora rati ti binni ni nadxiinu. Ti gunaa de Australia láʼ Janice ná: «Gucadé ladxiduáʼ dxi gutiʼ guiropaʼ xiiñeʼ, ne casi ñaca nutopaʼ ca pedazuhuiiniʼ stini para ñuneʼ chaahueʼ ni sti biaje. Siempre gudxeʼ Dios: “Dios stinneʼ ¡maʼ qué ganda guneʼ huantar! Racalaʼdxeʼ gaseʼ ne maʼ qué chuʼ dxi guibaneʼ”».

Gucadé ladxidóʼ Daniel dxi bicheené xheelaʼ laa. Laa guníʼ: «Dxi gudxi xheelaʼ naa maʼ bicheené naa, casi ñaca nutaabicabe ti gudxíu ladxiduáʼ. Guizáʼ gucanaʼyaʼ, dede bineʼ sentir casi ñaca nutaabicabe ti gudxíu ladxiduáʼ stale biaje ne xadxí bineʼ sentir zacá».

¿Ñee cayuni sufrirluʼ pur tobi de ca cosa riʼ la?

• Ti desastre natural

• Guti ti binni ni nadxiiluʼ

• Bicheené xheelaluʼ lii

• Nápaluʼ ti guendahuará malu

• Nápaluʼ sentimientu negativu

Pa cazaacaluʼ tobi de ca cosa ni maʼ bizéʼtenu riʼ la? zacané revista Torre stiʼ ni rapa riʼ lii gudiiluʼ cuenta risácaruʼ xquendanabániluʼ.