Gusihuínninu nuunu nayecheʼ purtiʼ bilá Jesús laanu
1, 2. Ximodo zanda gusihuínninu nuunu nayecheʼ purtiʼ guti Jesús pur laanu.
1 Jesús guníʼ naquiiñeʼ guietenaláʼdxinu guendaguti stiʼ. Nga runi, guiráʼ ca xpinni Dios ni nuu lu guidubi naca guidxilayú zietenaláʼdxicaʼ guendaguti stibe sábadu 22 stiʼ marzo 2008, guiaaziʼ si Gubidxa (Luc. 22:19; 1 Cor. 11:23-26). Zadagulisaanu purtiʼ zacá zusihuínninu nuunu nayecheʼ pur bilá Jesús laanu ra bidii xquendanabani raca 1,975 iza. Dxi bicaacabe laabe lu ti yaga ne biiticabe laabe, qué liica nucheenebe Dios ne zaqué bisisácabe lá Bixhózebe ne bisihuínnibe rusiguii Binidxabaʼ (Job 1:11; Pro. 27:11).
2 Rini bixhii Jesús ra guti que bisihuínnini zadxiña dxi guni pactu cubi que dxiiñaʼ ne pur pactu riʼ caadxi binni ruchee beeda gácacaʼ xiiñiʼ Dios ne zuni mandárnecaʼ Cristu dede guibáʼ lu Reinu stiʼ (Jer. 31:31-34; Mar. 14:24). Ra guti Jesús la? Jiobá laaca bisihuinni guizáʼ nadxii binni guidxilayú, casi modo bisiene Jesús ni Nicodemo (Juan 3:16).
3. Xi zabeendú cani cheʼ ra chiguietenaláʼdxinu guendaguti stiʼ Jesús.
3 Guni invitarnu xcaadxi binni. Lu Xhiiñaʼ Reinu ni Rúninu stiʼ beeu enero, bieeteʼ jma galán gucaʼnu lá ca binni ni runibiaʼnu ni rábinu chiguni invitarnu. Ñee maʼ bizulú cayuni invitarluʼ laacabe la? Zuzulunu guni invitarnu binni 1 stiʼ marzo para cheʼ ra chiguietenaláʼdxinu guendaguti stiʼ Jesús. Ñee maʼ gulaʼquiʼ chaahuiluʼ tiempu stiluʼ para chiguni invitarluʼ binni ca dxi riʼ la? Cadi guiaandaʼ laanu, guiráʼ ni guieeteʼ lu guendaridagulisaa ca zanda gacaneni iguidxi fe stiʼ guiráʼ cani gucaadiaga libana ca ne gacaneni laacaʼ ugaandacaʼ guendanabani ni qué zaluxe (Rom. 10:17).
4. Xiñee galán nga chindanu tempranu ra chiguietenaláʼdxinu guendaguti stiʼ Jesús.
4 Pa ganda la? galán gúninu stipa pur chindanu tempranu ti guidxaagalunu ca binni biʼniʼ invitarnu. Nabé stale binni nga rié ora rietenaláʼdxinu guendaguti stiʼ Jesús, nga runi naquiiñeʼ guyúbinu modo gacanenu cani nacubi zeʼ ne cani nuu tiru rié ca guendaridagulisaa ni rápanu.
5. Xi naquiiñeʼ gúninu ante guietenaláʼdxinu guendaguti stiʼ Jesús.
5 Guiníʼ íquenu xi bizaaca Jesús ora maʼ cayúʼndanu Biblia. Lu folletu Guidúʼndanu Stiidxaʼ Dios guiráʼ dxi 2008 ne lu Calendario 2008 zeeda caadxi textu ni caníʼ xi bizaacabe, zuzulú ziuundaʼ cani 17 stiʼ marzo. Ca textu ni guidúʼndanu ca zacané cani laanu guietenaláʼdxinu ni bizaaca Jesús lu guidxilayú riʼ ante gati. Pa gúʼndanu cani ne gúninu oración la? zacané cani laanu chuʼnu listu dxi guietenaláʼdxinu guendaguti stiʼ Jesús, ne zacá zudiʼnu xquíxepeʼ Jiobá ne Jesús pur gunnaxhiicaʼ laanu ra bilacaʼ laanu (Esd. 7:10; Sal. 143:5).
6. Xi zabeendunu ra guietenaláʼdxinu modo bilá Jiobá ne Jesús laanu.
6 Yanna, ra maʼ zeeda guidxiña dxi guietenaláʼdxinu guendaguti stiʼ Jesús caquiiñeʼ chuʼnu listu ne gacanenu xcaadxi binni para cadi guiaadxacaʼ dxi ca. Zusihuínninu nuunu nayecheʼ pa chuunu ra chiguietenaláʼdxinu guendaguti stiʼ Jesús ca, ne laaca zacaneni laanu chuʼnu gaxha de Jiobá ne de Xiiñibe (2 Cor. 5:14, 15). Laaca zucaani laanu gannaxhiinu xcaadxi binni cásica gunnaxhii Jiobá ne Jesús laanu (1 Juan 4:11).