Bisihuinni de que rudiiluʼ xquíxepeʼ Jiobá

¹ Nécaxa nabáninu lu ca dxi ni «jma nagana» riʼ la? nápanu stálepeʼ rasón para gudiʼnu xquíxepeʼ Jiobá (2 Tim. 3:1). Rasón ni jma naroʼbaʼ nápanu nga bidiibe Xiiñibe gati pur laanu (Juan 3:16). Ne stobi nga, nécaxa ca binni ni nuucaʼ lade ca relijión ni cadi dxandíʼ ca rindaanacabe gánnacabe de Stiidxaʼ Dios la? laanu nápanu stale guendaró ni cudii Jiobá laanu (Isa. 65:13). Nápanu bíchinu ne bizánanu lu guidubi naca Guidxilayú ne nápanu ti guenda de gusiidinu binni guni adorar Jiobá jneza ne rúninu ni ne stale guendanayecheʼ (Isa. 2:3, 4; 60:4-10, 22). Ximodo zanda gusihuínninu de que rudiʼnu xquíxepeʼ Jiobá pur ca ndaayaʼ ni rudiibe laanu ca yaʼ. (Col. 3:15, 17.)

² Ti dxiiñaʼ ni rúninu nayecheʼ ne de idubi ladxidoʼno. Ra bizeeteʼ apóstol Pablu de modo gudiʼnu cani risaca ni nápanu la? bicaabe sicaríʼ: «Nadxii Dios ni rudii ni laa de idubi ladxidóʼ» (2 Cor. 9:7). Laaca riquiiñeʼ chinándanu ca diidxaʼ riʼ ora gúninu xhiiñaʼ Dios, purtiʼ ra rusihuínninu de que rudiʼnu xquíxepeʼ Jiobá nga ora rúninu xhiiñabe ne guendanayecheʼ, ora riuunu ca guendaridagulisaa ca, ora guluinu de que riéchenu pur nápanu ni dxandíʼ ca, ne ora riucheechenu stiidxabe ne stale gana (Sal. 107:21, 22; 119:14; 122:1; Rom. 12:8, 11).

³ Lu Ley ni gupa guidxi Israel dxiqué la? qué nicá diʼ pabiaʼpeʼ nga naquiiñeʼ udiicabe Dios. Ca israelita que bisihuínnicaʼ de que rudiicaʼ xquíxepeʼ Jiobá la? ra bidiicabe laabe biaʼ ndaayaʼ bidiibe laacaʼ (Deu. 16:16, 17). Laaca zacaca ni yanna, guinabaʼ ladxidoʼno gudiʼnu xquíxepeʼ Jiobá, zucaani laanu gúninu biaʼ gándatiʼ lu dxiiñaʼ de guendarucheeche diidxaʼ ne acanenu binni chinanda Cristu. Ca beeu ra naroʼbaʼ raca ca dxi ca, ziuu stale modo gusihuínninu de que rudiʼnu xquíxepeʼ Jiobá. Stale de cani ricaa bacasión ra dxiiñaʼ o ra scuela, rúnicaʼ stipa pur gúnicaʼ jma hora lu guendarucheeche diidxaʼ, o laaca rácacabe precursor ausiliar. Ñee zanda gúniluʼ jma hora lu guendarucheeche diidxaʼ ca beeu zeeda riʼ la?

⁴ Cadi gusaananu de gudiʼnu xquíxepeʼ Jiobá. Orasión ca nga ni risaca ni nápanu para gudiʼnu xquíxepeʼ Jiobá (1 Tes. 5:17, 18). Biblia cayabi laanu de que cadi gusaananu de gudiʼnu xquíxepeʼ Jiobá (Col. 2:7). Nécapeʼ chuʼ xhiiñanu stale o tiidinu ra nagana, cadi guiaanadxinu de gudiʼnu xquíxepeʼ Jiobá ora guinínenu laabe guiráʼ dxi (Fili. 4:6). Zacá la? pur gucheechenu diidxaʼ ne ca orasión stinu, zanda gácanu ricu ne guiráʼ ni rúninu para gudiʼnu xquíxepeʼ Jiobá (2 Cor. 9:12).