Chuʼnu nayecheʼ laga cayuʼnu listu para guietenaláʼdxinu guendaguti stiʼ Cristu
1. Xi runi sentirnu ora rietenaláʼdxinu guendaguti stiʼ Cristu.
1 Iza riʼ zietenaláʼdxinu guendaguti stiʼ Cristu martes 26 stiʼ marzo. Nabé nayecheʼ riuunu ora gaca guendaridagulisaa riʼ purtiʼ rusietenalaʼdxiʼ ni laanu bidii Dios Xiiñiʼ para gulá laanu (Is. 61:10). Peru pa chuʼnu nayecheʼ dede yanna la? zacaneni laanu chuʼnu listu dxi ca. Guidúʼyanu xiñee.
2. Xi zacané laanu gúninu ca dxiiñaʼ ni naquiiñeʼ gaca dxi guietenaláʼdxinu guendaguti stiʼ Cristu.
2 Cuʼnu listu guiráʼ ni chiguiquiiñeʼ dxi ca. Neca qué riquiiñenu stale cosa ora rúninu Guendaroxhi stiʼ Señor, peru nabé risaca ni para laanu. Yanna, cumu qué racaláʼdxinu guiaadxaʼ gastiʼ dxi ca la? naquiiñeʼ cuʼnu cani listu dede yanna (Prov. 21:5). Naquiiñeʼ quíxhenu paraa chigácani ne pora guzuluni, guidúʼyanu guiá lugar ra chigácani ante guzuluni ne gápanu pan ne vinu ni rinábacabe laanu iquiiñenu dxi ca. Ni gutiidiʼ libana ca naquiiñeʼ chuʼ listu dede ante. Cani chigucuí binni ne cani gutiidiʼ pan ne vinu naquiiñeʼ gánnacaʼ dede ante ximodo gúnicaʼ dxiiñaʼ sticaʼ. Nánnanu maʼ nexheʼ chaahuiʼ guiráʼ ni chigaca dxi ca. Peru xi zacané laanu gúninu ca dxiiñaʼ ca para dxi nabé risaca riʼ yaʼ. Ni zacané laanu nga chuʼnu nayecheʼ pur bidii Jesús xquendanabani para gulá laanu (1 Ped. 1:8, 9).
3. Ximodo naquiiñeʼ uguʼnu listu ladxidoʼno para Guendaroxhi stiʼ Señor.
3 Cuʼnu listu ladxidoʼno. Laaca naquiiñeʼ cuʼnu listu ladxidoʼno (Esd. 7:10). Pa gúninu zacá, ziene chaahuinu pabiáʼ risaca dxi ca para laanu. Nga runi naquiiñeʼ cueenu tiempu para gúʼndanu biaʼ nexheʼ guiuundaʼ lu Biblia para Guendaroxhi stiʼ Señor, ne guiníʼ íquenu cani biʼniʼ Jesús lu Guidxilayú dxi mayaca gati. Ne ra guidúʼyanu guiráʼ ni biʼniʼ Cristu pur binni, zacané cani laanu chinándanu ejemplu stibe (Gál. 2:20).
4. Lade guiráʼ ndaayaʼ ni nápanu pur bidii Jesús xquendanabani pur bilá laanu, gunáʼ ni jma rusiecheʼ lii.
4 Ra bidii Jesús xquendanabani para gulá binni, bisihuínnibe Jiobá si napa derechu guni mandar guibáʼ ne guidxilayú, bilabe laanu lu náʼ guendaruchee ne guendaguti, ne pur nga zanda chuʼnu gaxha de Dios ne zanda gápanu ti guendanabani ni qué zaluxe (Col. 1:21, 22, 1 Juan 2:2). Ora guiníʼ íquenu ni biʼniʼ Cristu pur binni, racaneni laanu gúninu ni bidii stiidxanu Jiobá, ora gúdxinu laabe zúninu ni nabe biaʼ dxi guibáninu ne chinándanu ejemplu stiʼ Cristu (Mat. 16:24). Nanna dxíchinu pa chuʼnu listu para dxi guietenaláʼdxinu guendaguti stiʼ Cristu ne cadi guiáʼdxanu dxi ca la? nabé nayecheʼ ziuu ladxidoʼno.