Acanenu binni ti cueenducaʼ xiixa pur ni bisigaʼdeʼ Dios
Zietenaláʼdxinu guendaguti stiʼ Cristu 12 stiʼ abril
1. Guníʼ ximodo zanda usihuínninu rudiʼnu xquíxepeʼ Dios pur bidii Xiiñiʼ para gulá laanu.
1 Xquíxepeʼ Dios purtiʼ «qué zanda idxela nu diidxa para iní nu pabiáʼ sicarú ni biʼni be pur laanu» (2 Cor. 9:15). Ca diidxaʼ riʼ rusihuinni cani pabiáʼ galán nga runi sentirnu pur guca Dios nachaʼhuiʼ ne xquidxi ra bidiibe Xiiñibe Jesucristu guti pur laanu. Zanda usihuínninu cudiʼnu xquíxepeʼ Dios pur ni bíʼnibe ca ra chuunu ne guietenaláʼdxinu endaguti stiʼ Cristu ni chigaca 12 stiʼ abril.
2. Cadi ca xpinni si Jiobá nga riecaʼ ra rietenaláʼdxinu endaguti stiʼ Cristu, tu laaruʼ ndiʼ rié, ne ximodo cueendúcabe xiixa pur endaguti ca yaʼ.
2 Cadi ca xpinni si Jiobá nga riecaʼ ra rietenaláʼdxinu endaguti stiʼ Cristu. Nuu chii millón de binni ni cadi naca Testigu laaca riecaʼ iráʼ iza ne zacá rusihuínnicabe cudiicabe xquíxepeʼ Dios pur endaguti stiʼ Cristu. Peru para cueendúcabe xiixa pur endaguti ca la? naquiiñeʼ usihuínnicabe nápacabe fe luni (Juan 3:16, 36). Ximodo zanda acanenu laacabe gápacabe fe ca yaʼ. Casi yanna riʼ, mayaca guietenaláʼdxinu endaguti stiʼ Cristu, zanda acanenu ca binni ca ra gúʼndanenu laacaʼ Biblia ne gábinu laacabe chécabe ca endaridagulisaa rápanu iráʼ semana. Chiguzeetenu chupa chonna modo zanda gúninu cani.
3. Ximodo uzulú gúʼndanenu binni Biblia ora guni invitarnu laacabe guietenaláʼdxicabe endaguti stiʼ Cristu yaʼ.
3 Gúʼndanenu binni Biblia. Ora guni invitarluʼ tuuxa binni ra guietenaláʼdxinu endaguti stiʼ Cristu, biiyaʼ ximodo uzulú gúʼndaneluʼ laabe Biblia ne libru Xipeʼ ndiʼ cusiidiʼ Biblia, ne gudxi laabe ximodo raca endaridagulisaa riʼ, biquiiñeʼ ndaa ra na «Guendaroxhi stiʼ Señor rusisácani Dios» (yaza 206-208). Zándaca gúʼndaneluʼ ni binni ca tobi o chupa biaje si ra puertaʼ lidxi. Ora iluxe gúʼndatu ndaa ca, zándaca binni ca iníʼ gúʼndaneluʼ laa capítulo 5, ni láʼ «Bilanu pur rini bixhii Jesús: ni jma naroʼbaʼ bisigaʼdeʼ Dios laanu». Ora maʼ ruundaneluʼ laabe Biblia biindané laabe ca primé tapa capítulo stiʼ libru ca.
4. Tu iráʼ ndiʼ zanda uzulú gúʼndanenu Biblia ora mayaca guietenaláʼdxinu endaguti stiʼ Cristu yaʼ.
4 Tu iráʼ ndiʼ zanda gúʼndanenu Biblia ora guni invitarnu laacaʼ checaʼ ra guietenaláʼdxinu endaguti stiʼ Cristu yaʼ. Cani runinenu dxiiñaʼ, cani rinenu scuela o ca xpesínunu zándaca chuláʼdxicaʼ inínenu laacaʼ de ca tema riʼ. Ca bíchinu ni rucheeche diidxaʼ zanda iniʼnécabe xheelaʼ ca bizánanu ni cadi naca Testigu, ne cadi guiaandaʼ gábinu ca binnilídxinu ni cadi naca Testigu pa zuundanenu laacaʼ Biblia. Ne cani jmapeʼ naquiiñeʼ guni invitarnu para guietenaláʼdxine laanu endaguti stiʼ Cristu nga cani bicheechenecaʼ laanu diidxaʼ dxiqué (Luc. 15:3-7). Uyúbinu ximodo acanenu iráʼ binni riʼ para cueendúcabe xiixa lu ni bisigaʼdeʼ Dios laanu.
5. Ximodo zanda uguʼnu gana cani rúʼndanenu Biblia ti checaʼ ca endaridagulisaa rápanu iráʼ semana yaʼ.
5 Ca endaridagulisaa ni rápanu. Ra rietenaláʼdxinu endaguti stiʼ Cristu nga primé endaridagulisaa ni rié cani deruʼ cayúʼndanenu Biblia ne xcaadxi binni ni riuulaʼdxiʼ ganna xiná Biblia. Ximodo zanda acanenu laacabe chécabe stuudxi endaridagulisaa ni rápanu yaʼ. Xhiiñaʼ Reinu ni Rúninu stiʼ abril 2005 lu yaza 8 caníʼ ximodo zanda gúninu ni: «Bizeeteʼ xi láʼ libana ni chitiidiʼ lu sti Guendaridagulisaa ni raca para guiráʼ binni [discurso público]. Biluíʼ laacabe xi chiguiuundaʼ lu La Atalaya ne xi chiguiuundaʼ ra rié Grupuhuiiniʼ ni Ruundaʼ Libru stiʼ ca Binni Ridagulisaa. Bisiene ximodo raca Scuela stiʼ cani Rucheeche Diidxaʼ ne Guendaridagulisaa stiʼ Dxiiñaʼ Stinu. Zanda gúʼndaneluʼ laacabe libana ni chigutiidiluʼ ra Scuela stiʼ cani Rucheeche Diidxaʼ. Uniʼné laacabe de cani jma naquiiñeʼ iziidicabe ni bieeteʼ ra ridagulisaanu. Biquiiñeʼ ca dibuju ni cá lu ca libru o lu ca revista ca ti gánnacabe ximodo raca cani. Biʼniʼ invitar laacabe chécabe ca endaridagulisaa stinu primé ca biaje chigannuʼ laacabe».
6. Xi chupa modo zanda acanenu ca binni ni guiale de ladxidoʼcaʼ cueenducaʼ xiixa lu endaguti stiʼ Cristu yaʼ.
6 Ora ca binni ca guiale de laacabe iziidicabe de Biblia ne chécabe ca endaridagulisaa rápanu ca la? jma nagueenda zaziidicabe de Stiidxaʼ Dios. Pur nga runi riquiiñeʼ acanenu laacabe cueendúcabe ni galán lu ca ni bizeetenu riʼ ne zacá zacané ni bisigaʼdeʼ Dios ca laacabe, ne laani nga: endaguti stiʼ Cristu.