Caniisi dxiiñaʼ ndaaniʼ Betel stiʼ Méjicu
Lu Anuario 2003 ra ricá pabiáʼ dxiiñaʼ cayaca lu guendarucheeche diidxaʼ na de que cadxiña stale binni Jiobá ndaaniʼ caadxi guidxi roʼ, casi África ne Europa Oriental. Laaca zacaca cayaca ndaaniʼ guidxi Méjicu ne Sentroamérica, pur nga runi caquiiñeʼ stale guiʼchiʼ ne libru. Aparte de guidxi Méjicu la? laaca rudiidu guiʼchiʼ ne libru xcadxe guidxi stiʼ Sentroamérica ne zeʼ dxi jma stale canábacabe.
2 Pur nga la? gupa xidé guca jma naroʼbaʼ yoo Ra riaʼ ca rebista ca Méjicu, ne zacá maʼ gunda bidxaa ca máquina ca Betel 4. Yanna riʼ la? rúnidu libru, foyetu, tratadu, bideu, ne xcaadxi guiʼchiʼ lu ca diidxaʼ zeeda raríʼ: diidxastiá, guaymí, huabe, inglés, quecchí, cuna, seña stiʼ Méjicu, maya, masateco, misquito, mije, náhual, poptiʼ, totonaco, sotsil, seltal, tojolabal ne diidxazá (istmo, Villa Alta ne Ixtlán). Laaca rúnidu rebista ne sti guiʼchiʼ ni láʼ Xhiiñaʼ Reinu ni Rúninu (Nuestro Ministerio del Reino) lu diidxastiá, inglés, maya, ne yanna nacubigá la? lu diidxazá stiʼ istmo cayaca guiʼchiʼ ni láʼ Xhiiñaʼ Reinu ni Rúninu.
3 Ca bíchinu ni nuu Betel biéchecaʼ ora gúnnacaʼ de que Ca Binnigola ni Bibí ne Nanna Stale (Cuerpo Gobernante) nacaʼ zaa guidxela gadxe máquina offset ni runi rebista jma nagueenda, modelu Lithoman marca MAN Roland para chuʼ ndaaniʼ chupa chonna Betel. Primé máquina ca bizuhuaani Gran Bretaña ne iropa ca Brasil. Ne Méjicu la? ca primé beeu stiʼ iza riʼ chiguzulú guzuhuaani. Máquina riʼ la? lu ti hora rúnini 90.000 rebista o ca cuadernuhuiiniʼ ni riguiidiʼ para chaʼ ti libru, nga runi, susirani ti neza guiʼchiʼ ni renda (rollo) biaʼ treinta minutu. Ne laani maʼ ziuu tapa máquina, peru chonna ni maca nuu ca ribeecaʼ 38.000 rebista lu ti hora. Cumu naroʼbaʼ máquina riʼ ne nanaani la? gupa xidé ucachaahuiʼ ndaaniʼ yoo Ra riaʼ ca guiʼchiʼ ca ti guzuhuaani.
4 Máquina cubi riʼ la? zúnini stale dxiiñaʼ ni huayúnicabe lu nácabe. Lu chupa minutu si zabeeni ti guiʼchiʼ maca yeʼchuʼ casi ti rebista, ne maca bigá –sin iquiiñeni sti maquinahuiiniʼ ni rugá chonna ladu–, ne stúbini zaguixhechaahuini ca guiʼchiʼ ca luguiáʼ stobi, ugábani, ucaani lá ca guiʼchiʼ ca, uchéndani nailu guiráʼ paquete, quixhechaahuini ca rebista ca lu reja de yaga. De racá pa cuadernuhuiiniʼ cani la? zinécabe cani ranuu máquina ni runi libru, ne ora rebista cani la? zinécabe cani ndaaniʼ ca carru ni riné cani sti guidxi. Ora gaca guiropaʼ si cani bieeteʼ últimu ca nga zagaʼnaʼ binni cani. Cumu nagueenda ni la? zacaneni gaca jma stale lu huaxiéʼ si tiempu ne zaquiiñeʼ huaxiéʼ binni. Guiráʼ ndiʼ zanda gaca pur ca máquina ni maʼ nuu yanna riʼ.
5 Máquina Lithoman marca MAN Roland nga nga tobi de cani jma galán ni caquiiñeʼ para gaca guiráʼ ca rebista ni caquiiñenu. Para guzuhuaa ni ndaaniʼ yoo Ra riaʼ ca guiʼchiʼ ca la? gupa xidé gucachaahuiʼ caadxi trabe ne gudaañecabe 120 sentímetru para guluucabe ti base de 70 sentímetru de nanaandéʼ –para guca guiráʼ nga la? biquiiñeʼ 380 m3 de concretu–, biáʼ ganda guani máquina ca. Zándaca gaca ti puente cueʼni ra tiidiʼ binni chiganna Betel para guʼya modo rúnini dxiiñaʼ.
6 Nacubi biree sti máquina ni láʼ CTP (pur modo lani inglés computer to plate) qué riquiiñedini ti negatibu stiʼ foto, ne ni rúnini nga rucaani lu placa, ca foto ni rutiidiʼ computadora ca luni, nga nga ni jma caquiiñeʼ ca fábrica ca yanna. Betel stiʼ Puerto Rico ne Estados Unidos de América ruseendaʼ ca guiʼchiʼ para ca rebista ca lu computadora. Riguucabe ni ndaaniʼ ti molde lu computadora ne ládeni riguixhe chaahuicabe ca foto stini. Ora maʼ nexhechaahuiʼ cani la? computadora ca rutiidiʼ cani lu máquina CTP ca para gucaa cani lu ti placa de aluminiu. Ca ndiʼ nga ni raca lu CTP: ribeeni lu ti placa de aluminiu guiráʼ ni ucuaani lu computadora ca, runeʼni ti nisahuiiniʼ ne rugaaguini placa ca ne ruuyacabe pa jneza bireeni. Ne cada tobi de ca placa ca la? riquiiñeʼ cani para guiree ti miyón rebista.
7 Cásica runi máquina ni ruzáʼ ca libru ca la? máquina ni runi rebista ne cuadernuhuiiniʼ riʼ laaca maca neni ni cubayú ca guiʼchindahui ni maʼ qué zaquiiñeʼ ora maʼ cayáʼ ca rebista ca ne laaca laani zuquídxini ca guiʼchindahui ca para idoocaʼ. Ziuu ti lugar si para guidxá pintura ne de racá stúbini zutiidini pintura ca máquina ca. Maʼ qué zaquiiñeʼ diʼ ca tambu de 200 quilu ni rusáʼbicabe guiluxe iquiiñeʼ si, sínuque maʼ iquiiñeʼ tanque ni cadi gusáʼbicabe ni chiné jma de 1.000 quilu de pintura. Zacá la? maʼ qué ziuu diʼ ca tambu ni napa pintura ni zándaca guni huará binni, maʼ qué ziuu diʼ pintura ni chuʼchaahuiʼ, maʼ qué zaniti diʼ stale bueltu, ziuu jma lugar, ne zaca jma guiʼchiʼ.
8 Guiráʼ cani maʼ bidxaa, cani maʼ bidxela ne cani maʼ guca jma galán ca la? biniti stale bueltu luguiáʼ cani. Ximodo biaxa guiráʼ nga yaʼ. Ne bueltu riguucabe ndaaniʼ caja ra cá «Bueltu para Dxiiñaʼ ni Raca lu Guidubi Guidxilayú. Mateo 24:14» («Donaciones para la Obra Mundial. Mateo 24:14») ne cani ruseenda ca bíchinu Betel, cani racalaʼdxiʼ guʼyaʼ gaca cani na Dios. Guiráʼ cani cayuni ni na Jiobá la? nabé racanecaʼ ora caquiiñeʼ. Ca dxi stiʼ Moisés biquiiñeʼ material para chaʼ tabernáculo que ne xcaadxi ni naquiiñeʼ chuʼ ndaaniʼ ni ne bladuʼ, copa ne guiráʼ ni gunabaʼ Jiobá para laani (Éxo. 35:4-19). Casi modo na ca diidxaʼ cá lu bersículo 5 «guiráʼ ni napa ti ladxidóʼ ni rudiiʼ» ne ni ná bersículo 10 «cani napa ti ladxidóʼ nuuxpiaaniʼ» bicaa cani ca israelita ni napa ti ladxidóʼ nachaʼhuiʼ guluiʼcaʼ de que nuucaʼ gacanecaʼ ne guluiʼcaʼ guendanuuxpiaaniʼ para gudiicaʼ stale de ni caquiiñeʼ. Éxodo 35:20, 21 caníʼ ximodo bicabi ca israelita que, ne zacá nga para guyuulaʼdxiʼ guirácabeʼ gudiicabe cani caquiiñeʼ para chaʼ tabernaculo que, guiráʼ bidii biaʼ napa.
9 Zaqueca guca cani primé yenanda Cristu, nabé guyuuláʼdxicabe gudiicabe ora caquiiñeʼ xiixa para gaca odorar Jiobá, casi na Pablu lu 2 Corintios 9:7: «Cada tobi udii biaʼ ruluiʼlaʼdxiʼ, ne cadi acaná ladxidóʼ ti ma bidii ni, nin udii ni purti canaba cabe ni laa, purti nadxii Dios ni rudii ni laa de idubi ladxidóʼ». Dxandíʼ guyuu tu laa ni nabé gupa bueltu, peru stale de cani biʼniʼ ni na Dios qué ñápadicaʼ bueltu, ne bidiicaʼ biaʼ gunda. Ná Pablu: «Pa udii binni de idubi ladxidóʼ, ziulaʼdxi Dios ni biaʼ tiica laani. Nanna be pabiáʼ napa binni, ne qué zanaba be laa ni qué gapa» (2 Cor. 8:12).
10 Nga nga caníʼ La Atalaya 15 stiʼ enero 1992, lu yaza 18, párrafo 16: «Huaxiéʼ testigu stiʼ Jiobá nápacaʼ bueltu. Neca huaxiéʼ bueltu gudiicabe para saniruʼ ca dxiiñaʼ stiʼ Reinu la? biaʼ ni rudiicabe ca risaca ni. Ora Jesús biʼyaʼ ti biuda pobre guluu chupa monedahuiiniʼ ni huaxiéʼ risaca ndaaniʼ tobi de ca caja ni zuhuaa ra yuʼduʼ que la? guniʼbe: “jma stale bisaba viuda riʼ que ca xcaadxi ca. Purti ca xcaadxi ca bidii ca Dios ni ma biaana si sticaʼ, ne laabe huaxiéʼ napa be peru bisaba be irá ni napa be para ibani né be”. (Lucas 21:1-4.) Nécaxa nahuiiniʼ ni bidiibe que la? bidiibe ni ne guendanayecheʼ... ne bisaca ni guluube que».
11 Cayanda cayúninu guiráʼ ni cayaca ne ni chigaca ndaaniʼ Betel stiʼ Méjicu la? purtiʼ Jiobá cuniibi ladxidoʼnoʼ para gudiʼnu. Dxandíʼ nga zacaaruʼ ca bíchinu de ndaaniʼ guidxi Méjicu ne de Sentroamérica ca rebista La Atalaya ne ¡Despertad! purtiʼ nachaahuiʼ ladxidóʼ cani cayuni ni na Dios ni nuu lu guidubi naca Guidxilayú riʼ. Zacá nga «para gapa tu biaʼca, biaʼca.[ ...,] Casi cá ni lu Xquiʼchi Dios: “Ni bitopa stale la? qué ñaana ru stiʼ, ne ni bitopa huaxiéʼ qué ñaadxa stiʼ”» (2 Cor. 8:14, 15).
12 Ne rudiidu xquíxepeʼ laatu purtiʼ pur cayacanetu nga caniisi dxiiñaʼ stiʼ Jiobá ndaaniʼ Betel stiʼ Méjicu. Jiobá cuuruʼ ndaayaʼ xquidxi para chúʼcabe galán ne laabe.
[Epígrafe de la página 7]
PABIÁʼ REBISTA RIREE MÉJICU
81.627.412 87.783.325 89.784.961 89.783.962 104.282.933
1999 2000 2001 2002 2003
[Epígrafe de la página 7]
Cani napa si derechu guzáʼ ni nga MAN Roland Druckmaschinen AG
Ziuulaʼ ni: 44 metru
Nasoo ni: 5,5 metru
Nanaa ni: 240 tonelada