Ca Grupu ni Rucuí Yoo stiʼ Reinu

¹ Cumu zeʼ dxi jma zidale cani rucheeche diidxaʼ la? caquiiñepeʼ cuíʼ jma Yoo stiʼ Reinu, cásica ndaaniʼ guidxi roʼ stinu ne zaqueca guidubi naca guidxilayú. Para ganda gaca tender dxiiñaʼ risaca stiʼ Reinu riʼ la? cani zaniruʼ lade ca testigu stiʼ Jiobá bíʼnicabe de que nobiembre stiʼ iza 1999 guzulú sti guenda ni risaca ni raca guidubi dxi. Raríʼ la? raca inbitar hombre ne gunaa. Ne lani: ca boluntariu ne sierbu ni Rucuí Yoo stiʼ Reinu. Ne rúnicabe dxiiñaʼ lade Ca Grupu ni Rucuí Yoo stiʼ Reinu (GRYR).

² Yanna la? nuu 35 GRYR Méjicu ne 1 Belise; ne 658 nga cani runi dxiiñaʼ lu cani: 399 boluntariu ne 259 sierbu. Pur sti dxiiñaʼ ni láʼ «Cuíʼ Yoo stiʼ Reinu ndaaniʼ ca guidxi ra huaxiéʼ nuu bueltu» la? maʼ gurí 662 Yoo stiʼ Reinu ndaaniʼ guidxi Méjicu ne 14 Belise. Lu iza stiʼ dxiiñaʼ 2003 la? biluxe 254. Laaca gurí 187 yoo ne gucachaahuiʼ 253 ni bininá nisaguié ne xu.

³ Ximodo runi ca Grupu ni Rucuí Yoo stiʼ Reinu riʼ dxiiñaʼ yaʼ. Betel ribí chupa binnigola ni nanna: tobi ca guʼyaʼ modo gaca dxiiñaʼ, ne tobi ni gacané laabe. Lade ca dxiiñaʼ ni rúnicabe nga gúʼyacabe de que cani cayuni dxiiñaʼ riʼ chuʼcaʼ nazaaca ne chuʼcaʼ galán ne Jiobá, gudiicabe dxiiñaʼ gúnicaʼ ne gúʼyacabe gaca cani jneza. Dede enero stiʼ 2003 la? lade ca grupu riʼ nuu Tu ruuyaʼ chuʼ nisa ne biaaniʼ, Tobi ni ruuyaʼ iquiiñecabe cani runinécabe dxiiñaʼ ti cadi guizaacacabe xiixa, Tobi ni racabiáʼ de ley, Tobi ni rizíʼ material ne guendaró, Tobi ni riné cuenta stícabe, Tobi ni riné lista stiʼ herramienta, Tobi ni ruuyaʼ guiluxe dxiiñaʼ ca galán, ne Tobi ni biziidiʼ gusá carru Betel.

⁴ Nuucabe galán ne Jiobá. Ni jma galán ni napa GRYR nga nga ca hombre ne gunaa ni nuucaʼ galán ne Jiobá «cani ma nanna uná nga jneza ne uná nga ni cadi jneza, purti ma biaa ca guni ca jneza» (Heb. 5:14). Xi racané laacabe gánnacabe guná ndiʼ jneza ne ni cadi jneza yaʼ. Laacabe la? dede lunes hasta sábadu ruundacabe ti textu para guzulenécabe dxi ne maca nuu tu guicabi luni, ndiʼ nga ni rábinu guendaruni adorar Jiobá siadoʼroʼ. Laaca ruundacabe rebista La Atalaya ca lunes huaxhinni. Ne ridagulisaanécabe ca binni ni cabí Yoo stiʼ Reinu sticaʼ. Raqué la? ne chésicabe riguucabe gana stuudxi ne ra icábicabe ne ra gucheechecabe diidxaʼ.

⁵ Dxiiñaʼ ni raca ne panda hora. Betel nga ruseendaʼ xi dxiiñaʼ guni GRYR, ne laacabe rucuícabe biaʼ xhoopaʼ Yoo stiʼ Reinu lu ti iza. Laacabe nánnacabe de que ra cayúnicabe dxiiñaʼ riʼ la? laaca cayuni adorárcabe Jiobá, ne rusisácacabe ni ne ruuyacabe ni casi ti guenda (Rom. 12:1, 2; Col. 3:23, 24). Ti dxi dxiiñaʼ stícabe la? xhono hora, dede lunes hasta biernes, ne ca sábadu ca la? tobi rúnicabe dxiiñaʼ ne tobi riziláʼdxicabe.

⁶ Ni huabeendúcabe. Xi huayaca, ne xi huaníʼcabe pur dxiiñaʼ ni cayuni ca Grupu ni Rucuí Yoo stiʼ Reinu riʼ yaʼ.

•Ti bizánanu de Nuebo Laredo (Tamaulipas), bicaabe ra nuu GRYR ni guyuu ra ridagulisaabe: «Naa ne binnilidxeʼ la? rudiidu xquíxepeʼ laatu pur gucanetu cuíʼ Yoo stiʼ Reinu stidu. Gunda bínidu ni purtiʼ gucané stuudxi laadu, peru laatu jma bihuinni de que gucanetu pur bidiitu stipa laadu para ucuidu yoo riʼ para Jiobá. Ne pur guluutu gana laadu ora ridagulisaanu, rinábadu lu Jiobá cuuruʼ ndaayaʼ laatu pur dxiiñaʼ risaca ni cayúnitu para gaca adorarbe jnézapeʼ».

•Ndaaniʼ guidxi San Nicolás de los Garsa (Nuebo León), ra gurí tapa Yoo guiʼdiʼ stiʼ Reinu lu chupa beeu, ra biquiiñecabe armasón de guiibaʼ ne tabla-roca la? lu periódicu El Norte, de Monterrey guníʼ sicaríʼ: «Aparte de runibiáʼcabe xi runi crécabe ne fe [relijión] stícabe la? jma de ti mil testigu stiʼ Jiobá bicaacabe lu chupa beeu lu ti guiʼchiʼ sicaríʼ: “Ucuidu Yoo stiʼ Reinu ndaaniʼ Colonia Balle Dorado”. Huaxiepeʼ nga ca dxi gudíxhecabe para guilúxecabe tapa Yoo guiʼdiʼ stiʼ Reinu riʼ, ne biaʼ ca nga ca dxi biquiiñeʼ cani rié lade yuʼduʼ riʼ, cani nahuiiniʼ ne cani huaniisiʼ para bicuicaʼ ni, ne ni chiguiáxacabe yannadxí nga chichuu ndaayaʼ lugar ca. [...] Yoo stiʼ Reinu riʼ la? zaquiiñeni para ca [quinse] neza binni ridagulisaa stiʼ ca colonia ni nuu gaxha».

•Ra guyé GRYR ra nuu ca binni ridagulisaa stiʼ guidxi August Pine Ridge (Belise) la? ca 43 ni rucheeche diidxaʼ de raqué gucanecaʼ ne stale gana para gurí yoo stiʼ Reinu stícaʼ, ne lu chupa si gubidxa guleecabe ti armasón de yaga lu ti layú de 800 metru cuadradu ne binichaahuicabe luni. Bihuínnipeʼ de que gucanécabe ra bidiicabe bueltu ne ra guyécabe lápecabe; ne zacapeʼ biʼniʼ ti bizánanu ni guyé lu bisicleta de ra cayaca ni biaʼ diesisiete quilómetru aronda para gacané. Galán guininu de que despué de guca dedicar Yoo stiʼ Reinu riʼ la? beintisinco de ca bíchinu guniʼcaʼ de que zacanecaʼ ti semana ra chití sti Yoo stiʼ Reinu guidxi Dangriga (Belise) ni nuu 305 quilómetru de ra nuucabe.

•Jma cayé binni ca guendaridagulisaa ca ora maʼ biluxe ca Yoo stiʼ Reinu riʼ. Guiropaʼ iza gudiʼdiʼ ca la? ndaaniʼ guidxi Belise bidale 10% jma de cani rucheeche diidxaʼ, dxandipeʼ pur ca catorse Yoo stiʼ Reinu ni gurí ca la? cabidxi cani binni.

⁷ Racanécabe ra runiná nisaguié ne xu. 22 stiʼ septiembre 2002 la? huracán Isidoro bininá ni stálepeʼ ca yoo ni nuu guriá nisadóʼ stiʼ Campeche ne Yucatán. Bininá ni 430 yoo ne 19 lugar ra ridagulisaacabe. Oraqueca, Betel biseendaʼ chupa Grupu ni Rucuí Yoo stiʼ Reinu para gacané ra bininá nisaguié que. Ne 20 stiʼ enero 2003 la? ti xu naroʼbaʼ bininá lidxi stale de ca bíchinu guidxi Colima. Biaʼsi, guionna lugar ra gucaná riʼ la? gurí 187 yoo ne gucachaahuiʼ 253. Yendá ti guiʼchiʼ Betel ni na: «Para ca Binnigola ni Bibí ne Zaniruʼ ne cani nuu Betel stiʼ Méjicu: Nayéchepeʼ nga nuaa cucaa guiʼchiʼ riʼ ranuutu para gudiéʼ xquíxepeʼ, primeru la? Jiobá, purtiʼ Laabe nga cudiibe laanu guiráʼ cosa, ne laatu, pur stipa stitu, ne dxiiñaʼ nadipaʼ stiʼ ca bíchinu ne ca bizánanu la? yanna maʼ nápadu ti yoo. Yoo riʼ zusietenaláʼdxini laadu guiráʼ dxi pabiáʼ stale ndiʼ ni nuzáʼbidu Jiobá, ne ti modo ni zanda si quíxedu laabe nga guzuubadu stiidxabe ne cadi gusaanadu laabe, rinábadu stálepeʼ laabe gudiibe lugar laadu chuʼduʼ neca ti ladehuiiniʼ ndaaniʼ xquídxibe. Runi orardu para cuuruʼ Jiobá ndaayaʼ ca stipa ni rúnitu. Ni riaadxaʼ si guiniéʼ nga: xquíxepeʼ laatu».

⁸ Dxiiñaʼ ni raca ora maʼ cabí ti Yoo stiʼ Reinu. Nápadu guiʼchiʼ ra cá de que Méjicu ne Belise nuu 100 Yoo stiʼ Reinu ni cabiruʼ, ne lu 70 de laacani la? cayacané GRYR. Gánnanu de que, ora maʼ cabí ti Yoo stiʼ Reinu la? dxiiñaʼ ca riábani luguiáʼ ca binni ridagulisaa ca, laacabe nga ni jma racanécabe ne stuudxi bíchinu ne bizánanu ni racaláʼdxicaʼ gacanecaʼ. Ñee zanda gaca ndiʼ la? ¡Zanda pue! Laguuyaʼ si xi guca: ndaaniʼ ti guidxi stiʼ Chiapas, Yajalón, cani rucheeche diidxaʼ stiʼ guionna neza binni ridagulisaa de raqué la? bíʼnicabe dxiiñaʼ nadipaʼ biaʼ chii semana para gápacabe ti Yoo stiʼ Reinu; cumu cadi pareju lu layú que la? yené ni jma dxiiñaʼ de ni maca raca. GRYR ni gucané raqué la? guníʼ de que guiráʼ dxi guyé biaʼ diesiocho tu gucané, peru huaxhinni biaʼ treinta tu gucané dede maʼ huaxhínnipeʼ.

⁹ Caquiiñeʼ jma boluntariu. Yanna riʼ cayúʼyadu de que caquiiñeruʼ cuíʼ jma Yoo sti Reinu. Pa gúnirudu biaʼ modo zeeda yúnidu de ucuidu 330 Yoo stiʼ Reinu lu ti iza la? zaquiiñedu biaʼ xhono iza para 2.640 ni caquiiñeʼ cuíʼ Méjicu si. Ñee ninaluʼ ñacaneluʼ lu guenda riʼ la? Pur yanna la? caquiiñeʼ jma tu gacané, casi cani nanna de modo ribí yoo, ni racabiáʼ de ley, ni chiné cuenta stícabe, tobi ni síʼ ca material ca ne guendaró ne tobi ni rusá carru. Nécaxa jma nga nuu binni ni caʼruʼ guichaganáʼ lade ca grupu riʼ la? cani maʼ bichaganaʼ laaca zanda guinábacaʼ gúnicaʼ dxiiñaʼ riʼ, pa qué gápacaʼ xiiñicaʼ nahuiiniʼ. Pur nga la? pa napuʼ neca ti iza de guyuunisaluʼ, ne napuʼ de 19 hasta 55 iza, ne nuuluʼ nazaaca, ne zineluʼ ti guendanabani nayá ne nuuluʼ galán ne Jiobá la? zanda gacaneluʼ biaʼ chupa semana si o hasta chonna beeu, runi inbitardu lii guchaluʼ ti guiʼchiʼ para chuʼluʼ lade tobi de ca grupú ca.

¹⁰ Sti modo zanda gacaneluʼ ora cuíʼ Yoo stiʼ Reinu nga chuʼluʼ listu para gacaneluʼ casi boluntariu guidxi ra nabezuʼ. Racá zanda gacaneluʼ ora maʼ gastiʼ cayúniluʼ. Pa zacá ni la? zanda gábiluʼ ni binnigola ni riganna ca binni ridagulisaaca o Grupu de Binnigola ni Ruuyaʼ Cuíʼ Yoo stiʼ Reinu (Comité Regional de Construcción) para gudiicaʼ lii ti Formulario sobre el trabajador voluntario en Salones del Reino (S-82-S). Dxandipeʼ zacaaluʼ stálepeʼ ndaayaʼ stiʼ Jiobá (Pro. 10:22).

¹¹ Ca stipa ni raca pur gúninu dxiiñaʼ tobi si la? huaníʼ cani galán de ni nácanu, ca testigu stiʼ Jiobá, ne ni huabeenduni nga rusisacani lá Dios stinu, Jiobá. Para iza 2004 naguíxhedu cuíʼ biaʼ xhonna gayuaa treinta Yoo stiʼ Reinu. Rihuinnidxíchica de que «riguixhe chaahui Dios irá cosa jneza —dede ne dxiiñaʼ de cuíʼ yoo stiʼ Reinu— para cani nadxii laa[be]» (Rom. 8:28).

[Epígrafe de la página 3]

117 202 261 254

2000 2001 2002 2003*

* Ne laaca gurí 187 yoo ne gucachaahuiʼ 253 yoo ni gucaná stiʼ ca bíchinu ne bizánanu.

[Blurb on page 4]

Cani runi dxiiñaʼ stiʼ ti Grupu ni Rucuí yoo stiʼ Reinu

[Box on page 4]

Ridge (Belise)

Texcoco (Estadu stiʼ Méjicu)

Tahmek (Yucatán)

León (Guanajuato)

Cani runi dxiiñaʼ stiʼ sti Grupu ni Rucuí Yoo stiʼ Reinu

[Epígrafe de la página 6]

NI NAGUÍXHECABE GACA PARA IZA 2004

• 330 Yoo stiʼ Reinu

• 7 Yoo stiʼ Reinu pur cada GRYR