Guendaridagulisaa de Chonna Gubidxa stiʼ ca Testigu stiʼ Jiobá «Mayaca guilanu» 2006
1. Ximodo bisihuinni xquidxi Jiobá de dxiqué dxandipeʼ bisisácacabe guni adorárcabe Dios jneza, ne ximodo zanda gúninu zaqueca.
1 Rey Ezequías ni guleza ndaaniʼ guidxi Judá de dxiqué biseendanebe cani runi xhiiñabe caadxi carta para utagulisaabe iráʼ xpínnibe Jerusalén (2 Cró. 30:6, 13). Ni biʼniʼ guidxi que ora ucuaacaʼ invitación stiʼ rey que, bisihuínnini ximodo ruuyacabe aca adorar Dios jneza (2 Cró. 30:10-12). Maʼ xhupa xhonna beeu si cayaadxaʼ para usihuinni ca xpinni Jiobá de yanna riʼ pa rusisácacaʼ guenda nápacaʼ de idagulisaacaʼ para guni adorarcaʼ Jiobá. Iráʼ neza binni ridagulisaa maʼ uca invitarcaʼ para cheʼcaʼ Guendaridagulisaa de Chonna Gubidxa ni láʼ: «Mayaca guilanu». Zieluʼ ora ácani la?
2. Xi naquiiñeʼ gúninu para ganda chuunu guionnaʼ gubidxa stiʼ Guendaridagulisaa de Chonna Gubidxa riʼ.
2 Dede ca yanna udixhe chaahuiʼ ni gúniluʼ. Para cueendunu ni jneza ne iráʼ ni maʼ biʼniʼ ca bíchinu ne endarannaxhii la? cadi naquiiñeʼ guiáʼdxanu nin ti dxi. Dede ca yanna udixhe chaahuiʼ iráʼ ni chigúniluʼ ti ganda chineluʼ binnilídxiluʼ guionnaʼ gubidxa ca (Pro. 21:5). Zándaca inábaluʼ permisu patrón stiluʼ, iníʼneluʼ xheelaluʼ ni cadi naca testigu xi iráʼ ndiʼ cá íqueluʼ gúniluʼ, inábaluʼ ti cuartu ndaaniʼ ti hotel para guiaanaluʼ o acaneluʼ cani ruundaneluʼ para ganda chécabe guionnaʼ gubidxa ca. Cadi guʼnuʼ ni maʼ oraqueruʼ. Uniʼné Jiobá ne biʼniʼ cré «zacanebe lii» (Sal. 37:5).
3. Xiñee riquiiñeʼ chinándanu ni na lu guiʼchiʼ riʼ ora uyúbinu ra guiaananu.
3 Xquidxi Jiobá maʼ biʼniʼ dxiiñaʼ nadipaʼ para idxela ra guiaananu ora aca ca endaridagulisaa ca. Ra gúninu iráʼ ni na guiʼchiʼ riʼ zusihuínninu cudiʼnu xquíxepeʼ ca bíchinu pur ca dxiiñaʼ bíʼnicaʼ pur laanu. Ne laaca zusihuínninu nápanu respetu xquidxi Dios ne iráʼ cani cheʼ endaridagulisaa ca (1 Cor. 13:5; 1 Tes. 5:12, 13; Heb. 13:17).
4-6. Xi chupa cosa nabé risaca riquiiñeʼ gánnanu ora inábanu ti cuartu ndaaniʼ ti hotel, ne xiñee. (Zanda iniʼluʼ ni cá lu cuadru zeeda lu yaza 5).
4 Ra guiaanuʼ. Ora iluxe Guendaridagulisaa stiʼ Dxiiñaʼ Stinu ra guiuundaʼ guiʼchiʼ riʼ, nuu ti lista ni zeeda iníʼ xi iráʼ hotel nga zanda iquiiñeʼ ora chuunu ca endaridagulisaa ca, ne lista riʼ zacá ni ra ricá iráʼ guiʼchiʼ ni riquiiñeʼ ra ridagulisaanu. Casi na cuadru zeeda lu yaza 5, unabaʼ cuartu si stiʼ ca hotel zeeda lu lista ca, ne udixe biaʼ cá si lu lista ca. Cadi cuídxiluʼ ndaaniʼ sti hotel para inabadiidxuʼ pa baratu cuquíxecabe cuartu para ca testigu stiʼ Jiobá ni cheʼ endaridagulisaa roʼ ca purtiʼ zábicabe lii baratu zuquíxecabe ca cuartu ca. Pa gúnitu casi zeeda raríʼ, zacanetu idxélarudu hotel baratu ne gaxha de ra raca ca endaridagulisaa ca (1 Cor. 14:40).
5 Naquiiñepeʼ nga inábaluʼ cuartu si ni dxandíʼ zaquiiñeluʼ ca dxi aca ca endaridagulisaa ca. Peru pa maʼ biaananeluʼ tuuxa ni deruʼ cayé ca endaridagulisaa ca inábaluʼ xiixa cuartu lu labe la? zanda gúniluʼ ni ne maʼ cadi inábaluʼ stiʼ stobi. Purtiʼ pa inábaluʼ stiʼ stuudxi la? sti bíchinu o bizánanu maʼ qué zadxélacaʼ cuartu para laacaʼ. Cada cuartu napa xidé chiné ni la binni ni chi iquiiñeʼ ni ca.
6 Galanpeʼ nga useenduʼ bueltu para cada cuartu ni inabuʼ ndaaniʼ hotel ca para cadi udii hotel ca ni sti binni. Pa despué de cuídxiluʼ iráʼ ca hotel ni zeeda lu lista ca ne qué idxélaluʼ cuartu, o napuʼ xiixa endanagana, zanda gábiluʼ ni secretariu nuu ra ridagulisaaluʼ. Laabe zaníʼnebe cani Ruyubi ra guiaana cani cheʼ endaridagulisaa roʼ ca —cadi Betel diʼ—, ne chinándabe cani cá ra ruzulú lista ca. Para cadi cuidxuʼ ndaaniʼ sti hotel ni cadi zeeda lu lista ca, uleza gueeda sti lista ni jma nacubi.
7, 8. Ximodo zanda acanenu cani caquiiñeʼ acanécabe laacaʼ.
7 Cani naquiiñeʼ acanenu. Proverbios 3:27 na: «Cadi gusaanaluʼ de gúniluʼ ni galán tuuxa ni caquiiñeʼ ni, pa lu naluʼ nuu gúniluʼ ni». Ximodo zanda acanenu xcaadxi para checaʼ endaridagulisaa roʼ ca yaʼ. Ca bíchinu ne ca bizánanu ni rucheeche diidxaʼ ni maʼ huaniisi, cani huará, cani runi xhiiñaʼ Reinu idubi dxi, zándaca caquiiñeʼ chuʼ tu acané laacabe para chécabe lu carru o uyúbinu ra guiaanacabe. Ca binnilídxicabe nga jma naquiiñeʼ acanecaʼ laacabe (1 Tim. 5:4). Peru pa qué zanda gúnicabe ni la? laanu naquiiñeʼ acanenu (Gál. 6:10). Ca binnigola ni rusiidiʼ ra nuu grupu ni ruundaʼ libru zaniʼnécabe cani rié ra nuu grupu stícabe ni caquiiñeʼ chuʼ tu acané laacaʼ, para gúʼyacabe aca iráʼ ni iquiiñeʼ ca binni ca dede ante ne aca cani jneza.
8 Cani zanda si icaa Solicitud de alojamiento para los que tienen necesidades especiales nga, cani rucheeche diidxaʼ ni qué zanda acané binnilidxi laacaʼ o qué zanda acané ca binni ridagulisaa ra riécabe ca laacabe para uyúbicaʼ ra guiaanacabe. Grupu ni Ruuyaʼ Dxiiñaʼ stiʼ ca Binni Ridagulisaa zuuyacabe pa ni rucheeche diidxaʼ ca runi iráʼ ni cá lu guiʼchiʼ ca ne ni na lu carta ni napa ca binnigola ni biree 14 stiʼ diciembre 2005. Guiʼchiʼ riʼ zacaa cani rucheeche diidxaʼ ni ne xiiñicaʼ pa nuucaʼ galán ne Jiobá, ne pa cadi feu xpiaʼcaʼ.
9. 1) Xiñee naquiiñeʼ chuunu endaridagulisaa roʼ ni nexheʼ chuunu. 2) Xi iráʼ ndiʼ riquiiñeʼ gúniluʼ pa pur modo nuuluʼ canabaʼ ni lii cheluʼ sti endaridagulisaa.
9 Ora chuunu sti endaridagulisaa roʼ. Para ganda chuʼ lugar ra cuitu, ra guiaanatu ne ugaanda icaa guiratu libru o xcaadxi cosa ni zaquiiñetu raqué, rinábadu cani rucheeche diidxaʼ checaʼ endaridagulisaa roʼ ra naquiiñeʼ checaʼ. Pa pur modo nuuluʼ riquiiñepeʼ cheluʼ ra chigaca sti endaridagulisaa roʼ la? unabadiidxaʼ secretariu stiʼ ca binni ridagulisaaneluʼ paneza chigaca ni, cá ni deche Solicitud de alojamiento para los que tienen necesidades especiales. Pa inábaluʼ ti lista racá ca hotel ni biyúbicabe para cani cheʼ endaridagulisaa ca, cadi guiaandaʼ lii useendaluʼ ti sobre ra icá laluʼ paladu ra lídxiluʼ, ne sácani. Pa chigácaruʼ xcaadxi endaridagulisaa roʼ ndaaniʼ guidxi ca, bicaa lu guiʼchiʼ ca padxí racaláʼdxiluʼ cheluʼ.
10. Xi zanda gúninu ti chuʼnu jma nayecheʼ lu endaridagulisaa roʼ de chonna gubidxa zeeda ca yaʼ.
10 Caquiiñeʼ tu acané. Dxandíʼ iranu ziéchenu chuunu ca endaridagulisaa ca, purtiʼ zabeendunu stale cosa de cani chiguizíʼdinu raqué ne ra idxaaganu ca bíchinu ne ca bizánanu para inínenu laacaʼ diidxaʼ ni acané laanu lu xquendanabáninu. Peru ziéchenu jma pa acanenu gúninu xiixa ra endaridagulisaa ca para ireeni jma galán (Hech. 20:35). Ca grupu ni ruuyaʼ dxiiñaʼ stiʼ endaridagulisaa roʼ, maʼ qué zandaa diʼ zanábacabe binni ni náʼ acané laacabe lu adxé adxé dxiiñaʼ nuu raqué. Zanda ácaluʼ tobi de cani chigacané ca la? (Sal. 110:3.)
11. Xi jma riuuláʼdxiluʼ de endaridagulisaa roʼ raca iráʼ iza, ne xi riquiiñeʼ ucaani lii guʼnuʼ yaʼ.
11 Lu ti endaridagulisaa ti baʼduhuiiniʼ de gaayuʼ iza guníʼ: «Endaridagulisaa de chonna gubidxa riʼ nga ra jma riuuladxeʼ guneʼ adorar Jiobá». Ca diidxaʼ biree ndaaniʼ ladxidóʼ baʼduhuiiniʼ riʼ rusihuínnini pabiáʼ riéchenu nga chuunu ca endaridagulisaa roʼ raca iráʼ iza. Runi sentirnu casi biʼniʼ sentir ni bicaa salmo riʼ ora biindaʼ: «Ti dxi lu patiu stiluʼ jma galán ni que ñaa ti mil lugar» (Sal. 84:10). Lu sti salmo, David uníʼ racalaʼdxiʼ chuʼ ra lidxi Jiobá idubi naca xquendanabani para gúʼyadxibe ne usisácabe yuʼduʼ stiʼ Jiobá (Sal. 27:4). Laabe, dxandipeʼ nga guyuuláʼdxibe chúʼnebe ca xpinni Jiobá tobi si. Laanu laaca zanda usihuínninu riuuláʼdxinu guni adorarnu Jiobá ra chuunu guionnaʼ gubidxa chigaca endaridagulisaa roʼ ni láʼ «Mayaca guilanu».
[Box on page 4]
Hora
Viernes ne sábadu
9.30 siadóʼ - 5.05 huadxí
Domingu
9.30 siadóʼ - 4.10 huadxí
Ximodo zanda inabuʼ cuartu ndaaniʼ ti hotel
1. Uníʼ pur teléfono hora dxiiñaʼ, ne biquiiñeʼ númeru ni cá lu lista stiʼ ca hotel ra zanda guiaanaluʼ.
2. Uníʼ cheluʼ endaridagulisaa roʼ stiʼ ca testigu stiʼ Jiobá.
3. Uníʼ xi dxi nga chiguiaanuʼ ndaaniʼ hotel ca.
4. Pa maʼ gastiʼ cuartu, uníʼ ndaaniʼ sti hotel zeeda lu lista ca.
5. Cadi quíxeluʼ pa inábacabe lii jma de ni cá lu lista ca.
6. Unabaʼ xcuártuluʼ, ne unabaʼ númeru ni rudiicabe para gannuʼ pa dxandíʼ uleecabe ni para lii.
7. Udixené tarjeta de créditu, cheque, o ne ti giru postal ne biseendani ndaaniʼ chii gubidxa. Qué chuʼ dxi useenduʼ buéltupeʼ. Pa quixuʼ ne cheque o ne giru postal la? bicaa nezalú ni númeru ni udii hotel ca lii.
Zanda uyúbitu cani zeeda raríʼ
◼ Biyubi guiaanaluʼ ndaaniʼ hotel si ni zeeda lu lista ca.
◼ Unabaʼ cuartu si ni dxandíʼ zaquiiñeluʼ.
◼ Cadi uchaaluʼ ni maca unabuʼ (Mat. 5:37).
◼ Cadi guiaana diʼ jma de tapa binni ndaaniʼ ti cuartu, neca nahuiinicabe, peru pa lu lista ca cá adxé cosa la? zanda chinándatu ni na ni.