Carta stiʼ Grupu ni Zaniruʼ
Bicheʼ ne bizánacaʼ:
«DIOS Bixhoze nu ne Señor Jesucristu cuʼ ndaaya laatu ne quixhe dxí ladxidóʼ to.» (1 Cor. 1:3.) ¡Pabiáʼ ndiʼ racaláʼdxidu guidxiña dxi ora guiráʼ cosa ni nabani uguu guendanaróʼ ni naquiiñeʼ icaa Jiobá! (Sal. 150:6.) Laga cabézadu dxi ni guizáʼ naroʼbaʼ ca la? cadi cusaanadidu de gucheechedu stiidxaʼ Reinu stiʼ Dios ne guyúbidu binni guni adorar Jiobá.
Guendarucheeche diidxaʼ riʼ nga ti dxiiñaʼ ni jma risaca ni napa Jiobá lu Guidxilayú riʼ yanna (Mar. 13:10). Cumu nánnadu de que Jiobá racaláʼdxipeʼ gaca dxiiñaʼ riʼ la? ruyúbidu laabe para gacanebe laadu gúnidu ni, ne purtiʼ nánnadu de que cudiibe lugar binni cueendú stale de ni bidiibe para ganda guiaxa donda stiʼ (Apo. 14:6, 7, 14, 15). Dxandíʼ, nuu tiru ridídidu ra nagana, peru ¡guizáʼ nga riéchedu purtiʼ «ma ucuaa[du] enda nandxóʼ ni [z]eeda de ibáʼ»! (Luc. 24:49.)
Riéchedu stale nga guseetedu guiráʼ ni maʼ biʼniʼ Jiobá ne ca xpinni lu dxiiñaʼ stiʼ iza gudiʼdiʼ ca. Ne stipa stiʼ espíritu santu la? ca testigu stiʼ Jiobá hualuiʼcaʼ ti guendarannaxhii cásica ni biluíʼ Cristu, ni qué rulabi guendaracananalaʼdxiʼ stiʼ binni guidxilayú, ne bisihuínnicabe ni lu guendaridagulisaa de chonna gubidxa ni gúpacabe. Beeu junio dede disiembre stiʼ iza 2003 que la? binni de jma de ti gayuaa guidxi guyecaʼ 32 guendaridagulisaa stiʼ stale guidxi roʼ (asamblea internacional) ni guca lu gaayuʼ continente. Lu ca guendaridagulisaa riʼ la? gudiʼdiʼ betelita ni rie sti guidxi, misioneru ne ni runi dxiiñaʼ gadxé gadxé guidxi (siervo internacional).
Lu ca guendaridagulisaa riʼ gucuaanu ti guiʼchiʼ ni láʼ Veamos “la buena tierra” ne libru Aprendamos del Gran Maestro. Laaca bieeteʼ de que ra guiluxe iza stiʼ dxiiñaʼ 2004 zuzulú zaquiiñeʼ libru ni maʼ gucachaahuiʼ para Scuela stiʼ ca Precursor. Ca bíchinu ne ca bizánanu ni maʼ guyecaʼ scuela riʼ maʼ xadxí la? zabigueta zaca inbitar caadxigá de laacabe para chécabe lade cani deruʼ cheʼ.
Xquíxepeʼ Jiobá ne pur ni rudii ca xpinni la? maʼ huabí stale Yoo stiʼ Reinu, dede ndaaniʼ ca guidxi ra qué gapapecabe bidxichi. Cumu caquiiñeʼ gaca jma libru ne stuudxi guiʼchiʼ la? stale de ca Betel ca carooba ca. Guiʼchiʼ ni láʼ ¡Biecheʼ de guendanabani ndaaniʼ Guidxilayú sin qué guiuu dxi gátiluʼ! maʼ nuuni lu 299 diidxaʼ ne maʼ biree 139 miyón de laani; libru El conocimiento que lleva a vida eterna la? maʼ biree jma de 93 miyón de laani lu 161 diidxaʼ, ne guiʼchiʼ ¿Qué exige Dios de nosotros? maʼ biree jma de 200 miyón de laani lu 267 diidxaʼ.
Nayecheʼ nuunenu ca 258.845 bíchinu ne bizánanu ni guyuunisa iza gudiʼdiʼ stiʼ dxiiñaʼ ca. Ra cayacanécabe lu dxiiñaʼ stiʼ Reinu stiʼ Dios la? racananalaʼdxiʼ Binidxabaʼ laacabe, peru laga cuxooñecabe lu neza ni nexhe nezalúcabe ca la? zacaacabe ndaayaʼ ne zulá Jiobá laacabe (Heb. 12:1, 2; Apo. 12:17). Lagannadxichi de que «Ni cayapa laatu riʼ la? qué zanda icá bacaandaʼ laa» (Sal. 121:3).
Textu stiʼ iza 2004, «Lagataná, [...] lagusihuinni de que nuutu listu», biáʼsipeʼ caquiiñeni ca dxi stinu riʼ (Mat. 24:42, 44). Casi modo na Stiidxaʼ Dios, laanu nuugásinu ndaaniʼ guidxilayú riʼ casi ni canazá xquidxi binni (1 Ped. 2:11; 4:7). Nga runi naquiiñeʼ icá íquenu gúninu xhiiñaʼ Jiobá, cadi guyúbinu guibáninu ne stale luju ne guʼyachaahuinu ximodo nuu ladxidoʼno, purtiʼ dragón roʼ ca nuu guxuuxe laanu ne guni laanu de guidxilayú ni qué iquiiñeʼ riʼ (Apo. 12:9).
Para ganda gatananu la? naquiiñeʼ gúʼndanu Biblia guiráʼ dxi, purtiʼ zacá zacaneni laanu, cani maʼ bidiinu laanu Jiobá, de que «ya» ni maʼ guninu ca la? gácani «ya», ne para cadi «ichaʼcha nu de ni runi cre nu, cásica bini cre nu dxi ucuaa nu stiidxa[be]» (Sant. 5:12; Heb. 3:14). Ra gúʼndanu Biblia guiráʼ dxi la? zusietenaláʼdxini laanu pabiáʼ zitu nuu binni guidxilayú de ca ley stiʼ Jiobá (Mal. 3:6; 2 Tim. 3:1, 13). Cani maʼ bizíʼdinu de lu Biblia la? zacané cani laanu gucaananu ni biree «de xiga ique si [binni]» ne para cadi gucheenenu Jiobá (2 Ped. 1:16; 3:11).
Cani napa xiiñiʼ, ñee cayacanetu laacabe quixhe íquecabe gápacabe xiixa guenda ne gatanácabe laga cusiniisitu laacabe modo na Jiobá la? (Efe. 6:4.) Ñee cusiiditu laacabe guiníʼ íquecabe xi gúnicabe despué casi biʼniʼ hombre ni jma nanna ni guyuu lu guidxilayú ri la? Jesús ñándaca ñaca ti carpinteru o ti doctor ni jma nanna, peru lugar de nga la? gulibe sanírube lu guendarucheeche diidxaʼ. Tílasi ejemplu stiʼ Jesús ca gucaani laatu gacanetu xiiñitu quixhe íquecaʼ de que primeru nga naquiiñeʼ gúnicaʼ xhiiñaʼ Reinu.
Grupu ni Zaniruʼ (Cuerpo Gobernante), cani riníʼ pur moso ni nuu xpiaaniʼ (esclavo fiel), rudiidu xquíxepeʼ ca binni ni chiguiaanaʼ lu guidxilayú riʼ pur racanecaʼ laadu gúnidu dxiiñaʼ ni biaananedu de «[gü]iʼ [du] stiidxa Dios de idubi naca guidxilayú para ganna irá xixé guidxi» (Apo. 7:9; Mat. 24:14, 45). Lagannadxíchica, bicheʼ ne bizánacaʼ, Jiobá «qué zusiaanda irá enda nachaʼhui ni huayuni tu ca xpinni purti nadxii tu laa. Huayacané tu laaca ne cayacané ru tu laaca dede yanna» (Heb. 6:10). Ora maʼ cayuundatu cani bizaaca ca testigu stiʼ Jiobá ni zeeda ndaaniʼ Anuario ne gúʼyatu cani guleendúcabe pur ca stipa bínicabe la? laguiníʼ ique de que laaca zeeda dxiiñaʼ stitu luni ne laaca risaca ni.
Lagudxiilú guiráʼ ni zeeda ca ne stale gana ne laguyadxí «ni chi udii Dios laa[nu]», ne cadi gudiitu lugar chuʼ tuuxa binni o demonio cuee laatu de laani (Heb. 11:26; Col. 2:18). Laguni cré Jiobá de guidubi ladxidoʼto, purtiʼ laabe dxandipeʼ zacanebe guiráʼ tu nadxii laabe para ugaandacaʼ guendanabani ni qué zaluxe (Juan 6:48-54).
Dxandipeʼ nga nayecheʼ cayúninedu laatu dxiiñaʼ para gusisácanu ne cuunu guendanaróʼ stiʼ Dios stinu, Jiobá.
Ca bíʼchitu,
Grupu ni Zaniruʼ stiʼ ca Testigu stiʼ Jiobá