Ximodo zanda gacanenu xheelaʼ ca bíchinu o bizánanu ni cadi Testigu
1 Stale de ca testigu stiʼ Jiobá nápacaʼ xheelacaʼ ni nacháʼhuicaʼ ne laanu ne riuláʼdxicaʼ gacanecaʼ ca binni ridagulisaanenu, peru caʼruʼ quixhe íquecaʼ gácacaʼ xpinni Dios. Xheelaʼ ti bizánanu na yanna: «Guiniéʼ íquesiaʼ chaa de yoo pur yoo la? guizáʼ bicueeza ni naa». Xtuudxi la? zándaca naquiiñeʼ gusaanacaʼ cani na Biblia cadi jneza o guiníʼ íqueca qué ziuu dxi gápacaʼ tiempu para gúnica guiráʼ ni na Dios casi runi xheelacaʼ. Ximodo zanda gacanenu laacabe yaʼ.
2 Bisihuinni de que racaláʼdxiluʼ gacaneluʼ laacabe. Guiníʼ íquelu ni caquiiñeʼ tuuxa o ni ruguu xizaa laabe la? zanda guxhale ni neza para chuláʼdxibe guiziidibe ca dxandíʼ ni zeeda lu Biblia (Fili. 2:4). Stale de ca bíchinu ne bizánanu ni dxiqué gúpacaʼ ti relijión gadxé de ni napa xheelacaʼ la? ruzeetecabe pabiáʼ gucané tuudxi Testigu laacabe ne stale guendarannaxhii. Hombre ni bizeetenu casi bizulunu ca guníʼ «José, ti binnigola stiʼ ca binni ridagulisaa ca, nabé gucanebe naa stálepeʼ. Zuluaʼsiaʼ ra guluube gana naa nga maʼ dxandíʼ ucuá iqueʼ guundaʼ Biblia.» Xheelaʼ sti bizánanu rietenalaʼdxiʼ de que stale de ca bíchinu nabé yegánnacaʼ laabe ne bíʼnicaʼ stipa pur guiníʼnecaʼ laabe ni jma riuláʼdxibe. Nabe: «Bizuluaʼ biiyaʼ relijión stiʼ [xheelaʼ] gadxepeʼ de modo biiyaʼ ni dxiqué. Guiráʼ tu ridxaagabe la? puru binni ni guizáʼ nuu xpiaaniʼ ne zanda guiniʼcaʼ de intiica.» (1 Cor. 9:20-23.)
3 Gucané laabe lu xiixa ni caquiiñebe. Xheelaʼ ca bíchinu ne ca bizánanu ni cadi Testigu la? laaca zadxagayaacabe pa gacanenu laacabe ne guendarannaxhii (Pro. 3:27; Gál. 6:10). Ti biaje la? xheelaʼ ti bizánanu ni cadi Testigu la? bixiiñeʼ xcárrube, ne raqué ti hombrehuiiniʼ Testigu gucané laabe. «Guizáʼ bidxagayaa ni bíʼnibe que», na hombre ca. Sti bíchinu guidubi ti dxi guyuu gucané xheelaʼ sti bizánanu ni cadi Testigu para chuʼ leʼ layú stibe. Laga cayúnicabe dxiiñaʼ la? guníʼcabe diidxaʼ, ora bilúxecabe la? maʼ xhamígucabe. Despué de chupa semana la? señor que bidxiña bíchinu que ne gudxibe laa: «Maʼ ora guchaa modo nabaneʼ, zanda guundaneluʼ naa Biblia la?» Hombre que guizáʼ nagueenda biniisiʼ lu Stiidxaʼ Dios ne yanna maʼ nácabe ti Testigu ni maʼ guyuunisa.
4 Laga canayúbinu cani naquiiñeʼ gucaadiaga ladu ra rucheechenu diidxaʼ la? gúninu biaʼ gándatiʼ pur gacanenu xheelaʼ ca bíchinu o bizánanu ni cadi Testigu (1 Tim. 2:1-4).