«Laguni casi cayuni nu riʼ» Zietenaláʼdxinu guendaguti stiʼ Cristu 5 stiʼ abril
1. Xiñee nabé risaca para laanu dxi rietenaláʼdxinu guendaguti stiʼ Cristu.
1 «Laguni casi cayuni nu riʼ para guietenaladxi tu naa.» (Luc. 22:19.) Ora guníʼ Jesús ca diidxaʼ riʼ gúdxibe ca discípulo stibe guietenaláʼdxicaʼ ni bíʼnibe ra bidiibe xquendanabánibe pur binni. Stale cosa galán nga ribeendú binni pur ni biʼniʼ Jesús, nga runi dxi rietenaláʼdxinu guendaguti stiʼ Cristu nga dxi jma risaca para ca xpínnibe, ne iza riʼ chigácani 5 stiʼ abril. Yanna, ximodo zanda gusihuínninu cudiʼnu xquíxepeʼ Jiobá pur ni biʼniʼ ca laga guidxiña dxi ca yaʼ (Col. 3:15).
2. Ximodo zanda gusihuínninu risaca para laanu dxi rietenaláʼdxinu guendaguti stiʼ Cristu.
2 Chuʼnu listu. Stale biaje, riuʼnu listu dede ante ora maʼ cabézanu guedandá dxi gaca xiixa risaca para laanu. Zacaca nga zanda gúninu laga guidxiña dxi guietenaláʼdxinu guendaguti stiʼ Cristu, galán gúʼndanenu binnilídxinu cani bizaaca Jesús ante gati ne guiníʼ íquenu de laacani para cuʼnu listu ladxidoʼno (Esd. 7:10). Lu calendariu stinu ne zaqueca lu folletu Guidúʼndanu Stiidxaʼ Dios guiráʼ dxi zeeda ti lista ra cá ca versículo ni cusiene cani bizaaca Jesús. Ne lu revista Torre stiʼ ni rapa abril-junio 2011 (yaza 23 ne 24) zeeda ti lista jma ziuulaʼ ra cá xi capítulo stiʼ libru El hombre más grande zanda gúʼndaluʼ.
3. Xi sti modo zanda gusihuínninu risaca para laanu dxi rietenaláʼdxinu guendaguti stiʼ Cristu.
3 Gucheechenu diidxaʼ. Sti modo zanda gusihuínninu risaca para laanu dxi rietenaláʼdxinu guendaguti stiʼ Cristu nga gucheechenu diidxaʼ biaʼ gándatiʼ (Luc. 6:45). Dede sábadu 17 stiʼ marzo zuzulú ziaaziʼ ti invitación lu guidubi naca Guidxilayú para cheʼ binni dxi rietenaláʼdxinu guendaguti stiʼ Cristu. Ñee zanda quixhe chaahuiluʼ tiempu stiluʼ ti ganda gucheecheluʼ diidxaʼ jma ca dxi ca, o dede gácaluʼ precursor auxiliar la? Xiñee qué guzeeteluʼ ni lú ca binnilídxiluʼ ora guni adorartu Dios.
4. Xi ribeendunu ora riuunu ra rietenaláʼdxinu guendaguti stiʼ Cristu.
4 ¡Stale cosa nga ribeendunu ora riuunu ra rietenaláʼdxinu guendaguti stiʼ Cristu guiráʼ iza! Ora guiníʼ íquenu pabiáʼ nachaʼhuiʼ guca Jiobá ra bidii tobi lucha Xiiñiʼ gati pur binni, riguuni gana laanu ne rucaani laanu gannaxhiinu laabe jma (Juan 3:16; 1 Juan 4:9, 10). Ne racaneni laanu para cadi gucáʼ íquenu guibáninu para laasinu (2 Cor. 5:14, 15). Ne laaca rucaani laanu gusisácanu Jiobá nezalú binni (Sal. 102:19-21). Cumu nabé rudiʼnu xquíxepeʼ Jiobá la? maʼ racaláʼdxinu guedandá dxi guininu «guti Cristu pur laa[nu]», ne zúninu ni 5 stiʼ abril (1 Cor. 11:26).