Zuzulú guni invitarnu binni 2 stiʼ abril para cheʼ dxi chiguietenaláʼdxinu guendaguti stiʼ Jesús
1. Padxí chiguzulú quíʼzinu invitación para cheʼ binni dxi chiguietenaláʼdxinu guendaguti stiʼ Cristu iza riʼ. Xi ribeendunu ra riguíʼzinu ca invitación casi laani.
1 Dede 2 hasta 17 stiʼ abril zuni invitarnu guiráʼ binni ni nabeza neza ra rucheechenu diidxaʼ para checaʼ guendaridagulisaa jma risaca ni rápanu lu iza, laani nga: dxi rietenaláʼdxinu guendaguti stiʼ Cristu. Lu ca iza ni maʼ gudiʼdiʼ ca, stale binni ni runi invitarnu ridagulisaanecaʼ laanu dxi riʼ. Guzéʼtenu ni bizaaca ti gunaa, laabe guniʼbe Betel dxi chiguietenaláʼdxinu guendaguti stiʼ Jesús ne nabe: «Casi bedandayaʼ ralidxeʼ biiyaʼ ti invitación ni bisaanacabe xaʼnaʼ puertaʼ stinneʼ. Napaʼ gana chaaʼ peru qué gannadiáʼ pora chigácani». Ni bicabi laabe que gudxi laabe paraa zanda guidxélabe ra cá pora chigaca guendaridagulisaa ca lu invitación stibe. Despué de ngue guníʼ gunaa que: «¡Ziaaʼ ra chiguietenaláʼdxicabe guendaguti stiʼ Jesús yannadxí!».
2. Xi zanda guininu ora gusaananu invitación ca ra nuu binni.
2 Ximodo chigúninu ni. Cumu huaxiéʼ tiempu nápanu para guni invitarnu binni ni nabeza neza ra rucheechenu diidxaʼ la? nga runi cadi naquiiñeʼ guindaʼnu stale. Zanda guiniʼluʼ: «Xi tal xa. Ñuuladxeʼ nusaananiáʼ lii invitación riʼ para lii ne familia stiluʼ. Para chetu ti guendaridagulisaa nabé risaca ni raca guiráʼ iza lu guidubi naca Guidxilayú, iza riʼ chigácani domingu 17 stiʼ abril [bidii laabe invitación ca]. Ndiʼ nga dxi guti Jesús, ne zadiʼdiʼ ti libana ni chigusiene xi zanda gúninu para cueendunu ni galán de ni biʼniʼ Jesús ra bidii xquendanabani pur laanu. Qué zaguixe diʼ binni para chuʼ. Lu invitación riʼ cá pora ne paraa chigaca guendaridagulisaa riʼ».
3. Xi zanda gúninu para guni invitarnu binni biaʼ gándatiʼ.
3 Pa xiroobaʼ ra rucheechetu diidxaʼ la? zándaca guiníʼ ca binnigola ca gusaanatu ti invitación ca yoo ra guirutiʼ guinni, peru naquiiñeʼ gusaanatu ni ti lugar ra qué guʼyaʼ xcaadxi binni ni. Biʼniʼ invitar ca binni ni rigánnaluʼ, ca binnilídxiluʼ, cani runineluʼ dxiiñaʼ o cani rineluʼ scuela, ne guiráʼ cani runibiaʼluʼ. Ca sábadu ne ca domingu ca laaca zanda gudiiluʼ invitación riʼ binni, ne pa gúʼyaluʼ zanda la? bisaanané laacabe ca revista ca. Galán pa gúniluʼ jma lu xhiiñaʼ Dios tiempu quíʼzinu invitación riʼ ne gácaluʼ precursor auxiliar.
4. Xiñee racaláʼdxinu cheʼ xcaadxi binni dxi chiguietenaláʼdxinu guendaguti stiʼ Cristu.
4 ¡Guizáʼ galán guiráʼ ni zaziidiʼ ca binni ni cheʼ dxi ca! Zucaadiágacabe modo bisihuinni Jiobá nadxii binni ra bidii xiiñiʼ para gati pur laanu (Juan 3:16). Zánnacabe de ca ndaayaʼ ni chigueedané Reinu stiʼ Dios para binni (Isa. 65:21-23). Ne laaca zábicabe laacaʼ guidxíñacaʼ ra nuu ca acomodador ni nuu raqué para gábicabe laacaʼ ca riuuláʼdxicabe guiziidicabe jma de lu Biblia. Rinábadu Jiobá lu oración guicaa stale binni invitación riʼ ne checaʼ dxi guietenaláʼdxinu guendaguti stiʼ Cristu.