Ñee zusihuínninu rudiʼnu xquíxepeʼ Dios la?
Dxi conmemoración ca zanda gusihuínninu ni
1. Xi zusihuínninu dxi conmemoración ca.
1 Conmemoración ni chigápanu 14 stiʼ abril zacané laanu guizíʼdinu ne gusihuínninu rudiʼnu xquíxepeʼ Jiobá pur guendanachaʼhuiʼ stiʼ. Lu relatu ni zeeda lu Lucas 17:11-18 rihuinni ximodo ruuyaʼ Jiobá ne Jesús ca binni ni rudii xquíxepeʼ laacabe. Nabé triste nga tobi si de lade chii hombre ni bianda de lepra, ni rieeteʼ lu relatu ca, bibiguetaʼ para bidii xquíxepeʼ Jesús pur bianda. Maʼ cadi candaa, zaree guiráʼ ni cayuniná laanu ne zabáninu sin qué chuʼ dxi gátinu purtiʼ bidii Dios Xiiñiʼ para guilanu. Nga runi, qué ziuu dxi gusaana de gudiʼnu xquíxepeʼ Jiobá pur guiráʼ ndaayaʼ stiʼ. Yanna, ximodo zanda guluinu rudiʼnu xquíxepeʼ Dios lu ca semana ni zedadxiña ca yaʼ.
2. Ximodo zanda guizíʼdinu gudiʼnu xquíxepeʼ Dios pur bilá laanu.
2 Guizíʼdinu gudiʼnu xquíxepeʼ Dios. De ndaaniʼ íquenu nga riale gudiʼnu xquíxepeʼ tuuxa. Para jma gusisácanu ni biaxa para guilanu la? nuu chupa chonna lugar ra zanda gúʼndanu lu Biblia ca dxi zeeda ganda conmemoración, casi lu calendariu ne lu folletu Guidúʼndanu Stiidxaʼ Dios guiráʼ dxi. Xiñee qué gúʼndatu cani casi familia yaʼ. Nga zacané laanu jma gusisácanu ni gudíxecabe para gulácabe laanu. Ne zucaani laanu gúninu ni jneza (2 Cor. 5:14, 15; 1 Juan 4:11).
3. Xi guiráʼ modo zanda gusihuínninu rudiʼnu xquíxepeʼ Dios ca dxi ganda conmemoración.
3 Gusihuínninu rudiʼnu xquíxepeʼ Jiobá pur ni biʼniʼ. Zanda gusihuínninu ni lu cani gúninu (Col. 3:15). Hombre ni bianda de lepra que nagueenda biyúbibe Jesús para gudiibe xquíxepeʼ laa. Nanna dxíchinu dede cayéchebe gúdxibe binni guca ti milagru para biandabe (Luc. 6:45). Guiranu rudiʼnu xquíxepeʼ Dios pur ni biʼniʼ, peru ñee zucaa nga laanu chiguni invitarnu binni cheʼ conmemoración la? Sti modo zanda gudiʼnu xquíxepeʼ Dios pur ni biʼniʼ nga gácanu precursor auxiliar o chigucheechenu diidxaʼ jma ca dxi ganda conmemoración ca. Ne gueelaʼ chigaca ni ca, de ladxidoʼno ziale guidxaagalunu ca binni ni chiganna laanu dxi ca ne gábinu laacabe zanda guicábinu intiica ni racaláʼdxicabe guinabadiidxacabe.
4. Xi zanda gúninu lu conmemoración riʼ ti cadi guiuubaʼ ladxidoʼno despué.
4 Ñee maʼ ndiʼ nga últimu conmemoración chigápanu la? (1 Cor. 11:26.) Qué gánnadinu. Peru ni nánnanu nga ora maʼ gudiʼdiʼ ni maʼ gástiruʼ zanda gúninu para gusihuínninu rudiʼnu xquíxepeʼ Jiobá. Yanna lii yaʼ, ñee zusihuínniluʼ rudiiluʼ xquíxepeʼ laabe la? Ribézanu chuulaʼdxiʼ Jiobá, Dios ni bilá laanu, ca diidxaʼ guininu ne cani guiníʼ íquenu para gudiʼnu xquíxepeʼ laa.