Zuzulú zuni invitarnu binni 17 stiʼ marzo para checaʼ dxi guietenaláʼdxinu guendaguti stiʼ Cristu
1. Xi dxiiñaʼ zuzulú zúninu 17 stiʼ marzo.
1 Cada iza guietenaláʼdxinu guendaguti stiʼ Cristu qué rusaana de gábinu binni «guti Cristu pur [laacaʼ]» (1 Cor. 11:26). Nga runi racaláʼdxinu cheʼ stale binni dxi ca ne gánnacaʼ pabiáʼ nachaʼhuiʼ guca Dios ra bidii xiiñiʼ gati pur laanu (Juan 3:16). Iza riʼ zuzulú zaguíʼzinu invitación 17 stiʼ marzo para cheʼ binni ra chiguietenaláʼdxinu guendaguti stiʼ Cristu. Ñee maʼ cayuʼnuʼ listu para gúninu dxiiñaʼ ca biaʼ gándatiʼ la?
2. Ximodo zanda gusaananu invitación.
2 Ximodo zanda gusaananu invitación. Galán gúninu cadi guindaapenu ora guinínenu binni. Zanda guininu: «Xi tal xa. Ñuuladxeʼ nusaananiáʼ lii invitación riʼ para chineluʼ binnilídxiluʼ ti guendaridagulisaa nabé risaca ni raca guiráʼ iza lu guidubi naca Guidxilayú, iza riʼ chigácani 5 stiʼ abril. Zadiʼdiʼ ti libana ni chigusiene xi zanda gúninu para cueendunu ni galán de ni biʼniʼ Jesús ra bidii xquendanabani pur laanu ne xi cayúnibe yanna. Qué zaguixe diʼ binni para chuʼ, ne lu invitación riʼ cá pora ne paraa chigaca ni». Ne ora ganda la? laaca galán gusaananenu binni revista ca sábadu ne ca domingu.
3. Xi zanda gúninu para ganda guni invitarnu stale binni.
3 Biʼniʼ invitar biaʼ gándatiʼ. Ni racaláʼdxinu nga cheʼ stale binni. Nga runi galán guni invitarnu guiráʼ binni ni rigánnanu, cani rúʼndanenu Biblia, ca binnilídxinu, ca xpecínunu, cani runinenu dxiiñaʼ o cani rinenu scuela ne ca binni ni runibiaʼnu. Ne ca binnigola nga quíxhecaʼ ximodo guiaaziʼ ni neza ra rucheechetu diidxaʼ. Ca iza ni maʼ gudiʼdiʼ ca, huabeendunu ni galán ora riguíʼzinu ca invitación ca. Udubiza guyé ti gunaa ra bietenaláʼdxinu guendaguti stiʼ Cristu. Ora biʼyaʼ ti acomodador laabe, gudxi laabe pa zacané laabe guyúbicabe binni ni biʼniʼ invitar laabe. Peru guirutiʼ ñunibiaʼbe raqué. Laabe nabe bisaanané ca Testigu laabe invitación dxi que, ora canagucheechecaʼ diidxaʼ de yoo pur yoo.
4. Xi razón nápanu para gúninu dxiiñaʼ riʼ né stale gana.
4 Zándaca cheʼ tuuxa binni ni biʼniʼ invitarluʼ ra chiguietenaláʼdxinu guendaguti stiʼ Cristu. Ne neca qué cheʼ tuuxa ni biʼniʼ invitarluʼ, peru dxiiñaʼ ni gúniluʼ ca zacaneni ganna binni xi chigaca. Ca invitación ni quíʼziluʼ zacanécani ganna binni maʼ naca Jesús ti rey ni napa stale poder. Pa gúniluʼ dxiiñaʼ riʼ né stale gana la? zeeda gácani casi ora ñábiluʼ stale binni —cani nabeza neza ra rucheecheluʼ diidxaʼ, ca xpinni Cristu ni ridagulisaaneluʼ ne Jiobá— pabiáʼ rusisácaluʼ ni biʼniʼ Dios ra bidii xiiñiʼ gati pur laanu (Col. 3:15).