Guendaridagulisaa de Chonna Gubidxa stiʼ ca Testigu stiʼ Jiobá 2008
1. 1) Xiñee racané conseju bidii Pablu ca hebreu que laanu yanna (biindaʼ Hebreos 10:24, 25). 2) Xii nga naquiiñeʼ guyúbinu tiempu riʼ ti chinándanu conseju guníʼ Pablu.
1 Apóstol Pablu bisietenalaʼdxiʼ ca xpinni Cristu ca hebreu pabiáʼ risaca guidagulisaacaʼ ne gacanésaacaʼ purtiʼ biiyacaʼ maʼ zeeda dxiña dxi (Heb. 10:24, 25). Dxi ni guníʼ Pablu que maʼ nuuni gaxha ne cayuuyaʼ dxiichinu ni tiempu riʼ. Nga runi, cuyúbinu ximodo guidagulisaanenu ca bíʼchinu ne ca bizáʼnanu ne guizíʼdinu de Jiobá, purtiʼ nga zacané laanu lu ca dxi «jma nagana» nabáninu riʼ (2 Tim. 3:1). Guendaridagulisaa roʼ de chonna gubidxa 2008 ni chigápanu ca zacané ni laanu guidxaaganu ca bíʼchinu ne bizáʼnanu.
2. 1) Xiñee naquiiñepeʼ nga chuunu guionnaʼ gubidxa chigaca guendaridagulisaa ca. 2) Xi zanda gúniluʼ para ganda cheluʼ guendaridagulisaa ca.
2 Guyé guionnaʼ gubidxa ca. Galán pa gúniluʼ stipa cheluʼ guionnaʼ gubidxa chigaca guendaridagulisaa ca. Ca diidxaʼ «cadi guni nu casi cani rusaana de [guidagulisaa]», rusiidiʼ cani laanu cadi gusaananu de guizíʼdinu guiráʼ ni chiguieeteʼ lu guendaridagulisaa ca, purtiʼ nabé zacané cani laanu (Heb. 10:25). Dede ca yanna zanda guyúbiluʼ ximodo cuaquiʼ chaahuiluʼ cani chigúniluʼ. Naquiiñeʼ guinábaluʼ permisu patrón stiluʼ dede ca yanna ti gúʼyabe ximodo quixhe chaahuibe dxiiñaʼ cayúniluʼ. Pa gapa ca xiiñitu clase dxi chigaca guendaridagulisaa ca la? laguiniʼné ca maestru ca de laani ne lagabi laacabe chiguni adorartu Jiobá raqué. Dxandipeʼ zaguu ndaayaʼ Jiobá stipa stitu pa gúnitu ni na Reinu stiʼ Dios primé lu xquendanabánitu (Mat 6:33).
3. Xi zanda gúninu para gacanenu xcaadxi binni.
3 Gacanenu stobi para cheʼ guendaridagulisaa roʼ. Pablu laaca gudxi ca biʼchiʼ gacanésaacaʼ (Heb. 10:24). Ñee nuu tuuxa bíʼchinu o bizáʼnanu ni nuu lade grupu ni ruundaʼ libru ni caquiiñeʼ gacanécabe laa ti ganda cheʼ guendaridagulisaa ca la? Ñee zanda gacaneluʼ cani ruundaneluʼ Biblia para chinecaʼ lii neca ti dxi la? Ora guiníʼneluʼ binnilídxiluʼ ni cadi naca xpinni Cristu xi racaláʼdxiluʼ gúniluʼ para cheluʼ guendaridagulisaa ca la? laaca zanda guni invitarluʼ laacabe. Zándaca gudii gana laacabe chécabe pur modo guiníʼneluʼ laacabe.
4. Paraa zanda guidxélanu ra cá padxí ne paraa chigaca ca guendaridagulisaa de chonna gubidxa.
4 Ximodo gánnanu padxí ne paraa chigaca guendaridagulisaa roʼ. Guiráʼ iza, gayuaa bíʼchinu ne bizáʼnanu riníʼ Betel para guinabadiidxacaʼ padxí ne paraa chigaca ca guendaridagulisaa ca neca maʼ nápacabe ra cá paraa chigaca cani. Rinábadu laatu ante guiniʼtu Betel gúʼndatu revista La Atalaya 1 stiʼ marzo 2008 diidxastiá.
5. Pa racaláʼdxiluʼ gánnaluʼ paraa guiaanaluʼ ora cheluʼ ti guendaridagulisaa ra qué zie cani ridagulisaaneluʼ, xi naquiiñeʼ gúniluʼ.
5 Pa cheluʼ sti guendaridagulisaa roʼ ra qué zie cani ridagulisaaneluʼ ne racaláʼdxiluʼ gánnaluʼ paraa zanda guiaanaluʼ la? bicaa ti carta ra nuu cani chiguuyaʼ gaca guendaridagulisaa ni racaláʼdxiluʼ cheluʼ ca ne deche guiʼchiʼ Solicitud de alojamiento para los que tienen necesidades especiales cá paraa zanda guseendaluʼ carta ca. Qué zandaa zacaa ca secretariu ca caadxi de ca guiʼchiʼ ca. Para guicábicabe lii la? biseendaʼ sti sobre ndaaniʼ carta guseendaluʼ ca, ne bicaa timbre luni ne paneza nabézaluʼ.
6. Guníʼ pora nga zanda iquiiñenu Solicitud de alojamiento para los que tienen necesidades especiales.
6 Cani naquiiñeʼ gacanenu. Ora guinabaʼ ti ni rucheeche diidxaʼ gacanécabe laa para guidxela ti lugar guiaana la? Grupu ni Ruuyaʼ Dxiiñaʼ stiʼ ca Binni Ridagulisaa zuuyacaʼ pa zanda guicaa ni rucheeche diidxaʼ ca ti Solicitud de alojamiento para los que tienen necesidades especiales para gudiicabe laa tobi. Óraca, Grupu ca zuundaʼ guiʼchiʼ ca ne carta 14 stiʼ diciembre 2007 ni gucuaa ca binnigola. De racá la? maʼ zanda guseendaʼ secretariu stiʼ neza binni ridagulisaa ca guiʼchiʼ ca ra nuu cani Ruyubi ra Guiaana binni.
7. Ximodo zanda gacanenu ca bíʼchinu ni maʼ biyubi ra guiaananu (biiyaʼ cuadru ra na «Xi naquiiñeʼ gúninu para guyúbinu ra guiaananu»).
7 Modo gúninu para guinábanu cuartu. Ora guiluxe Guendaridagulisaa stiʼ Dxiiñaʼ Stinu ni chitiidiʼ lu semana 5 stiʼ mayo la? zucaacabe ti lista ra cá guiráʼ hotel ra ridagulisaanu, ne lu lista riʼ cá xi guiráʼ hotel nga zanda iquiiñeʼ. Ante guinabuʼ cuartu ndaaniʼ xiixa hotel bibiguetaʼ biindaʼ cani cá lu ca cuadru ra na «Xi naquiiñeʼ gúninu para guyúbinu ra guiaananu» ne «Ximodo zanda guinabuʼ cuartu ndaaniʼ ti hotel». Cadi quíxeluʼ jma de biaʼ naquiiñeʼ ne cadi guiniʼluʼ ndaaniʼ ti hotel ni cadi zeeda lu lista ca. Pa maʼ qué guidxélaluʼ cuartu ndaaniʼ ca hotel ni zeeda lu lista ca la? guleza gueeda sti lista ni jma nacubi.
8. 1) Ximodo rusisácanu lá Jiobá ora riuunu guendaridagulisaa stinu. 2) Xi huaníʼ ca binni ni runi dxiiñaʼ ndaaniʼ ca hotel ca de modo naca ca bíʼchinu ne ca bizáʼnanu.
8 Gusihuínninu cayúninu guiráʼ ni cazíʼdinu. Ra guzúʼbanu stiidxaʼ Jiobá de guidagulisaanu para guni adorarnu laabe la? zabeendunu ni galán. Ne ra guidagulisaanu zanda gusisácanu labe (Isa. 48:17). Zanda gusihuínninu pabiáʼ nacháʼhuinu pur cani gúninu ora maʼ guidagulisaanenu guiráʼ ca bíchinu lu guendaridagulisaa de chonna gubidxa, ne stale binni ridxagayaa modo laanu dede rucaani laaca guiniʼcaʼ xi riníʼ íquecaʼ (1 Tim. 5:25). Ti guidxi ra maʼ stale iza huayaca guendaridagulisaa riʼ, ti hombre ni naca gerente stiʼ ti hotel guníʼ sicaríʼ: «Stale binni de ndaaniʼ guidxi riʼ ruzeetecaʼ ximodo nga ca testigu stiʼ Jiobá ne ximodo racané ca guendaridagulisaa stícabe guidxi riʼ. Nánnadu ximodo rusiácabe ra rúnicabe guendaridagulisaa stícabe, ne ra ruzuhuaa carru stícabe. Nayéchepeʼ nga nuudu chúʼcabe raríʼ ca dxi riʼ. Ribézadu cadi gusaana de gueedacabe ra nuudu». Sti hombre ni naca gerente ndaaniʼ sti hotel bizeeteʼ ximodo gupa guendanagana ne caadxi grupu ne artista ora yeguiaanacaʼ raqué, guníʼsibe ni bizaaca que bizeetebe de ca testigu stiʼ Jiobá ni huayaana ndaaniʼ hotel que ne nabe racanésaacaʼ ne nabé nacháʼhuicaʼ. Nabe: «¡Pa ñanda guiráʼ cani ñaana ndaaniʼ hotel riʼ ñácacaʼ casi ca testigu stiʼ Jiobá!». Nanna dxíchinu, pa gácanu nachaʼhuiʼ la? cadi zaníʼ sícabe galán de laanu, sínuque zusiéchenu ladxidóʼ Jiobá, Dios stinu.
9. Casi na Mateo 4:4, xiñee risácapeʼ nga gucaadiaga chaahuinu guiráʼ cani chiguieeteʼ lu guendaridagulisaa ca.
9 Jesús guníʼ, zápanu guendanabani pa gucaadiáganu «ca diidxa ni iree de ruaa Dios» (Mat. 4:4). Lu ca guendaridagulisaa ni rápanu guiráʼ iza ca, Jiobá rudii laanu ni caquiiñenu ne riquiiñebe «mozo ni nuu xpiaaniʼ ne ni runi jneza» para gudii cani laanu (Mat. 24:45). Nabé stale dxiiñaʼ nga raca ora maʼ chiganda guendaridagulisaa stinu ne ora maʼ cayaca ni. Nga runi, gudiʼnu xquíxepeʼ Jiobá purtiʼ rapa laanu ne stale guendarannaxhii ne zusihuínninu ni pa chuunu ne gucaadiaga chaahuinu guiráʼ ni chiguieeteʼ lu ca guendaridagulisaa chigápanu ca.
[Box on page 4]
Hora
Viernes ne sábadu
9.20 siadóʼ - 4.55 huadxí
Domingu
9.20 siadóʼ - 4.00 huadxí
[Box on page 5]
Xi naquiiñeʼ gúninu para guyúbinu ra guiaananu
◼ Cadi guinabuʼ ti cuartu ndaaniʼ xiixa hotel ante gápacabe Guendaridagulisaa stiʼ Dxiiñaʼ Stinu semana 5 stiʼ mayo 2008.
◼ Pa ganda la? gunabaʼ cuartu guiaanaluʼ lu beeu mayo. Cadi guinábaluʼ ni lu Internet; cadi caquiiñedidu ni.
◼ Biyubi guiaanaluʼ ndaaniʼ hotel si ni zeeda lu lista ca.
◼ Gudixe biaʼ cá si lu lista ca.
◼ Naquiiñeʼ guicá lá binni ni chiguiaana ndaaniʼ cuartu ca ora guinábacabe ni.
◼ Para guʼnuʼ ni maca nexheʼ gaca ndaaniʼ hotel ca ora guicá guí xiixa la? naquiiñeʼ uguuluʼ ndaaniʼ cuartu ca biaʼ binni si ni cá lu lista ca.
◼ Pa maʼ gunabuʼ ti cuartu la? cadi guchaaluʼ ni (Mat. 5:37).
◼ Cadi cuídxiluʼ ca hotel ni cadi zeeda lu lista ca para guinabadiidxuʼ pa nápacabe ti preciu para cani cheʼ guendaridagulisaa roʼ.
◼ Ora maʼ guniʼluʼ ndaaniʼ GUIRÁʼ ca hotel zeeda lu lista ca ne qué guidxeʼluʼ cuartu o gapuʼ xiixa guendanagana la? guniʼné secretariu ni nuu ra ridagulisaaluʼ. Laabe zaniʼbe ra nuu Cani Ruyubi ra Guiaana Binni.
◼ Pa pur xiixa maʼ qué zanda guiaanuʼ ndaaniʼ cuartu stiʼ hotel ni maca guleeluʼ ca guniʼné laacabe nagueenda, ne biiyaʼ guxhiácabe laluʼ.
Ximodo zanda guinabuʼ cuartu ndaaniʼ ti hotel
1. Guníʼ pur teléfono hora dxiiñaʼ, ne biquiiñeʼ númeru ni cá lu lista stiʼ ca hotel ra zanda guiaanaluʼ ti quíxeluʼ biaʼ naquiiñeʼ quixe cani cheʼ guendaridagulisaa ca.
2. Guníʼ cheluʼ guendaridagulisaa roʼ stiʼ ca testigu stiʼ Jiobá.
3. Guníʼ xi dxi nga chiguiaanuʼ ndaaniʼ hotel ca ne xi dxi zareeluʼ ndaaniʼ ni.
4. Pa maʼ gastiʼ cuartu la? guníʼ ndaaniʼ sti hotel zeeda lu lista ca.
5. Gunabaʼ xcuártuluʼ, ne gunabaʼ númeru ni rudiicabe para gannuʼ pa dxandíʼ guleecabe ni para lii.
6. Gudixené tarjeta de créditu, cheque, o ne ti giro postal ne nápalu chii gubidxa para guseendaluʼ ni. Qué chuʼ dxi guseenduʼ bueltu. Pa quiʼxuʼ ne cheque o ne giro postal la? bicaa nezalú ni númeru ni gudii hotel ca lii.