Yenanda ejemplu stiʼ ca ángel

1, 2. a) ¿Xi runi laanu maʼ gadxé de ca ángel? b) ¿Gunáʼ nga caadxi cosa ni rusihuinni nácanu casi ca ángel?

ORA bichiña Jehová lii ra nuu biʼniʼ invitarbe lii chuʼluʼ ndaaniʼ ti familia ni nadxiisaa ne ni runi adorar laabe, ndaaniʼ familia riʼ nuu hermanu ne hermana de guidubi naca guidxilayú, ne laaca nuu millón de ángel (Dan. 7:​9, 10). Ora guiníʼ íquenu de ca ángel ca, zándaca riníʼ íquenu guiráʼ ni runi laacabe gadxé de laanu. Guzéʼtenu ti ejemplu, bizáʼ Dios ca ángel ca ante guzaʼbe binni guidxilayú (Job 38:​4, 7). Jma napa ca ángel ca poder ne laaca nácacaʼ santo ne rúnicaʼ ni jneza ti cosa ni qué zanda ugaandanu purtiʼ nácanu binni ruchee (Luc. 9:26).

² Peru neca nuu cosa ni runi laanu gadxé de ca ángel la? laaca nuu stale cosa ra zanda guchaaganu nácanu casi laacabe. Guzéʼtenu chupa chonna cosa ra rihuinni nácanu casi laacabe, casi ca ángel, laanu laaca zanda gusihuínninu ca cualidad stiʼ Jehová, zanda cuinu xi gúninu ne nápanu ti lá, cada tobi de laanu gadxé gadxé modo naca ne nápanu gadxé gadxé dxiiñaʼ para gúninu ni ná Jehová. Ne casi ca ángel, nánnanu caquiiñeʼ guni adorarnu Dios ni bizáʼ laanu (1 Ped. 1:12).

3. ¿Xi zanda guizíʼdinu de ca ángel ni runi ni ná Jehová?

³ Casi bidúʼyanu nuu stale cosa ni rusihuinni nácanu casi ca ángel, ejemplu stícabe zanda cuʼ gana laanu ne gusiidiʼ laanu stale cosa risaca. Lu artículo riʼ, zadúʼyanu ximodo zanda chinándanu ejemplu stiʼ ca ángel, purtiʼ laacaʼ nácacaʼ humilde, rusihuínnicaʼ nadxiicaʼ binni, runi huantarcaʼ ne guizáʼ rúnicaʼ dxiiñaʼ para chuʼ congregación nayá.

NACA CA ÁNGEL HUMILDE

4. a) ¿Ximodo rusihuinni ca ángel nácacaʼ humilde? b) ¿Xiñee naca ca ángel humilde? (Salmo 89:7).

⁴ Naca ca ángel ni runi ni ná Jehová humilde. Neca nánnacabe stale pur guiráʼ ni maʼ biiyacabe, guizáʼ nápacabe poder ne nuu xpiaanicabe, peru rinándacabe ca instrucción ni rudii Jehová laacabe (Sal. 103:20). Ora rúnicabe ca dxiiñaʼ ni rudii Jehová laacabe qué runi presumírcabe de ni rúnicabe ne qué riquiiñecabe poder ni nápacabe para gusisaca binni laacabe. Guizáʼ riuucabe nayecheʼ ra rúnicabe ni racalaʼdxiʼ Dios, neca guirutiʼ ganna tu lácabe (Gén. 32:​24, 29; 2 Rey. 19:35).a Qué rinácabe gusisaca binni laacabe purtiʼ nánnacabe Jehová si nga naquiiñeʼ guisaca. ¿Xiñee naca ca ángel humilde yaʼ? Purtiʼ nadxiicaʼ Jehová ne guizáʼ runi respetarcaʼ laabe (biindaʼ Salmo 89:7).

5. ¿Ximodo bisihuinni ti ángel naca humilde ra guluu jneza apóstol Juan? (Laaca zanda gúʼyaluʼ imagen ca).

⁵ Yanna, guidúʼyanu ti relatu ni rusihuinni naca ca ángel humilde. Biaʼ lu iza 96, bidii ti ángel ni qué gánnanu tu láʼ ti visión apóstol Juan (Apoc. 1:1). ¿Xi biʼniʼ Juan ora biʼyaʼ visión que yaʼ? Bizuxíbibe nezalú ángel que para guni adorarbe laa. Peru nagueendaca bicueeza ángel que laabe ne gudxi laabe: «¡Cadi gúniluʼ nga! Laaca ti esclavu naa casi lii ne ca hermanu stiluʼ […]. ¡Biʼniʼ adorar Dios!» (Apoc. 19:10). ¡Pabiáʼ humilde guca ángel ca! Qué niná ángel que nusisácabe ne ñuni adorarbe laa. Nagueendaca biyubi ángel que gusisaca ne guni adorar Juan Jehová. Ne laaca qué niníʼ íquebe jma risácabe que Juan. Neca maʼ xadxí de cayúnibe ni ná Jehová ne jma nápabe poder que apóstol que, gúcabe humilde ne guniʼbe: «Laaca ti esclavu naa casi lii». Neca guluu jneza ángel riʼ Juan peru qué nidíndenebe laa, sínuque né diidxaʼ nadóʼ guníʼnebe laa. Zándaca biénebe bizuxibi Juan xañeebe purtiʼ guizáʼ cadxagayaa pur ca ni biʼyaʼ que.

6. ¿Ximodo zanda chinándanu ejemplu stiʼ ca ángel purtiʼ nácacaʼ humilde?

⁶ ¿Ximodo zanda chinándanu ejemplu stiʼ ca ángel purtiʼ nácacaʼ humilde yaʼ? Ra cadi gusisácanu laca laanu pur ca dxiiñaʼ ni rúninu lu xhiiñaʼ Jehová ne cadi guni presumirnu pur xiixa ni nánnanu gúninu o habilidad ni nápanu (1 Cor. 4:7). Cadi galán guiníʼ íquenu jma risácanu que xcaadxi binni purtiʼ si maʼ xadxí cayúninu ni ná Jehová o purtiʼ si nápanu xiixa responsabilidad ndaaniʼ xquídxibe. Ne ra jma stale responsabilidad gápanu ndaaniʼ xquidxi Jehová jmaruʼ si caquiiñeʼ gusihuínninu nácanu tobi de ca ni jma nahuiiniʼ (Luc. 9:48). Ra chinándanu ejemplu stiʼ ca ángel, ni racaláʼdxinu nga gacanenu xcaadxi ne cadi gucaʼnu laacabe guni sentírcabe jma risácanu que laacabe.

7. ¿Ximodo zanda gusihuínninu nácanu humilde ora uguu jnézanu o gudiʼnu conseju tuuxa?

⁷ Laaca zanda gusihuínninu nácanu humilde ora uguu jnézanu o gudiʼnu conseju tuuxa, zanda gácani ti hermanu, ti hermana o ca xiiñinu. Zándaca ziuu biaje caquiiñeʼ gudiʼnu conseju nadipaʼ. Peru galán gúninu cásica biʼniʼ ángel ni guluu jneza Juan que, bíʼnibe ni né diidxaʼ nadóʼ, zanda gudiʼnu conseju nadipaʼ peru sin guninanu binni ca. Pa qué guiníʼ íquenu jma risácanu que xcaadxi la? zudiʼnu conseju ni zeeda lu Biblia ne zúninu ni né stale respetu ne diidxaʼ nadóʼ (Col. 4:6).

NADXII CA ÁNGEL BINNI

8. a) Casi riete lu Lucas 15:​10, ¿ximodo rusihuinni ca ángel nadxiicaʼ binni? b) ¿Xi dxiiñaʼ runi ca ángel lu predicación? (Laaca zanda gúʼyaluʼ imagen ca).

⁸ Rizaalaʼdxiʼ ne nadxii ca ángel binni. Riéchecabe ora gúʼyacabe gaca arrepentir ti binni ni bichee, ni caninu raríʼ nga, ora ribiguetaʼ ti dendxuhuiiniʼ ni biniti ra nuu Jehová ne ora ruchaa ti binni xquendanabani para guni ni ná Dios pur ni biziidiʼ de lu Biblia (biindaʼ Lucas 15:10). Laaca runi ca ángel ca ti dxiiñaʼ nabé risaca ti ganda gaca predicar (Apoc. 14:6). Neca cadi laapecabe nga runi predicárcabe binni, peru zanda chinécabe laanu ra nuu ti binni ni racalaʼdxiʼ guiziidiʼ de Jehová. Zácani, peru qué zanda guininu laapecabe nga yenécabe laanu ra nuu ti binni. Purtiʼ zanda iquiiñeʼ Jehová xcaadxi modo, casi espíritu santu stiʼ, para gacané binni o gabi ca xpinni xi gúnicaʼ (Hech. 16:​6, 7). Guizáʼ riquiiñeʼ Jehová ca ángel stiʼ. Nga runi, ora guni predicarnu zanda chuʼnu seguru nuu ca ángel listu para gacanecaʼ laanu. (Biiyaʼ cuadru ni láʼ «Bicabi Dios ca oración stícabe»).b

9. ¿Ximodo zanda chinándanu ejemplu stiʼ ca ángel, ra gannaxhiinu binni?

⁹ ¿Ximodo zanda chinándanu ejemplu stiʼ ca ángel, ra gannaxhiinu binni? Ora guieeteʼ maʼ bibiguetaʼ tuuxa ndaaniʼ congregación, zanda guiéchenu cásica riecheʼ ca ángel. Guidxaagalunu hermanu ca né stale cariñu ne gusihuínninu nadxiinu laabe (Luc. 15:​4-7; 2 Cor. 2:​6-8). Ne laaca zanda chinándanu ejemplu stiʼ ca ángel ora gúninu stipa para guni predicarnu biaʼ gándatiʼ (Ecl. 11:6). Ne cásica racané ca ángel laanu ora runi predicarnu la? laanu laaca galán quixhe íquenu gacanenu ca hermanu lu predicación. Guzéʼtenu chupa chonna ejemplu, zanda quixhe íquenu guni predicarnenu ti publicador nacubi o gacanenu ti hermanu ni maʼ huaniisi o ni huará para guni predicar.

10. ¿Xi rusiidiʼ ni bizaaca Sara laanu?

¹⁰ Yanna, ¿ñee maʼ qué randa rúniluʼ biaʼ ñuuláʼdxiluʼ ñúniluʼ la? Pa zacá ni cadi guireeluʼ gana purtiʼ zándaruʼ gacaneluʼ ca ángel ca para gaca predicar. Guidúʼyanu ni bizaaca ti hermana de guidxi La India ni láʼ Sara.c Gúcabe precursora 20 iza, peru beeda gaca huarabe, maʼ qué ñanda nizabe ne ñásabe de lu cama. Pur ni bizaacabe riʼ, guizáʼ guyuube triste. Peru biguetaʼ guyuube gana purtiʼ gucané ca hermanu ne hermana de congregación stibe laabe ne purtiʼ qué nusaanabe de ñuundabe Biblia. Gupa xidé bichaabe modo runi predicarbe. Cumu qué randa ribibe para guni predicarbe pur carta la? rúnibe ni pur teléfono. Ngue runi, riníʼnebe ca binni ni yegánnabe dxiqué, ne maʼ laacaʼ rábicaʼ laabe tu laa zándaca zaná guiziidiʼ de lu Biblia. ¿Xi guleendube yaʼ? Chupa chonna beeu si, gupa Sara 70 estudiu. ¡Guizáʼ stale estudiu riʼ dede qué randa ruundanebe guiracaʼ! Nga runi, bitiidibe caadxi de ca estudiu que lu náʼ caadxi hermanu de congregación stibe. Stale de ca estudiante riʼ maʼ riecaʼ reunión. Guizáʼ riecheʼ ca ángel guninecaʼ dxiiñaʼ hermanu ne hermana casi Sara purtiʼ rúnicaʼ guiráʼ ni nuu lu nacaʼ para guni predicarcaʼ.

RUSIHUINNI CA ÁNGEL RUNI HUANTARCAʼ

11. ¿Ximodo naca ca ángel ni runi ni ná Dios ti ejemplu galán para laanu purtiʼ runi huantarcaʼ?

¹¹ Naca ca ángel ni runi ni ná Dios ti ejemplu galán para laanu, purtiʼ runi huantarcaʼ. Maʼ zinecaʼ stale iza de cayuni huantarcaʼ ca cosa ni cadi jneza ne guiráʼ cosa malu ni cayaca. Biiyacabe ximodo Binidxabaʼ ne xcaadxi ángel ni biʼninécabe dxiiñaʼ juntu bicaalucaʼ Jehová (Gén. 3:1; 6:​1, 2; Jud. 6). Ruzeeteʼ Biblia de ti ángel ni bidxiilú ora bicaalú ti demonio guizáʼ nadipaʼ laa (Dan. 10:13). Ne biaʼ tiempu huabani binni lu guidxilayú maʼ biiyaʼ ca ángel huaxiéʼ si tu ruyubi guni adorar Jehová. Neca zacá, qué huasaana ca ángel Jehová ne cayúnicaʼ ni nabe né stale gana. Nánnacabe zedandá dxi zabee Jehová guiráʼ cosa ni cadi jneza raca.

12. ¿Xi zacané laanu guni huantarnu?

¹² ¿Ximodo zanda chinándanu ejemplu stiʼ ca ángel purtiʼ runi huantarcaʼ? Zándaca laaca cadúʼyanu cayaca cosa ni cadi jneza o cucaalúcabe laanu, peru cásica ca ángel nanna dxíchinu maʼ naguixhe Jehová ora gunduuxeʼ guiráʼ cosa malu ni cayaca. Nga runi, casi ca ángel ni runi ni ná Jehová cadi guireʼnu gana de gúninu ni jneza (Gál. 6:9). Ne cayuni prometer Jehová laanu zacané laanu guni huantarnu (1 Cor. 10:13). Zanda guinábanu laabe gudiibe laanu espíritu stibe, ni zacané laanu gápanu paciencia ne chuʼnu nayecheʼ (Gál. 5:22; Col. 1:11). Yanna, ¿xi zanda gúniluʼ pa cucaalúcabe lii yaʼ? Gupa confianza Jehová ne cadi guidxíbiluʼ. Laabe qué ziuu dxi gusaanabe lii ne zudiibe lii stipa (Heb. 13:6).

RACANÉ CA ÁNGEL CHUʼ CONGREGACIÓN NAYÁ

13. ¿Xi dxiiñaʼ nabé risaca cayuni ca ángel ca lu ca últimu dxi riʼ? (Mateo 13:​47-49).

¹³ Lu ca últimu dxi riʼ maʼ bidii Jehová ti dxiiñaʼ nabé risaca ca ángel (biindaʼ Mateo 13:​47-49). Pur predicación ca stale binni de guiráʼ guidxi caziidicaʼ de Jehová. Nuu de laacaʼ rúnicaʼ stipa para gueeda gácacaʼ xpinni Cristu peru xcaadxi coʼ. Maʼ gucuaa ca ángel ti dxiiñaʼ laani nga guni separarcaʼ «binni malu de binni nachaʼhuiʼ». Zacá racanécabe chuʼ congregación nayá. Peru qué riníʼ diʼ nga pa guixeleʼ tuuxa de ndaaniʼ xquidxi Dios maʼ qué zanda guibiguetaʼ ne laaca maʼ qué ziuu guendanagana ndaaniʼ congregación. Zanda chuʼnu seguru guizáʼ nadipaʼ cayuni ca ángel dxiiñaʼ para gacanecaʼ chuʼ ca congregación ca nayá.

14, 15. Racalaʼdxiʼ ca ángel chuʼ congregación nayá, ¿ximodo zanda chinándanu ejemplu sticaʼ? (Laaca zanda gúʼyaluʼ imagen ca).

¹⁴ Racalaʼdxiʼ ca ángel chuʼ congregación nayá, ¿ximodo zanda chinándanu ejemplu sticaʼ? Ra gúninu stipa chuʼnu gaxha de Jehová ne chuʼnu nayá nezalú. Cada tobi de laanu naquiiñeʼ gápanu ladxidoʼno, cuinu tu guidxaaganu ne gucáʼnanu ni zanda gueeda guxheleʼ laanu de Jehová. Zacá zanda gacanenu chuʼ congregación nayá (Sal. 101:3). Laaca zanda gacanenu ca hermanu cadi guixélecaʼ de Jehová. Guzéʼtenu ti ejemplu, ¿xi zúninu pa málasi gánnanu biʼniʼ ti hermanu ti pecadu grave yaʼ? Cumu nadxiinu hermanu ca la? zábinu laabe caquiiñeʼ guiníʼnebe ca ancianu. Ne pa qué gúnibe ni maʼ laanu nga naquiiñeʼ gábinu ca ancianu ni bizaaca. Racaláʼdxinu gacané ca ancianu hermanu ni maʼ caxeleʼ de Jehová riʼ nagueendaca (Sant. 5:​14, 15).

¹⁵ Triste guininu ni, peru nuu tu laa runi cometer pecadu grave ne caquiiñeʼ cueecabe laa de ndaaniʼ xquidxi Dios. Ora guizaaca ndiʼ la? maʼ qué ridxaaganu binni ca (1 Cor. 5:​9-13).d Zacá riuu congregación nayá. Ora rusaana de guidxaaganu ca ni maʼ biree de ndaaniʼ xquidxi Dios rusihuínninu nadxiinu laacabe. Ora gúʼyacabe ruzúʼbanu stiidxaʼ Jehová zanda gacaneni laacabe gudiicabe cuenta naquiiñeʼ guibiguétacabe ra nuu Jehová. Ne pa guibiguétacabe guizáʼ ziéchenu cásica riecheʼ Jehová ne ca ángel (Luc. 15:7).

16. ¿Xi zúniluʼ para chinándaluʼ ejemplu stiʼ ca ángel?

¹⁶ Ti privilegiu naroʼbaʼ rudii Jehová laanu nga ganda guizíʼdinu de ca ángel ca ne guninenu laacaʼ dxiiñaʼ juntu. Gúninu stipa pur chinándanu ejemplu stiʼ ca ángel purtiʼ laacaʼ nácacaʼ humilde, nadxiicaʼ binni, runi huantarcaʼ ne racaláʼdxicaʼ chuʼ congregación nayá. Pa chinándanu ejemplu stiʼ ca ángel ni runi ni ná Jehová, zanda chuʼnu ndaaniʼ familia stibe ni qué zusaana de guni adorar laabe para siempre.