«Laguni casi cayuni nu riʼ para guietenaladxi tu naa»
Zietenaláʼdxinu guendaguti stiʼ Jesús lunes 2 stiʼ abril
1. Xiñee nabé risaca para laanu lunes 2 stiʼ abril 2007.
1 Lu guidubi naca guidxilayú zadagulisaa millón de binni para guietenaláʼdxicaʼ guendaguti stiʼ Jesús, ne zácani lunes 2 stiʼ abril 2007. Ra guti Jesús bisihuinni dxandíʼ napa Dios derechu guni mandar. Laaca bisihuinni Jesús cadi dxandíʼ diʼ ni guníʼ Binidxabaʼ ora na runi binni ni na Dios pur guiráʼ ni ricaacaʼ (Job 2:1-5). Guendaroxhi stiʼ Señor riʼ laaca rusietenalaʼdxiʼ ni laanu bidii Jesús cuerpu sin donda stiʼ para gulá stale binni (Mat. 20:28). Nga runi, gúdxibe ca discípulo stibe ca diidxaʼ riʼ: «Laguni casi cayuni nu riʼ para guietenaladxi tu naa» (Luc. 22:19). Cumu nayecheʼ nuunu pur bisihuinni Dios nadxii laanu, ñee maʼ cayuʼnu listu para guietenaláʼdxinu guendaguti stiʼ Xiiñibe la? (Juan 3:16.)
2. Ximodo zanda gánnanu xi bizaaca Jesús ante gati.
2 Guiníʼ íquenu xi bizaaca Jesús ora maʼ cayúʼndanu Biblia. Xhoopaʼ gubidxa ante guietenaláʼdxinu guendaguti stiʼ Jesús, zadúʼndanu lu Biblia xi bizaaca ante gátibe ne dxi gútibe (Esd. 7:10). Lu Calendario de los testigos de Jehová 2007 ne lu Examinando las Escrituras diariamente 2007 zadxélanu ca textu ra caníʼ xi bizaacabe. Ca textu ni guidúʼndanu ca cayabi cani laanu ni bizaaca ante gati Jesús ne ni bizaaca dxi gútibe, casi modo rugábanu ca dxi stinu. Ne zacani purtiʼ ca hombre ni bicaa Biblia biquiiñecaʼ calendariu stiʼ ca judíu. Laacabe rugábacabe dxi stícabe ora riaaziʼ Gubidxa ne rilúxeni dede sti dxi ora guiaaziʼ Gubidxa. Ne zacá nga gudíxhecabe ni ndaaniʼ Biblia para gánnanu xi bíʼnibe huadxí ne ni bíʼnibe siadóʼ ante gúnibe Guendaroxhi stiʼ Señor. Pa gúʼndanu ni ne guiníʼ ique chaahuinu ne oración pabiáʼ nadxii Dios laanu la? zacané nga laanu guizíʼdinu jma de guendaguti stiʼ Jesús.
3. Ximodo zanda gacanenu cani guyé ra bietenaláʼdxinu guendaguti stiʼ Jesús, ne cani maʼ bisaana de guidagulisaané laanu para guiziidicaʼ jma.
3 Guni invitarnu xcaadxi binni cheʼ. Lu ni rizaané Xhiiñaʼ Reinu stiʼ febrero bieeteʼ zápanu ti dxiiñaʼ nabé risaca para guni invitarnu binni checaʼ guendaridagulisaa riʼ. Ñee maʼ guníʼ íqueluʼ ximodo zanda gúniluʼ dxiiñaʼ riʼ la? Ñee maʼ nápaluʼ ti lista ra cá tu guiráʼ racaláʼdxiluʼ guni invitarluʼ la? Ñee maʼ guníʼneluʼ laacabe la? Biiyaʼ ximodo ganda chuʼluʼ tempranu gueelaʼ ca ra chiguidagulisaatu para guidxaagaluluʼ cani biʼniʼ invitarluʼ, ne xcaadxi binni ni cheʼ. Zanda cuineluʼ laacabe ne pa qué gápacabe ti Biblia o ti libru ra cá diidxaʼ riuundaʼ, zanda gudiiluʼ laacabe tobi. Yené laacabe gunibiáʼcabe xcaadxi bíʼchinu ne bizáʼnanu ni ridagulisaanenu. Guiluxe si guendaridagulisaa ca gulee tiempu para guicábiluʼ ni guinabadiidxacabe lii. Biʼniʼ invitar laacabe libana ni bibí ni chitiidiʼ domingu 15 stiʼ abril. Ca binnigola zudiicaʼ ti invitación cani maʼ bisaana de cheʼ guendaridagulisaa ti ganda checaʼ ne guietenaláʼdxinecaʼ laanu guendaguti stiʼ Jesús ne chigucaadiágacaʼ libana ni bibí ca.
4. Tiidiʼ si dxi guietenaláʼdxinu guendaguti stiʼ Jesús, ximodo zanda gacanenu binni ti guiziidicaʼ jma.
4 Gucané cani nacubi guyé ne cani maʼ qué rié ra ridagulisaanu guiniisicaʼ lu Stiidxaʼ Dios. Binnigola ni chigudii libana ra chiguietenaláʼdxinu guendaguti stiʼ Jesús ca la? zaniʼbe rusíʼdinu binni de Biblia dede ra lidxi ne qué riáxanu. Ne zábibe cani nacubi guyé cadi gusaanacaʼ de guiziidicaʼ jma de Jiobá. Zanda iquiiñeluʼ ca diidxaʼ ni guiníʼ binnigola ca para gacaneluʼ cani biʼniʼ invitarluʼ guiziidicaʼ jma. Pa guirutiʼ cayuundané laacabe Biblia yanna la? yeganna laacabe tiidiʼ si guendaridagulisaa ca ne biluíʼ laacabe ximodo rúʼndanenu binni sin quixe. Para guiziidicabe jma ne gápacabe fe Dios la? laaca naquiiñeʼ guidagulisaanécabe laanu (Heb. 10:24, 25). Nga runi, guluu gana laacabe cadi guiaadxacabe ca guendaridagulisaa ca. Ca binnigola naquiiñeʼ chigánnacaʼ cani maʼ qué ridagulisaané laanu ni guyé ra bietenaláʼdxinu guendaguti stiʼ Jesús, ti gacanécabe laacaʼ guiníʼ íquecaʼ de cani bieeteʼ lu libana ca para guidagulisaanecaʼ laanu sti biaje.
5. Xi zucaa guendaguti stiʼ Jesús laanu gúninu.
5 Guendaguti stiʼ Jesús riʼ racaneni laanu guiníʼ íquenu ni biʼniʼ Jiobá ne Jesús pur laanu. Ne ra guiníʼ íquenu ni bíʼnicabe pur laanu zannaxhiinu laacabe jma ne zusihuínninu ni lu guiráʼ ni gúninu (2 Cor. 5:14, 15; 1 Juan 4:11). Yanna nga maʼ naquiiñeʼ chuʼnu listu ne gacanenu cani riuulaʼdxiʼ cheʼ ra chiguietenaláʼdxinu guendaguti stiʼ Jesús purtiʼ ti dxi nabé risaca ni (1 Cor. 11:26).