Lagudii xquíxepeʼ Dios
1 Dxi bisianda Jesús chii hombre napa lepra que, tobi si de laacabe bibiguetaʼ para gudii xquíxepeʼ laabe. Ngue runi, Jesús gunabadiidxaʼ: «Ñee cadi chii cabe bianda la? Laga xcaʼ que yaʼ, uná laacaʼ» (Luc. 17:11-19). Historia ca culuíʼ laanu pabiáʼ naquiiñeʼ gusisácanu ne gudiʼnu xquíxepeʼ Jiobá Dios ni nadxii laanu pur «irá ni nachaʼhui ne irá ni dxandí sicarú» ni rudii laanu (Col. 3:15; Sant. 1:17).
2 Xi guiráʼ huayuni Dios pur laanu ne pur nga naquiiñeʼ gudiʼnu xquíxepeʼ laabe yaʼ. Jiobá bidii laanu ti cosa ni nabé risaca, biseendabe xiiñibe beeda gati pur binni guidxilayú (Juan 3:16); Jiobá laaca cuchiña laanu ra nuu (Juan 6:44); ne cayúnibe cani nuu ndaaniʼ xquídxibe tobi si (Sal. 133:1-3), ne nuuruʼ stale cosa ni maʼ biʼniʼ Jiobá pur laanu. Nabé triste nga pa gácanu casi ca israelita de dxiqué, purtiʼ laacaʼ bisiaandacaʼ ni biʼniʼ Jiobá pur laacaʼ (Sal. 106:13).
3 Naquiiñeʼ gusihuínninu rudiʼnu xquíxepeʼ Dios. Panda de ca binni napa lepra ni bisianda Jesús que biéchecaʼ pur ni bíʼnibe pur laacaʼ yaʼ. Guirácabe, peru tobi si de laacaʼ bidii xquíxepeʼ laabe (Luc. 17:15). Yanna laanu, laaca zanda gusihuínninu rudiʼnu xquíxepeʼ Dios ora gucheechenu diidxaʼ ne stale gana. Zusihuínninu dxandipeʼ rudiʼnu xquíxepeʼ Bixhózenu ni nuu guibáʼ pa gannaxhiinu binni ne guinínenu laacaʼ de laabe (Luc. 6:45). Ne ora guinínenu binni de guiráʼ cosa sicarú bizáʼ Dios ne modo riníʼ íquebe de laanu la? zacané ni laanu gannaxhiinu laabe jma ne ziale de ladxidoʼno gudiʼnu xquíxepeʼ laabe (Sal. 40:5).
4 Gacanenu xcaadxi binni gudii xquíxepeʼ Dios. Naquiiñeʼ chuʼnu listu para gacanenu ca xiiñinu ne cani cadúʼndanenu Biblia guiziidicaʼ gudiicaʼ xquíxepeʼ Dios. Cani napa xiiñiʼ la? zanda gacanecaʼ binnilídxicaʼ ora tiica si, casi ora maʼ cayuuyanecaʼ laacabe guiráʼ ni bizáʼ Jiobá (Rom. 1:20). Ora maʼ cadúʼndanenu binni de Biblia la? zanda gábinu laacaʼ: «Xi rusiidiʼ ndiʼ laanu de Jiobá yaʼ». Ora guiziidibe jma de Dios la? nga zacané laabe gannaxhiibe laa jma ne gusiéchebe laa.
5 Lu ca últimu dxi nabézanu riʼ, stale binni nga qué rudii xquíxepeʼ ora guni binni xiixa pur laa ne qué rusisaca diʼ ni napa (2 Tim. 3:1, 2). ¡Ora rucheeche ca xpinni Jiobá diidxaʼ ne stale gana la? rusihuínnicabe rudiicabe xquíxepeʼ laabe, ne nga nabé rusiecheʼ laabe! (Sant. 1:22-25.)