Gusihuínninu rudiʼnu xquíxepeʼ Dios Chiguietenaláʼdxinu guendaguti stiʼ Jesús 17 stiʼ abril
1. Xi biʼniʼ sentir ti hombre bicaa salmo, ne biáʼsipeʼ laani nga ni runi sentirnu tiempu rietenaláʼdxinu guendaguti stiʼ Cristu.
1 Ora biʼyaʼ ti hombre ni bicaa salmo guiráʼ modo rilaselaʼdxiʼ Jiobá binni ne modo rulá xquidxi, bicaani laa guiníʼ ca diidxaʼ riʼ: «Ximodo quixeʼ Jiobá pur guiráʼ ni galán biʼniʼ pur naa yaʼ» (Sal. 116:12). Ca dxi stinu riʼ, jma stale razón napa ca xpinni Jiobá para gudiicaʼ xquíxepeʼ laabe. Xiñee yaʼ. Purtiʼ gudiʼdiʼ si gayuaa iza de guníʼ Jiobá guicá ca diidxaʼ riʼ, bidiibe Xiiñibe para gulá binni. Ne laani nga ni jma risaca bisigaʼdeʼ Dios binni. Nga runi, zusihuínninu cudiʼnu xquíxepeʼ Jiobá ora chuʼnu listu para guietenaláʼdxinu guendaguti stiʼ Cristu 17 stiʼ abril (Col. 3:15).
2. Xi razón nápanu para gusisácanu ni biʼniʼ Dios pur laanu.
2 Ca ndaayaʼ nápanu pur bidii Dios Xiiñiʼ para gati pur laanu. Pur bidii Dios Xiiñiʼ para bilá laanu, zanda guixá «stonda nu» (Col. 1:13, 14). Ne ra guixá stóndanu zanda gúninu ni na Dios né ti guendabiaaniʼ nayá (Heb. 9:13, 14). Ne ora runi orarnu Dios, randa riuʼnu gaxha de laa (Heb. 4:14-16). Ca binni ni gusihuinni napa fe lu guendaguti stiʼ Jesús zanda gápacaʼ guendanabani ni qué zaluxe (Juan 3:16).
3. Ximodo zanda gusihuínninu cudiʼnu xquíxepeʼ Jiobá pur bidii Xiiñiʼ gati pur laanu.
3 Ximodo zanda gusihuínninu cudiʼnu xquíxepeʼ Dios. Ti modo zanda guluinu cudiʼnu xquíxepeʼ Dios pur ni biʼniʼ nga guidúʼndanu biaʼ nexheʼ guiuundaʼ Biblia ca dxi chiguietenaláʼdxinu guendaguti stiʼ Jesús ne guiníʼ íquenu ni guidúʼndanu. Lu revista Torre stiʼ ni rapa abril-junio 2011, zeeda ti tema ni láʼ: «Ñee maʼ nuuluʼ listu para dxi jma risaca stiʼ iza riʼ la?», laani gúcani para gacané ni laanu gúninu cani maʼ bizéʼtenu ca. Sti modo zanda gusihuínninu cudiʼnu xquíxepeʼ Jiobá pur bidii Xiiñiʼ gueeda gati pur laanu nga gábinu laabe lu oración ni gúninu pabiáʼ risaca para laanu ni bíʼnibe ca (1 Tes. 5:17, 18). Ne laaca zanda gusihuínninu cudiʼnu xquíxepeʼ Dios ora chuunu dxi guietenaláʼdxinu guendaguti stiʼ Jesús casi modo bisaanabe gácani (1 Cor. 11:24, 25). Sti modo zanda gusihuínninu nadxiinu binni cásica modo runi Jiobá ni nga ra guni invitarnu guiráʼ binni para checaʼ dxi ca (Isa. 55:1-3).
4. Xi naquiiñeʼ quixhe íquenu gúninu.
4 Ti xpinni Cristu ni rusihuinni rudii xquíxepeʼ Jiobá la? qué ruuyaʼ diʼ dxi ca casi tobi de ca guendaridagulisaa ni rapa ndaaniʼ semana. ¡Laani nga guendaridagulisaa jma risaca ni chigápanu iza riʼ! Ora jma maʼ zidxiña dxi guietenaláʼdxinu guendaguti stiʼ Jesús, zanda guni sentirnu ni biʼniʼ sentir salmista que ora guníʼ: «Bisisaca Jiobá, alma stinneʼ ne cadi gusiaandaluʼ guiráʼ ni maʼ bíʼnibe» (Sal. 103:2).