Ca ánjel ca racanecaʼ laanu
1 «Ganna ca tu qué ziuu dxi ixele de laatu dede dxi iluxe guidxilayú [«cani cayaca yanna», NM].» Guizáʼ riguu ca diidxaʼ riʼ gana cani cayuni ni biʼniʼ mandar Jesús: «Laché irá xixé guidxi, lachiusiidi irá xixé binni sa nanda naa» (Mat. 28:18-20). Tobi de ca modo nuuné Jesús cani dxandíʼ zinanda laabe nga ra riquiiñebe ca ánjel stibe (Mat. 13:36-43). Dxandipeʼ, riéchenu stale nga gucheechenenu ca ánjel ca «stiidxa Cristu ni qué ziuu dxi initilú» (Apo. 14:6, 7).
2 Ora maʼ ziucheechenu diidxaʼ. Biblia caníʼ de que Jiobá ruseendabe ca ánjel ca «rigacané ca ca xpinni be ni chi ilá» (Heb. 1:14). Ca dxi stiʼ ca apóstol que la? guyuu ánjel ni biluíʼ ca xpinni Cristu ra nuu ca binni ni naquiiñeʼ ucaadiaga (Hech. 8:26). Yanna riʼ ca sierbu stiʼ Dios laaca cayuuyacaʼ ximodo nabé culuíʼ ca ánjel riʼ laacaʼ paneza checaʼ. Stale de ca binni ni rucaadiaga laanu huaniʼcaʼ de que órapeʼ canábacabe lu orasión chuʼ tu acané laacabe la? oraquepeʼ uxhidxi ti Testigu ra puertaʼ stícabe. ¡Pabiáʼ nga riéchenu ne ca ánjel ca, ora ca binni riʼ ucaadiágacaʼ stiidxaʼ Reinu! (Luc. 15:10.)
3 Ora ucaalúcabe laanu. Daniel ne guionnaʼ xhamígube hebreu que, apóstol Pedru ne stuudxi ni huadíʼdicaʼ endanagana naroʼbaʼ la? huayuuyacaʼ de que rapa Jiobá laacaʼ ra riquiiñebe ca ánjel ni «guizáʼ nadipaʼ» riʼ (Sal. 103:20; Dan. 3:28; 6:21, 22; Hech. 12:11). Nécaxa nuu tiru maʼ qué ganda udxiilunu ora maʼ cucaalúcabe laanu, zacaanu stale stipa ra guietenaláʼdxinu ni biiyaʼ hombre ni ucané Eliseu que, «jma stale nga tu nuuné laanu que cani nuuné laacabe» (2 Rey. 6:15-17). Ne neca guxhélecabe laanu de ca bíchinu ne ca bizánanu ni zinanda Cristu la? cadi chuʼnuʼ xizaa. Stiidxaʼ Dios cayabi laanu de que ánjel stiʼ Jiobá cayapa idubi buelta cani ridxibi laabe (Sal. 34:7).
4 Maʼ qué zandaa diʼ, ca ánjel casi soldadu ca zunitilucaʼ guiráʼ ni rucaalú modo runi mandar Cristu (Apo. 19:11, 14, 15). Laga cabézanu dxi ca la? cadi guiaanadxinu de usisácanu Jiobá ne endanadxibalú, purtiʼ nannadxíchinu de que nadipaʼ modo cayacané ca ánjel ni biseendaʼ Jesús ca laanu (1 Ped. 3:22).