Guendaridagulisaa de Chonna Gubidxa stiʼ ca Testigu stiʼ Jiobá 2007 «¡Chinándanu Cristu!»
1, 2. 1) Xi gudxi Moisés ca israelita que gúnicaʼ. 2) Xi naquiiñeʼ gúninu dede ca yanna.
1 Moisés gudxi ca israelita ne ca binni ni nabeza ndaaniʼ xquídxicabe guidagulisaacaʼ cada gadxe iza para gucaadiágacaʼ Ley stiʼ Dios. Xi para guidagulisaacabe yaʼ. Laabe gúdxibe laacaʼ: «Para gucaadiágatu ne guiziiditu» (Deu. 31:10-12). Casi bidúʼyanu ca, risácapeʼ nga para Jiobá guidagulisaa xquidxi. Nga runi, maʼ cadi candaa zápanu Guendaridagulisaa de Chonna Gubidxa ni láʼ «¡Chinándanu Cristu!».
2 Ñee maʼ cayuuluʼ listu la? Ñee caquiiñeʼ guinabuʼ permisu ra dxiiñaʼ la? Ñee zanda gacaneluʼ ca binni ruundaneluʼ Biblia o ca binnilídxiluʼ ni cadi nácacaʼ Testigu para checaʼ guendaridagulisaa ca la? Nuu ti bíʼchinu o ti bizáʼnanu ra ridagulisaanu ni caquiiñeʼ gacanenu laa la? Ñee caníʼ íqueluʼ cheluʼ sti guendaridagulisaa ra qué zié cani ridagulisaaneluʼ la? Ñee caquiiñeʼ guiaanuʼ ndaaniʼ ti hotel la? Cani zeeda lu guiʼchiʼ riʼ zacané cani lii para gúʼyaluʼ xi naquiiñeʼ gúniluʼ para cadi guiádxaluʼ guendaridagulisaa ca.
3. 1) Ca dxi stinu riʼ, ximodo cayaca ni ná Isaías 25:6. 2) Xi cahuinni cayaca ca viernes ca, ne xi naquiiñeʼ gúninu.
3 Guyé guionnaʼ gubidxa ca. Nabé stale ni rudii Jiobá xquidxi ti ganda guiziidicaʼ de laabe (Isa. 25:6). Caadxi de ca ni rudii Jiobá laanu rizíʼdinu cani lu guendaridagulisaa roʼ ni raca guiráʼ iza. Peru, lu ca guendaridagulisaa roʼ ca rihuinni jma huaxiéʼ binni rié viernes que xhupa gubidxa ca. Nga runi, gúninu stipa pur chuunu guionnaʼ gubidxa chigaca guendaridagulisaa ni maʼ gudixhe Jiobá gaca para laanu. Pa naquiiñeʼ guinabuʼ permisu ra rúniluʼ dxiiñaʼ la? guniʼné Jiobá de laani. Ne ora maʼ nannuʼ padxí chigápatu guendaridagulisaa stitu la? cadi guidxíbiluʼ ora guiníʼneluʼ patrón stiluʼ (1 Tes. 2:2; Neh. 2:4, 5). Zándaca jma jneza gábiluʼ patrón stiluʼ cheluʼ guendaridagulisaa ca purtiʼ chiguni adorarluʼ Jiobá racá. Pa dede ante guinábaluʼ permisu la? qué zácapeʼ nagana para patrón stiluʼ guyubi stobi para guni xhiiñaluʼ, ne zacá gudii permisu lii.
4. Ximodo gacanenu cani rúʼndanenu Biblia ne ca binnilídxinu ni cadi naca Testigu para checaʼ guendaridagulisaa roʼ ca.
4 Ximodo gacanenu cani rúʼndanenu Biblia ne ca binnilídxinu ti ganda checaʼ. Bixuiʼlú pabiáʼ sicarú nga cuineluʼ cani rúʼndanelu Biblia ra guendaridagulisaa de chonna gubidxa ca, ne gúʼyacabe laapecabe nadxiinu ca bíchinu ne ca bizánanu ni nuu ndaaniʼ xquidxi Jiobá (Sal. 22:25). Para cueecabe tiempu ne chécabe la? gudxi laacabe dede ante padxí nga nuu guendaridagulisaa roʼ ca. Gudxi laacabe xiñee riuuláʼdxiluʼ cheluʼ cani. Ne para gánnacabe ximodo raca cani la? biluíʼ laacabe videu ra rihuinni modo guca caadxi guendaridagulisaa roʼ, casi videu ni láʼ: Unidos gracias a la enseñanza divina. Guniné ca binnilídxiluʼ ni cadi naca Testigu xi cá íqueluʼ gúniluʼ. Zándaca guiale ndaaniʼ ladxidoʼcaʼ checaʼ neca dxi tiidiʼ drama o stobi de ca dxi gaca guendaridagulisaa roʼ ca.
5, 6. 1) Ximodo zanda gusihuínninu riuuláʼdxinu gudiʼnu ni nápanu casi na 1 Timoteo 6:18. 2) Xi zanda guni cani caquiiñeʼ gacanécabe laa guidxela paraa guiaana.
5 Gacanenu ca bíʼchinu ne ca bizáʼnanu. Apóstol Pablu gudxi ca xpinni Cristu ni gupa stale bidxichi ni bibani lu primé siglu «gaca cabe nachaʼhuiʼ, gacané cabe binni de idubi ladxidóʼ cabe, ne cadi gaca cabe naguibiʼ, sínuque iquiiñe cabe xpidxichi cabe para acané cabe stobi» (1 Tim. 6:17, 18). Zusihuínninu riuuláʼdxinu gacanenu cásica biʼniʼ Pablu pa guyúbinu gacanenu cani maʼ nagola, cani huará, cani cusiniisi xiiñiʼ stubi ne stuudxi ni caquiiñeʼ gacanenu laacaʼ para ganda checaʼ Guendaridagulisaa roʼ ca. Dxandíʼ, ca binnilídxicabe ni cayuundaʼ Biblia nga naquiiñeʼ gacané laacabe, peru ca binnigola ne cani rucheeche diidxaʼ naquiiñeʼ gúʼyacaʼ pa nuu tu caquiiñeʼ gacanécabe laa (Gál. 6:10; 1 Tim. 5:4).
6 Pa nuu tuuxa ra ridagulisaatu caquiiñeʼ gacanécabe laa para guidxela ti lugar ra guiaana la? Grupu ni Ruuyaʼ Dxiiñaʼ stiʼ ca Binni Ridagulisaa zuuyaʼ tu laa zanda guchaa guiʼchiʼ Solicitud de alojamiento para los que tienen necesidades especiales. Ante guseendacabe guiʼchiʼ riʼ ra nuu cani Ruyubi ra Guiaana binni la? naquiiñeʼ gúʼyabe guiráʼ ni zeeda lu guiʼchiʼ ca ne cani zeeda lu carta ni biree 14 stiʼ diciembre 2006 para ca binnigola.
7. Pa racaláʼdxiluʼ cheluʼ stiʼ guendaridagulisaa roʼ ni chigaca sti lugar, xi naquiiñeʼ guʼnuʼ.
7 Ni naquiiñeʼ guni cani racalaʼdxiʼ cheʼ sti guendaridagulisaa. Lu revista La Atalaya, 1 stiʼ Marzo 2007 zeeda ti lista ra cá guiráʼ guendaridagulisaa roʼ ni chigaca ndaaniʼ guidxi Méjicu ne Centroamérica. Pa caquiiñetu ti lista stiʼ ca hotel ni zanda guiaanatu ndaaniʼ o pa racaláʼdxitu gánnatu de stiʼ guendaridagulisaa roʼ ni chigaca sti lugar la? zanda gucaatu ti carta ra nuu cani chiguuyaʼ gaca guendaridagulisaa ni racaláʼdxitu chetu ca. Ne deche guiʼchiʼ Solicitud de alojamiento para los que tienen necesidades especiales ni jma nacubi napa secretariu ni ridagulisaanetu cá paraa zanda guseendatu carta ca. Ne ora guseendatu carta ca la? laguseendaʼ sti sobre ndaaniʼ ni ne naquiiñeʼ gápani timbre ne lagucaa paneza nabézatu luni para ganda guicabi cani cayuuyaʼ gaca guendaridagulisaa ca laatu.
8. Xi naquiiñeʼ gúninu pa racaláʼdxinu chiguiaananu ndaaniʼ ti hotel (biiyaʼ cuadru ra na «Ximodo zanda guinabuʼ cuartu ndaaniʼ ti hotel»).
8 Modo guni tobi para guinabaʼ ti cuartu. Ora guiluxe Guendaridagulisaa stiʼ Dxiiñaʼ Stinu ni chitiidiʼ lu semana 30 stiʼ abril la? zucaacabe ti lista ra ricá guiráʼ guiʼchiʼ ni riquiiñeʼ ra ridagulisaanu, ne lu lista riʼ cá xi guiráʼ hotel nga zanda iquiiñeʼ. Biʼniʼ guiráʼ ni zeeda lu cuadru ra na «Ximodo zanda guinabuʼ cuartu ndaaniʼ ti hotel». Pa cuídxiluʼ guiráʼ ca hotel ni zeeda lu lista ca ne qué guidxélaluʼ cuartu, o napuʼ xiixa guendanagana la? zanda gábiluʼ ni secretariu ni nuu ra ridagulisaaluʼ. Laabe zaníʼnebe cani Ruyubi ra Guiaana cani cheʼ guendaridagulisaa roʼ ne cadi naquiiñeʼ diʼ guiniʼbe Betel, sínuque naquiiñeʼ chinándabe cani cá ra ruzulú lista ca. Ne pa maʼ gastiʼ lugar ndaaniʼ ca hotel ni zeeda lu lista ca la? cadi cuidxuʼ sti hotel ni cadi zeeda lu lista ca, guleza gueeda sti lista ni jma nacubi.
9, 10. 1) Ante gápanu guendaridagulisaa roʼ stinu, xi guiráʼ maʼ biʼniʼ ca bíʼchinu ne ca bizáʼnanu. 2) Ximodo zanda gusihuínninu rusisácanu ne rudiʼnu xquíxepeʼ guiráʼ dxiiñaʼ ni bíʼnicabe pur laanu (biindaʼ Hebreos 13:17).
9 Gucané. Ora chindanu ra chigaca guendaridagulisaa ca, rihuinni dxíchica guiráʼ dxiiñaʼ gucaʼ para chuʼ lugar ca listu. Rihuinni nadxii ca bíʼchinu laanu purtiʼ ridxaagalucaʼ laanu, rudiicaʼ ti programa ne racanecaʼ para guidxela ti lugar cuinu. Dede ante la? ca bíʼchinu ne ca bizáʼnanu bisiacaʼ lugar ca ne biʼniʼ chaahuicaʼ plataforma. Ne cani chigutiidiʼ libana luni la? laaca maʼ bíʼnicaʼ stale dxiiñaʼ dede ante, ne laaca guca stale dxiiñaʼ para biyúbicabe hotel ni jma baratu ne para bíʼnicabe guiráʼ dxiiñaʼ huiiniʼ ni naquiiñeʼ gaca.
10 Guiráʼ ca guendaridagulisaa roʼ ni gaca la? riuu stale binni runi dxiiñaʼ chupa chonna beeu ante gácacani. Ne cumu rudii binnilídxicabe lugar gúnicabe dxiiñaʼ nabé risaca riʼ la? laaca racanecaʼ gaca dxiiñaʼ riʼ. Ñee cadi dxandíʼ nuunu nayecheʼ purtiʼ bidiicabe tiempu ne stipa stícabe para chuʼ ca cosa ca listu la? Zanda gusihuínninu nuunenu laacabe nayecheʼ ra gúninu guiráʼ ni cayeeteʼ lu guiʼchiʼ riʼ, ne zaqueca pa gabirúcabe laanu gúninu xiixa ante gápanu guendaridagulisaa stinu (Heb. 13:17). Pa guiale de ndaaniʼ ladxidoʼno gacanenu la? zanda gata chaahuiʼ ca cosa ca ne guiráʼ ni zaca cani jneza (1 Cor. 14:40).
11. 1) Xiñee nabé risaca ca guendaridagulisaa ni rapa xquidxi Dios ca dxi stinu riʼ. 2) Xi naquiiñeʼ gúniluʼ.
11 Cumu «ma zeeda dxiña dxi» stiʼ Dios la? nabé risaca ca guendaridagulisaa ni rapa xquídxibe nga runi cadi naquiiñeʼ guiáʼdxanu cani (Heb. 10:25). Lu ca guendaridagulisaa roʼ ca rudii mozo ni nuu xpiaaniʼ ne ni runi jneza laanu stale guiʼchiʼ para ganda guzúʼbanu stiidxaʼ Jiobá (Deu. 31:12). Nga runi, rinábadu laatu dede ca yanna chuʼtu listu ti chetu guionnaʼ gubidxa stiʼ guendaridagulisaa roʼ ni láʼ «¡Chinándanu Cristu!» ti ganda guizíʼdirunu jma ne gacanésaanu laanu.
[Box on page 3]
Hora
Viernes ne sábadu
9.20 siadóʼ - 5.05 huadxí
Domingu
9.20 siadóʼ - 4.10 huadxí
[Box on page 4]
Ximodo zanda guinabuʼ cuartu ndaaniʼ ti hotel
1. Guníʼ pur teléfono hora dxiiñaʼ, ne biquiiñeʼ númeru ni cá lu lista stiʼ ca hotel ra zanda guiaanaluʼ.
2. Guníʼ cheluʼ guendaridagulisaa roʼ stiʼ ca testigu stiʼ Jiobá.
3. Guníʼ xi dxi nga chiguiaanuʼ ndaaniʼ hotel ca.
4. Pa maʼ gastiʼ cuartu, guníʼ ndaaniʼ sti hotel zeeda lu lista ca.
5. Cadi quíxeluʼ pa guinábacabe lii jma de ni cá lu lista ca.
6. Gunabaʼ xcuártuluʼ, ne gunabaʼ númeru ni rudiicabe para gannuʼ pa dxandíʼ guleecabe ni para lii.
7. Gudixené tarjeta de créditu, cheque, o ne ti giru postal ne biseendaʼ ni lu chii gubidxa. Qué chuʼ dxi guseenduʼ bueltu. Pa quiʼxuʼ ne cheque o ne giru postal la? bicaa nezalú ni númeru ni gudii hotel ca lii.
Rinábadu laatu gúnitu cani zeeda raríʼ
◼ Biyubi guiaanaluʼ ndaaniʼ hotel si ni zeeda lu lista ca.
◼ Cadi cuídxiluʼ ca hotel ni cadi zeeda lu lista ca para guinabadiidxuʼ pa nápacabe ti preciu cuquíxecabe cani cheʼ guendaridagulisaa roʼ. Guníʼ RA NUU SI ca hotel ni zeeda lu lista ca ni zanda guiaanatu ndaaniʼ.
◼ Ndaaniʼ ca hotel ca qué zanácabe cueenu cuartu ante gápanu Guendaridagulisaa stiʼ Dxiiñaʼ Stinu ni chigaca semana 30 stiʼ abril 2007. Nga runi cadi guinábaditu cuartu ante de fecha ca.
◼ Gudixe biaʼ cá si lu lista ca.
◼ Naquiiñeʼ guicá lá binni ni chiguiaana ndaaniʼ cuartu ca ora cueecabe lugar ca.
◼ Biquiiñeʼ ca númeru de teléfono ni cá lu lista ca. Cadi guinabuʼ cuartu stiluʼ pur Internet, zanda guʼnuʼ ni pa zeeda lu lista ca gácani zacá.
◼ Ndaaniʼ ca hotel ca maca nexheʼ panda binni chuʼ ndaaniʼ cada cuartu purtiʼ pa guicá gui racá la? zanda guireecabe nagueenda.
◼ Cadi gábiluʼ secretariu ni nuu ra ridagulisaaluʼ maʼ gastiʼ lugar ra guiaanuʼ pa caʼruʼ guiniʼluʼ ndaaniʼ GUIRÁʼ hotel cá lu lista ca.
◼ Pa maʼ gunabuʼ ti cuartu la? cadi guchaaluʼ ni (Mat. 5:37).
◼ Pa pur xiixa maʼ qué zanda guiaanuʼ ndaaniʼ cuartu stiʼ hotel ni maca guleeluʼ ca guniʼné laacabe nagueenda ne biiyaʼ guxhiácabe laluʼ.