Ximodo zanda gudiʼnu xquíxepeʼ Dios pur ni jma risaca bisigaʼdeʼ laanu
1. Xiñee rudiʼnu xquíxepeʼ Jiobá.
1 Jiobá maʼ bisigaʼdeʼ laanu stale cosa, peru ni jma risaca bidiibe laanu nga Jesús, Xiiñibe ni nadxiibe, ni beeda gati pur laanu (Sant. 1:17). Stale nga ca ndaayaʼ ni ricaanu pur ni bidii Dios laanu, tobi de laacani nga rixá ca donda stinu (Efe. 1:7). Cadi dxandíʼ rudiʼnu xquíxepeʼ laabe pur ni bíʼnibe ca la? Nga runi, tiempu rietenaláʼdxinu guendaguti stiʼ Jesús ca nga naquiiñeʼ cueenu tiempu para guiníʼ íquenu de ni bisigaʼdeʼ Dios laanu.
2. Xi zanda gúninu para gusisácanu jma ni bisigaʼdeʼ Jiobá laanu ne gacanenu familia stinu guni zacaca.
2 Gacanenu familia stinu gusisaca ni bisigaʼdeʼ Dios laanu. Iza riʼ zietenaláʼdxinu guendaguti stiʼ Jesús 30 stiʼ marzo. Para ganda gusisácanu jma ni bidii Dios laanu la? galán iquiiñenu chupa chonna de ca gueelaʼ runi adorarnu Dios ne binnilídxinu para guidúʼndanu xiixa ni caníʼ de ni bisigaʼdeʼ Dios laanu riʼ ante ganda dxi ca. Laaca galán chinándanu biaʼ maʼ nexheʼ guiuundaʼ lu Biblia guiráʼ dxi. Cada tobi de laanu naquiiñeʼ guiníʼ ique xi guiráʼ huabeendú pur guendaguti stiʼ Jesús, ximodo huayacaneni laanu guchaʼnu modo riníʼ íquenu de Jiobá, modo riníʼ íquenu de laca laanu, modo ridúʼyanu xcaadxi binni ne de ca cosa ni cabézanu gaca. Ne laaca galán guni ensayarnu ca diidxaʼ riuundaʼ nacubi ni zaquiiñeʼ dxi guietenaláʼdxinu guendaguti stiʼ Jesús. Laacani nga 8 ne 109 (Sal. 77:12).
3. Xi zanda gúninu para gusihuínninu rudiʼnu xquíxepeʼ Jiobá.
3 Guininu de ni bisigaʼdeʼ Jiobá laanu. Guizáʼ rusisácanu ni bisigaʼdeʼ Jiobá laanu, nga runi qué rusaananu de gusíʼdinu binni de Jiobá ne gábinu laacaʼ bisihuínnibe pabiáʼ nadxiibe laanu ora biseendabe Xiiñibe (Sal. 145:2-7). Nga runi, nuu familia riguixhe chaahuiʼ tiempu stiʼ para gaca neca tobi de laacaʼ precursor auxiliar lu tobi de ca beeu riʼ: marzo, abril o mayo. Peru, pa qué zanda guʼnuʼ zacá la? galán cueeluʼ tiempu para gucheecheluʼ diidxaʼ jma (Efe. 5:16). Ne zuyúbirunu xcaadxi modo gacanenu binni cheʼ ra guietenaláʼdxinu guendaguti stiʼ Jesús, purtiʼ rudiʼnu xquíxepeʼ Jiobá (Apo. 22:17). Dede ca yanna bicaa lu ti guiʼchiʼ lá ca binni chiguni invitarluʼ, casi ca binni ni rigánnaluʼ, cani ruundaneluʼ Biblia, ca binnilídxiluʼ, cani runineluʼ dxiiñaʼ ne ca vecinu stiluʼ. De racá biʼniʼ biaʼ gándatiʼ para quíʼziluʼ invitación para dxi guietenaláʼdxinu guendaguti stiʼ Jesús.
4. Xi guiráʼ zanda gúninu para iquiiñenu tiempu rietenaláʼdxinu guendaguti stiʼ Jesús ca jneza.
4 Tiempu rietenaláʼdxinu guendaguti stiʼ Jesús ca racaneni laanu para guluinu Jiobá rudiʼnu xquíxepeʼ laa pur ni bisigaʼdeʼ binni guidxilayú. Iquiiñenu tiempu ca para gusisácanu jma ni bisigaʼdeʼ Dios laanu ne guininu de laani ne de guiráʼ ca cosa «risaca ni napa Cristu para laanu» (Efe. 3:8).