Zuzulú zaguíʼzinu invitación para dxi guietenaláʼdxinu guendaguti stiʼ Cristu 1 stiʼ marzo
1. Padxí zuzulú guni invitarnu binni cheʼ dxi guietenaláʼdxinu guendaguti stiʼ Cristu, ne xiñee zápanu jma tiempu para gúninu ni iza riʼ.
1 Viernes 1 stiʼ marzo zuzulú zaguíʼzinu invitación para cheʼ binni dxi guietenaláʼdxinu guendaguti stiʼ Cristu, ni chigaca 26 stiʼ marzo. Nga rusihuinni zápanu jma tiempu para quíʼzinu invitación iza riʼ. Zacá zanda guni invitarnu jma binni para cheʼ dxi ca, ne jmaruʼ si pa xiroobaʼ ra rucheechenu diidxaʼ.
2. Ximodo nga chiguicaanu ca invitación ca yanna, ne ximodo naquiiñeʼ quíʼzinu cani.
2 Ximodo gúninu ni. Ca binnigola ca zusiénecaʼ ximodo quíʼzinu invitación ca neza ra rucheechenu diidxaʼ ne pa zanda gusaananu ni neca qué guinni binni ora tídinu. Pa maʼ bisaananu ti invitación ralidxi guiráʼ binni ni nabeza neza ra rucheechenu diidxaʼ ne biaanaruʼ ni la? zanda quíʼzinu ni ca lugar ra riuu stale binni. Binnigola ni ruuyaʼ modo rireecheʼ diidxaʼ naquiiñeʼ guʼyaʼ guicá paraa ne pora nga chiguietenaláʼdxitu guendaguti stiʼ Cristu lúcani ne gúʼyabe cadi guiaadxaʼ invitación ra rudiicabe libru ne revista, ti guicaa cani rucheeche diidxaʼ biaʼ iquiiñecaʼ. Cadi naquiiñeʼ quíxhecabe guiráʼ ca invitación ca tobi si tiru. Naquiiñeʼ guicaanu biaʼ iquiiñesinu ti semana.
3. Xi naquiiñeʼ gánnanu ora gusaananenu binni invitación.
3 Ximodo zanda gusaananenu ni binni. Jma galán cadi gutálenu diidxaʼ ora guinínenu tuuxa, ti ganda guinínenu jma binni. Lu yaza 4 zeeda ximodo zanda gusaananenu ni laacabe, ne zanda iquiiñenu ni para guinínenu guiráʼ cani nabeza neza ra rucheechenu diidxaʼ. Peru pa chuulaʼdxiʼ tuuxa binni gucaadiaga laanu o guinabadiidxaʼ laanu xiixa la? zanda güinérunu laa diidxaʼ. Laaca galán gusaananenu binni revista sábadu ne domingu ora guidúʼyanu zanda gúninu ni. Sábadu, 2 stiʼ marzo, zusaananenu binni invitación si, neca nexheʼ guzulú gúʼndanenu binni Biblia dxi ca.
4. Xiñee naquiiñeʼ gúninu dxiiñaʼ riʼ né stale gana.
4 Racaláʼdxinu cheʼ stale binni dxi guietenaláʼdxinu guendaguti stiʼ Cristu. Purtiʼ lu libana ni chitiidiʼ dxi ca zusiénecabe tupeʼ nga Jesús (1 Cor. 11:26). Zadúʼyanu ximodo racané guendaguti stibe laanu (Rom. 6:23). Ne laaca zieeteʼ pabiáʼ risaca nga cadi gusaananu de guietenaláʼdxinu laabe (Juan 17:3). Quixhe íquenu gúninu dxiiñaʼ riʼ né stale gana.