Cani chiguieeteʼ

◼ Cani zanda gusaanatu Febrero: Acerquémonos a Jehová. Pa qué gápatu libru riʼ la? zanda gusaanatu libru Creación (naroʼbaʼ la? o nahuiiniʼ) o libru Apocalipsis. Marso: El conocimiento que lleva a vida eterna. Laguni stipa pur guzulú gúʼndanetu binni de Biblia. Pa ca binni ca maʼ nápacaʼ libru riʼ la? zanda gusaanatu Prestemos atención a las profecías de Daniel. Abril ne mayo: La Atalaya ne ¡Despertad! Ora ibiguétatu ralidxi tuuxa ni riuulaʼdxiʼ, casi cani guyé ra Bietenaláʼdxitu Guendaguti stiʼ Jesús o ra huayúnitu sti guendaridagulisaa, peru qué ridxaagapeʼ xquidxi Jiobá la? zanda gusaanatu libru Adoremos a Jehová. Naquiiñeʼ gúnitu stipa para guzulú gúʼndanetu laacabe de Biblia, jmaruʼ si pa maʼ biindacabe libru Conocimiento ne Exige.

◼ Binnigola ni rapa guiráʼ stiʼ binni ridagulisaa (superintendente presidente) ca o tuuxa ni bidiibe dxiiñaʼ riʼ la? guʼyaʼ pa jneza nuu ca guiʼchiʼ ra cá pagala nápatu, ne gaca ni 1 stiʼ marso o sti ora peru cadi tiidiʼ diʼ stale dxi. Ora maʼ guca ni la? guieeteʼ ni nezalú ca binni ridagulisaa dxi guiniʼtu pagala nuu. Ziuundaʼ guiráʼ resibu ra cá pabiáʼ bueltu bidii ca binni ridagulisaa para dxiiñaʼ raca guidubi guidxilayú (obra mundial) o para sti dxiiñaʼ stiʼ xquidxi Jiobá.

◼ Secretariu ne binnigola ni ruuyaʼ modo rireecheʼ diidxaʼ (superintendente de servicio) ca naquiiñeʼ gúʼyacabe dxiiñaʼ ni biʼniʼ ca precursor regular. Ca binnigola ca zacanécabe cani raca nagana laa usaa hora stiʼ. Zadxélatu ximodo acanetu laacabe lu ca carta ni reeda guiráʼ iza (S-201-S).

◼ Libana ni bibí para gudiicabe ora mayaca Guietenaláʼdxinu Guendaguti stiʼ Jesús stiʼ iza 2004 zaree lani «Seamos valerosos y confiemos en Jehová». (Gúʼyatu anuncio ni caníʼ de laani lu Nuestro Ministerio del Reino stiʼ septiembre 2003).

◼ Ca binni ridagulisaa ca (congregación) naquiiñeʼ cúʼcabe listu guiráʼ ni zaquiiñeʼ ora Guietenaláʼdxicabe Guendaguti stiʼ Jesús ni chigaca domingu 4 stiʼ abril stiʼ iza riʼ despué de guiaaziʼ Gubidxa. Nécaxa libana ca zanda guzuluni ante la? pan ne binu ca zadíʼdini despué de guiaaziʼ Gubidxa. Lainabadiidxaʼ pórapeʼ nga riaaziʼ Gubidxa neza ranuutu. Cumu dxi ca maʼ qué ziuu diʼ sti guendaridagulisaa sínuque ni gápasitu ora chigucheechetu diidxaʼ la? zuchaacabe dxi gúʼndatu rebista La Atalaya. Ca binnigola ni riganna ca binni ridagulisaa ca la? (superintendente de circuito) zuchaacabe dxi guidagulisaacabe semana ca. Nécaxa ni jma galán nga de que cada neza binni ridagulisaa ñápacaʼ ti lugar para Guietenaláʼdxicaʼ Guendaguti stiʼ Jesús la? cadi guiráʼ diʼ ora zanda gácani zacá. Casi ranuu chupa chonna neza binni ridagulisaa ni riquiiñecaʼ tobi si Yoo stiʼ Reinu la? zánda guyúbicabe sti lugar gúnicabe ni gueelaʼ ca. Cayábidu laatu pa ganda la? gusaanatu biaʼ cuarenta minutu para guzulú sti neza binni ridagulisaa ti guirácabe cueendúcabe stale luni. Laaca riquiiñeʼ guiníʼ íquetu de que riné tiempu nga guzuhuaacabe xcárrucabe ne ora ridiʼdiʼ jma carru ni chisaana o ni chiné binni. Ca binnigola ca zuuyacabe ni jma jneza gaca.