Guni invitarnu binni ché ra chiguietenaláʼdxinu guendaguti stiʼ Jesús
1. Xi zuni guiráʼ cani rucheeche stiidxaʼ Reinu lu guidubi naca Guidxilayú 21 stiʼ marzo ne xiñee.
1 Jueves 9 stiʼ abril 2009 zadagulisaa guiráʼ ca xpinni Jiobá ni nuu lu guidubi naca Guidxilayú para guiníʼ íquecaʼ ni biʼniʼ Dios ra bisihuinni pabiáʼ nadxii binni (Rom. 5:6-8). Ribézanu ché stale binni ni riuulaʼdxiʼ guiziidiʼ ra chiguietenaláʼdxinu guendaguti stiʼ Jesús, nga runi zuzulú zaguíʼzinu ti guiʼchiʼ para laani 21 stiʼ marzo.
2. Xi naquiiñeʼ gúninu ora guni invitarnu binni.
2 Cani zanda guʼnuʼ. Biquiiñeʼ ca dibuju, ca guendarinabadiidxaʼ ne ca textu ni cá lu invitación ca. Zanda guluiʼluʼ laabe invitación ca ne guiniʼluʼ: «Zedasaanaʼ guiʼchiʼ riʼ dede ra nuuluʼ para cheluʼ dxi guietenaláʼdxidu guendaguti stiʼ Cristu, chigácani jueves 9 stiʼ abril 2009». De racá biindaʼ xi lá guiʼchiʼ ca ne ca guendarinabadiidxaʼ zeeda luni. Gudxi laabe ziéchenu gúʼyanu laabe ne binnilídxibe ne sti binni ni chinebe.
3. Xi zanda gúninu ora maʼ bisaananenu invitación riʼ binni.
3 Pa xiroobaʼ ra rucheechetu diidxaʼ la? zándaca guiníʼ ca binnigola gusaanatu ti guiʼchiʼ ca yoo ra guirutiʼ guinni. Ca sábadu ne ca domingu ca zusaananu ca revista ca ne ti invitación. Gudixhe ique guni invitarluʼ ca binni ni rigánnaluʼ, cani ruundaneluʼ, ca binnilídxiluʼ, cani rineluʼ scuela, cani runineluʼ dxiiñaʼ, ca xpesínuluʼ ne guiráʼ tu runibiaʼluʼ. Iza gudídinu ca biʼniʼ invitar ti gunaa Testigu treinta de ca binnilidxi ne bisietenaláʼdxibe laacaʼ gatigá pabiáʼ nga risaca checaʼ. ¡Guizáʼ biéchebe ora bíʼyabe guyé veinticinco de laacaʼ! Tapa de cani guyé que bizulú biindanécabe laacaʼ de cani zeeda lu Biblia.
4. Xi naquiiñeʼ quixhe íquenu gúninu dede ca yanna ne xiñee.
4 Gudixhe xi gúniluʼ dede ca yanna. Stale de cani rucheeche diidxaʼ zanda gúnicaʼ jma dxiiñaʼ lu beeu marzo ne abril. Pa tobi de ca xiiñiluʼ o cani ruundaneluʼ maʼ caniisi lu stiidxaʼ Dios la? yánnapeʼ nga jma galán gácabe ti ni rucheeche diidxaʼ ni caʼruʼ chúʼnisa. Nabé galán quixhe íquenu xi gúninu dede ca yanna para guni invitarnu binni ché dxi chiguietenaláʼdxinu pabiáʼ nadxii Jiobá ne Jesús laanu (Juan 3:16; 15:13).