Zaguíʼzinu ti invitación lu guidubi Guidxilayú para cheʼ binni dxi guietenaláʼdxinu guendaguti stiʼ Jesús
1. Xi chigaca lu guidubi Guidxilayú ante guietenaláʼdxinu guendaguti stiʼ Cristu.
1 «Laguni casi cayuni nu riʼ para guietenaladxi tu naa.» (Luc. 22:19.) Cumu runi adorarnu Jiobá ne rápanu gana gúninu ni biʼniʼ mandar Jesús riʼ la? nga runi zietenaláʼdxinu guendaguti stiʼ Cristu 30 stiʼ marzo 2010 ne zuni invitarnu binni para chuʼné laanu gueelaʼ ca. Peru ante gácani zaguíʼzinu ti invitación lu guidubi Guidxilayú, ne zácani dede 13 hasta 30 stiʼ marzo.
2. Ximodo zanda gusaananu invitación riʼ.
2 Ximodo gácani. Bidii ti invitación binni ca para guʼyaʼ dibuju ni cá lu primé yaza stini de racá guníʼ: «Gueelaʼ 30 stiʼ marzo, zadagulisaanedu millón de binni lu guidubi naca Guidxilayú para guietenaláʼdxidu guendaguti stiʼ Jesús. Ndiʼ nga invitación para cheluʼ ne para cheʼ ca binnilídxiluʼ. Ca xhamíguluʼ laaca zanda checaʼ. Raríʼ ca paraa ne pora chigácani [biluíʼ laabe ra cá ni]». Pa ganda la? biindané laabe Lucas 22:19 lu Biblia para guluiʼluʼ laabe ni biʼniʼ mandar Jesús gaca. Peru cadi guiaandaʼ lii huaxiéʼ tiempu nápanu para guni invitarnu binni, nga runi cadi guindaaluʼ stale.
3. Tuu nga cani zanda guni invitarnu.
3 Pa xiroobaʼ neza ra rucheechetu diidxaʼ la? zándaca dede dxi guzulú guiaaziʼ ca invitación ca quixhe ca binnigola gusaanatu cani ralidxi binni neca qué guínnicaʼ. Ora gusaananeluʼ binni ca revista ca laaca zanda gudiiluʼ laabe ti invitación. Cadi guiaandaʼ lii guni invitarluʼ ca binni ni rigánnaluʼ, cani ruundaneluʼ Biblia, cani runineluʼ dxiiñaʼ, cani rineluʼ scuela, ca binnilídxiluʼ, ca vecinu stiluʼ ne xcaadxi binni ni runibiaʼluʼ.
4. Xi zúninu pa rudiʼnu xquíxepeʼ Jiobá pur nadxii laanu.
4 Guyuu listu para guʼnuʼ jma lu dxiiñaʼ riʼ. Tiempu rietenaláʼdxinu guendaguti stiʼ Cristu ca nga zanda gucheechenu diidxaʼ jma. Ñee zanda quixhe chaahuiluʼ tiempu stiluʼ para gácaluʼ precursor auxiliar la? Ñee maʼ caniisi ca xiiñiluʼ o cani ruundaneluʼ Biblia lu stiidxaʼ Dios la? Pa zacá ni la? guniʼné ca binnigola para gúʼyacaʼ pa zanda gácacabe ni rucheeche diidxaʼ ni caʼruʼ chúʼnisa ne guninécabe laanu dxiiñaʼ riʼ. Cumu nadxiinu Jiobá ne rudiʼnu xquíxepeʼ laabe pur biseendabe tu gulá laanu la? zietenaláʼdxinu guendaguti stiʼ Xiiñibe, ne zuni invitarnu stale binni para checaʼ dxi ca (Juan 3:16).