Jiobá cusiidiʼ laanu gúninu xhiiñaʼ jneza

Capítulo 9

Modo zanda gucheechenu diidxaʼ

Jesucristu, hombre ni biseendaʼ Jiobá lu guidxilayú riʼ, nabé bisisácabe dxiiñaʼ ni gucuaabe. Bicheechebe ca diidxaʼ nacubi ne galán stiʼ Reinu stiʼ Dios ne stale gana, ngue runi beeda gácabe ti ejemplu para ca xpínnibe. Biyúbibe binni para guiníʼnebe ne gusiidibe laacaʼ ne bíʼnibe ra lídxicaʼ ne ra nuu stale binni (Mat. 9:35; Luc. 8:1). Nuu tiru guniʼné Jesús binni stubi si, ca discípulo stibe laaca bisiidibe laacaʼ ora maʼ nuucaʼ laasicaʼ ne bisiidibe stale binni (Mat. 13:36; Mar. 4:10-13; 6:35-44; Juan 3:2-21). Ra tiica nuube biyúbibe modo uguube gana binni ne bisiidibe Reinu si stiʼ Dios nga zanda gacané laacaʼ (Luc. 4:16-19). Jesús qué nusaana diʼ de nucheeche diidxaʼ, dede ora chiguiziiláʼdxibe, chitobe gueta o chiguebe nisa guníʼnebe binni de Stiidxaʼ Dios (Mar. 6:30-34; Juan 4:4-34). Ni biʼniʼ Jesús que bicaani ca apóstol stibe gúnicaʼ casi bíʼnibe. Ora maʼ cayúʼndanu Biblia ra caníʼ ximodo bicheeche Jesús diidxaʼ ne stale gana, cadi dxandíʼ laaca riguu cani gana laanu gúninu casi bíʼnibe la? (Mat. 4:19, 20; Luc. 5:27, 28; Juan 1:43-45.)

Yanna, guidúʼyanu modo zanda gucheechenu diidxaʼ ca dxi stinu riʼ, ne zacá gúninu dxiiñaʼ ni bizulú Jesucristu raca biaʼ chupa mil iza.

GUCHEECHENU DIIDXAʼ DE YOO PUR YOO

Ca dxi stinu riʼ, ca testigu stiʼ Jiobá nánnacaʼ pabiáʼ risaca nga gucheechecaʼ ca diidxaʼ nacubi ne galán stiʼ Reinu stiʼ Dios de yoo pur yoo, ne gúnicaʼ ni modo maca nexheʼ gácani. Ora guʼyaʼ binni tuuxa canagucheeche diidxaʼ de yoo pur yoo la? nánnacabe ti testigu stiʼ Jiobá cayúnini. Cahuinni caguu ndaayaʼ Jiobá dxiiñaʼ riʼ, purtiʼ nagueenda cadxélanu stale binni ni riuulaʼdxiʼ guiziidiʼ de Stiidxaʼ Dios (Mat. 11:19; 24:14). Ne ora rucheechenu diidxaʼ de yoo pur yoo la? rusihuínninu nadxiinu Jiobá ne nadxiinu binni (Mat. 22:34-40).

Cadi deruʼ nga bizulú ca testigu stiʼ Jiobá gucheechecaʼ diidxaʼ de yoo pur yoo. Dede dxi bibani ca apóstol que maca rúnicabe dxiiñaʼ riʼ. Apóstol Pablu gudxi ca xaíque stiʼ neza binni ridagulisaa stiʼ Éfeso modo bisiidibe binni ra lídxicaʼ. Guniʼbe: «Dede primé dxi bedandaya Asia. [...] Qué nucaache gastiʼ, sínuque byue nia laatu irá ni zacané laatu para uzuhuaa chaahui tu. Bisiide laatu ra nuu tu irá tu tobi si, ne zaqueca ra yeganna laatu ralidxi tu». Zacá bicheeche Pablu diidxaʼ ne biyúbirube xcaadxi modo bíʼnibe ni ne zaqué bisiidibe «ca judíu ne zaqueca cani cadi judíu inaba ca perdón Dios ne guni cre ca Señor Jesucristu stinu» (Hech. 20:18, 20, 21). Cumu ca dxi stiʼ Pablu que ca emperador ni guyuu Roma bicaacabe binni guni adorarcaʼ bidóʼ, ne stale de laacaʼ maʼ cayúnicaʼ ni la? ngue runi caquiiñeʼ ganna ca binni que ca diidxaʼ nacubi ne galán stiʼ Reinu stiʼ Dios nagueendaca. Laaca caquiiñeʼ guyúbicabe Dios ni bizáʼ «guidxilayú ne irá ni nuu ndaani ni», Dios ni gudxi «binni de irá ladu inaba perdon laabe» (Hech. 17:22-31).

Ca dxi nabáninu riʼ jma caquiiñeʼ guireeche ca diidxaʼ nacubi ne galán stiʼ Reinu sti Dios riʼ. Mayaca guinitilú guiráʼ cosa malu nuu ndaaniʼ guidxilayú riʼ, ne stale binni zándaca gati. Nga runi, ante guinitilú guiráʼ ca guendaquéiquiiñeʼ ca, naquiiñeʼ gúninu stipa pur gucheechenu diidxaʼ de yoo pur yoo biaʼ gándatiʼ, purtiʼ laani nga ti modo ni jma galán para guidxélanu binni ni riuulaʼdxiʼ gucaadiaga ca diidxaʼ zinenu. Ca dxi riʼ laaca cadxélanu stale binni ni riuulaʼdxiʼ guiziidiʼ de Dios, cásica gúcani ca dxi bibani Jesús ne ca apóstol que, ne laaca riuʼnu nayecheʼ ora rúninu dxiiñaʼ riʼ (Mar. 13:10).

Ñee rucheecheluʼ diidxaʼ de yoo pur yoo ne stale gana biaʼ gándatiʼ la? Pa lii qué rusaanaluʼ de gúniluʼ ni la? ziuuluʼ nayecheʼ ne zuni sentirluʼ galán purtiʼ cayuʼnu xhiiñaʼ Dios (Eze. 9:11; Hech. 20:35). Zándaca gaca nagana gúniluʼ ni pur xiixa guendahuará ni napuʼ o purtiʼ neza ra rucheecheluʼ diidxaʼ qué riuulaʼdxiʼ binni gucaadiaga. O zándaca nuu lugar qué náʼ diʼ gobiernu gúniluʼ dxiiñaʼ riʼ. Laaca zándaca raca nagana para lii gucheecheluʼ diidxaʼ de yoo pur yoo purtiʼ ridxíbiluʼ ora rireeluʼ lu guidxi o raca nagana para lii guiníʼneluʼ binni. Pa zacá rácaluʼ la? cadi guireeluʼ gana (Éxo. 4:10-12). Stale bíʼchinu ne bizáʼnanu zacaca rácacaʼ.

Jesús gudxi ca discípulo stiʼ: «Qué ziuu dxi ixele de laatu dede dxi iluxe guidxilayú» (Mat. 28:20). Ca diidxaʼ riʼ riguu cani gana laanu ne rudii cani stipa laanu para gacanenu binni gaca xpinni Cristu. Naquiiñeʼ gácanu binni nadxibalú ne guni crenu zacané Dios laanu cásica modo biʼniʼ cré Pablu. Laabe guniʼbe lu Filipenses 4:13: «Para guiráʼ cosa zanda guneʼ purtiʼ cudii Dios poder naa». Biʼniʼ stipa pur cheluʼ guiráʼ ca guendaridagulisaa raca ante chigucheecheluʼ diidxaʼ ni raca guiráʼ semana ra ridagulisaaluʼ. Ora chigucheecheluʼ diidxaʼ ne xcaadxi xpinni Cristu la? zanda gacanécabe lii ne zuguucabe gana lii gucheecheluʼ diidxaʼ jneza ne gusaananeluʼ binni libru ne revista. Biʼniʼ orar Jiobá ti gacané lii gápaluʼ jma fe para ganda gudxiiluluʼ intiica guendanagana ni gápaluʼ, ne bicheeche diidxaʼ ne stale gana (Luc. 17:5).

Pa lii qué gusaanaluʼ de gucheecheluʼ diidxaʼ la? zadxaagaluluʼ stale binni ne zanda gusiéneluʼ laacabe de cani runi creluʼ, ne ra gúniluʼ ni zaguidxi fe stiluʼ (1 Ped. 3:15). Ra gúniluʼ ni laaca zacaneni lii gudiiluʼ cuenta tupeʼ nga ca binni runi cré zuni chaahuiʼ Reinu stiʼ Dios modo nabáninu. Cásica ora guidxélaluʼ ca binni ni riuulaʼdxiʼ guiziidiʼ de Dios ne cani qué riuulaʼdxiʼ, zudiiluʼ cuenta zinándaluʼ conseju bidii Jesús ca discípulo stiʼ ni zeeda lu Mateo 10:11-14. Laaca ziuuluʼ nayecheʼ purtiʼ nánnaluʼ zinándaluʼ mandatu bidii Jesús ora guníʼ: «Lagaca casi biaani», ne dede zanda gusiidiluʼ tuuxa de Dios ne zacá guicaabe guendanabani ni qué ziuu dxi guiluxe (Mat. 5:16; Juan 17:3; 1 Tim. 4:16).

Laaca raca guendaridagulisaa para guireeche diidxaʼ de yoo pur yoo, ca sábadu ne domingu ne ndaaniʼ semana. Ora raca nagana para cani rucheeche diidxaʼ guidxélacaʼ binni ra lidxi ridxí la? nuu tiru rúnicabe ni ora maʼ zixhinni. Ne huahuinni jma stale binni riuulaʼdxiʼ gucaadiaga laanu huadxí ne ora maʼ zixhinni qué ziadóʼ. Peru nuuruʼ xcaadxi modo zanda guinínenu binni de Stiidxaʼ Dios neza ra rucheechenu diidxaʼ.

GUYÚBINU CA BINNI RIUULAʼDXIʼ GUIZIIDIʼ DE DIOS

Jesús biʼniʼ mandar ca discípulo stiʼ: «Lainaba diidxa ralidxi tuuxa ni nachaʼhuiʼ» (Mat 10:11). Para gunda bidxela Jesús ca binni nachaʼhuiʼ ne cani riuulaʼdxiʼ guiziidiʼ la? bicheechebe diidxaʼ ra tiica nuube ne cadi de yoo pur yoo si (Luc. 8:1; Juan 4:7-15). Ca apóstol stiʼ Jesús laaca bicheechecaʼ diidxaʼ guiráʼ ladu (Hech. 17:17; 28:16, 23, 30, 31).

Ca dxi stinu riʼ, ora rucheechenu diidxaʼ laaca ricá íquenu guinínenu guiráʼ xixé binni de ca diidxaʼ nacubi ne galán stiʼ Reinu stiʼ Dios, cásica biʼniʼ Jesús ne ca xpinni. Para ganda gúninu ni la? naquiiñeʼ guyúbinu modo guinínenu binni cásica bíʼnicabe ni, ne gánnanu xi cazaaca lu guidxilayú ne modo nabani binni neza ra rucheechenu diidxaʼ (1 Cor. 7:31).

Caquiiñeʼ gucheechenu diidxaʼ de yoo pur yoo, peru laaca nápanu xidé guyúbinu ca binni ni riuulaʼdxiʼ guiziidiʼ de Stiidxaʼ Dios ra tiica nuucaʼ. Ora rucheechenu diidxaʼ neza ra rutoo binni la? nabé ridxélanu binni ni riuulaʼdxiʼ guiziidiʼ. Ndaaniʼ stale guidxi roʼ ca bíʼchinu ne ca bizáʼnanu huadxélacaʼ binni riuulaʼdxiʼ guiziidiʼ ora rucheechecaʼ diidxaʼ lu calle, ndaaniʼ parque, ra ruzuhuaa carru, ora maʼ zecaʼ lu carru o ratiica nuu binni. Ne cumu huayúnicabe ni zacá la? stale binni ni qué riuu ra lidxi ora rié ca Testigu ra nuucaʼ la? huacaadiágacaʼ ca diidxaʼ nacubi ne galán stiʼ Reinu stiʼ Dios.

Ti modo jma galán para gucheechenu diidxaʼ ca lugar ra nuu stale binni nga gusaananu ca revista Torre stiʼ ni rapa ne ¡Despertad! Ora gúninu ni zacá la? zúninu stipa pur guluinu tema ni zeeda lu revista ca. Ca binni ni riuulaʼdxiʼ guiziidiʼ la? zanda gusaananenu laacabe ca libru ne revista nápanu ne zanda guiaananenu laacabe guibiguétanu chigánnanu laacabe ralídxicabe. Xhiiñaʼ Reinu ni Rúninu ni riree guiráʼ beeu ruzeeteʼ ximodo zanda gúninu ni ne laaca riguuni gana laanu gucheechenu diidxaʼ gadxé gadxé modo. Zanda gúninu jma lu xhiiñaʼ Dios pa gucheechenu diidxaʼ ra tiica nuu binni.

Peru cadi dxiiñaʼ si stinu nga guninenu binni xi chigaca ne gucheechenu diidxaʼ. Coʼ. Pa nápanu gana gaca ca binni ni cucaadiaga laanu xpinni Dios ne guicaacaʼ guendanabani ni qué zaluxe  la? nápanu xidé chigánnanu laacabe stale biaje para ganda guiniisicabe lu Stiidxaʼ Dios ne gácacabe xpinni Cristu.

GUIBIGUÉTANU RA NUU BINNI STI BIAJE

Jesús gudxi ca xpinni zuíʼcabe stiidxabe lu «idubi naca guidxilayú» (Hech. 1:8). Ne laaca gúdxibe laacaʼ: «Nga runi laché irá xixé guidxi, lachiusiidi irá xixé binni sa nanda naa, [...] Lausiidi laaca guni ca irá ni ma gudxe laatu» (Mat. 28:19, 20). Pa laanu chigánnanu binni stiʼ biaje la? ziuʼnu nayecheʼ. Ca binni guníʼneluʼ de Stiidxaʼ Dios ne guyuuláʼdxicaʼ ora yegánnaluʼ laacaʼ primé biaje la? zándaca gucaadiágacabe lii pa chigánnaluʼ laacabe stiʼ biaje. Pa guiníʼneluʼ laacabe jma de Stiidxaʼ Dios la? zaguidxi fe stícabe ne zudiicabe cuenta caquiiñeʼ guiziicabe de Dios ne gúnicabe ni nabe (Mat. 5:3). Pa tuuxa gabi laanu zanda chigánnanu laa ne gúninu stipa pur guidúʼndanu ante chigánnanu laabe la? zándaca binni ca gabi laanu zanda guzulunu gúʼndanenu laa de Biblia. Ne nga nga ni naquiiñeʼ guicá íquenu gúninu ora chigánnanu binni sti biaje; cadi naquiiñeʼ guininésinu binni de Stiidxaʼ Dios, sínuque laaca naquiiñeʼ chigánnanu ca binni ca. Ne nga nga zeeda gaca casi ora gudxíʼbanu ne guzeʼnu ti yagahuiiniʼ (1 Cor. 3:6).

Nuu testigu stiʼ Jiobá raca nagana para laacaʼ chigánnacaʼ binni. Zándaca qué raca diʼ nagana para lii guiníʼneluʼ binni de Stiidxaʼ Dios ora maʼ zigucheecheluʼ diidxaʼ de yoo pur yoo ne riuuláʼdxiluʼ gúniluʼ ni. Peru zándaca raca nagana para lii chigánnaluʼ binni stiʼ biaje ne guiníʼneluʼ laa de lu Biblia. Peru cadi naquiiñeʼ diʼ chuʼluʼ zacá. Zándaca ora bicheecheluʼ diidxaʼ bisaananeluʼ binni xiixa libru o revista. Xiñee cadi quixhe íqueluʼ guiníʼneluʼ binni de ni caníʼ libru o revista ca yaʼ. Dede ante biindaʼ ni bisaananeluʼ binni ca para ganda guiníʼneluʼ laabe ni cayeeteʼ luni, ne biyubi tuuxa ni maʼ xadxí rucheeche diidxaʼ para chiné ne gacané lii.

Cani zaniruʼ ndaaniʼ xquidxi Jiobá racanécabe cani rucheeche diidxaʼ para ganda guiziidicaʼ chigánnacaʼ binni sti biaje. Gucuá ique guiziidiluʼ ne guiéneluʼ Stiidxaʼ Dios. Gunna dxiichi zacané Jiobá lii ne biziidiʼ de ca bíʼchinu ne bizáʼnanu ni maʼ nanna stale. Pa lii guʼnuʼ zacá la? zannaluʼ xi gaʼbuʼ binni ora chigánnaluʼ laa ne ora gucheecheluʼ diidxaʼ ziuuluʼ jma nayecheʼ.

GUIDÚʼNDANENU BINNI BIBLIA

Ora guniʼné Felipe ti hombre ni riuulaʼdxiʼ gucaadiaga de Stiidxaʼ Dios, laabe gunabadiidxabe hombre que: «Rieʼnu gouʼ ni cayuunda lu ca». Óraque bicabi hombre que laabe ne na: «Ximodo ndi guieneʼ pa iruti tu usiene naa» yaʼ. Capítulo 8 stiʼ Hechos cayabi laanu xi guca: «Para bizulú né Felipe ni cayuunda be que ne bisiene laabe stiidxa Cristu» (Hech. 8:26-36). Qué gánnadinu pabiáʼ tiempu guniʼné Felipe hombre que, peru ni nánnanu nga laabe bisiene chaahuibe hombre que Stiidxaʼ Dios ne dede biʼniʼ cré Cristu ne gunabaʼ hombre que Felipe uguunisa laabe ne zaqué beeda gácabe xpinni Cristu.

Laanu laaca zanda guidxélanu binni ni riuulaʼdxiʼ guiziidiʼ de Dios, peru qué gánnacabe xi rusiidiʼ Biblia. Nga runi, nápanu xidé chigánnanu ca binni ca chupa chonna biaje ne gusiene chaahuinu laacabe ni na Biblia ne para gúninu ni la? naquiiñeʼ chigánnanu laacabe stale semana, beeu o jma de ti iza para gápacabe fe ne ganda chuʼnísacabe. Ne pa gácanu nachaʼhuiʼ ora gusíʼdinu binni ne gúninu stipa pur gacanenu laacabe para gaca xpinni Cristu la? zacaanu stale ndaayaʼ, purtiʼ Jesús guníʼ: «Jma nayeche ni rudii que ni ricaa» (Hech. 20:35).

Qué zaca diʼ nagana para lii gusiidiluʼ binni pa iquiiñeluʼ Biblia ne ca libru ne revista ni riquiiñeʼ ca testigu stiʼ Jiobá para gusiidicaʼ. Pa lii chinándaluʼ modo bisiidicabe lii de lu Biblia o ca conseju stiʼ ca bíʼchinu o ca bizáʼnanu ni ridagulisaanenu la? zanda gacaneluʼ stiʼ binni ni gúʼndaneluʼ gácacaʼ xpinni Cristu.

Pa caquiiñeʼ gacané tuuxa lii para ganda gúʼndaneluʼ ti binni de lu Biblia la? gudxi ti binnigola o ti ni rucheeche diidxaʼ ni nanna gusiidiʼ ti gacané lii. Ni guiníʼneluʼ ca zábibe lii ximodo zanda gúniluʼ cani zeeda lu Xhiiñaʼ Reinu ni Rúninu ne maʼ biiyaluʼ ximodo rácani lu Guendaridagulisaa stiʼ Dxiiñaʼ Stinu. Laaca naquiiñeʼ guni orarluʼ Jiobá para gábiluʼ laa xi racaláʼdxiluʼ ne guni creluʼ zanda gacanebe lii (1 Juan 3:22). Nga runi biʼniʼ stipa pur gacaneluʼ binni gácacaʼ xpinni Cristu, ne pa ganda la? gudixhe ique gúʼndaneluʼ ti binni Biblia neca maʼ cayuundaneluʼ tuuxa binnilídxiluʼ. Pa lii gúniluʼ ni la? ziuuluʼ jma nayecheʼ ora gucheecheluʼ diidxaʼ.

GACANENU CANI CAYÚʼNDANENU CHUʼCAʼ NDAANIʼ XQUIDXI JIOBÁ

Ora gusíʼdinu ca binni ni cayúʼndanenu ca ne gacanenu laacaʼ gácacaʼ xpinni Cristu la? runibiáʼcabe Jiobá ne ridagulisaanécabe laanu. Ndaaniʼ ca neza binni ridagulisaa ca raca dxiiñaʼ casi modo na Jiobá. Pa racaláʼdxinu guiniisi cani cayúʼndanenu lu Stiidxaʼ Dios la? naquiiñeʼ gacanenu laacabe gunibiáʼcabe xquidxi Jiobá ne gúnicabe dxiiñaʼ ndaaniʼ ni.

Para ganda guluinu laacabe ximodo gúnicabe ni la? zanda iquiiñenu ca videu ne ca folletu nápanu. Laaca zanda iquiiñenu capítulo 4 stiʼ libru Organizados para hacer la voluntad de Jehová.

Cásipeʼ guzululuʼ gúʼndaneluʼ ti binni de lu Biblia, gudxi laabe ximodo caquiiñeʼ Jiobá guidxi stiʼ yanna para guni xhiiñabe lu Guidxilayú. Bisiene laabe pabiáʼ risaca ca libru ne revista ni riquiiñeʼ ca testigu stiʼ Jiobá. Ne zanda gaʼbuʼ laabe qué riaxa diʼ ca binni ni racanecaʼ para gaca ca libru ne revista ca ne cani ritiizicani lu guidubi naca guidxilayú, purtiʼ xhiiñaʼ Dios cayúnicaʼ. Biʼniʼ invitar cani cayuundaneluʼ checaʼ guendaridagulisaa ra riuu Grupu ni Ruundaʼ Libru ti ganda gunibiaʼbe xcaadxi bíʼchinu ne bizáʼnanu. Bisiene laabe ximodo raca ca guendaridagulisaa ndaaniʼ yoo stiʼ Reinu ne guluu gana laabe chebe cani. Ne laaca naquiiñeʼ gudiiluʼ gunibiaʼbe xcaadxi bíʼchinu lu ca guendaridagulisaa de ti dxi de chupa ne chonna gubidxa. Gucané laabe gúʼyabe nadxiisaa ca xpinni Jiobá ne rusihuínnicabe ni lu ca guendaridagulisaa ca ne ra tiica nuucabe. Nga runi, stale binni runibiáʼ nadxiisaacabe (Juan 13:35). Ora gánnabe ximodo nga xquidxi Jiobá la? jma zunibiáʼcabe laabe.

IQUIIÑENU CA LIBRU NE REVISTA NI CANÍʼ DE BIBLIA

Ca primé xpinni Cristu bicheechecaʼ Stiidxaʼ Dios ne stale gana. Bicaacabe Stiidxaʼ Dios lu sti guiʼchiʼ para gunda biquiiñecabe ni ne para ganda chinécabe ni ra ridagulisaacabe. Biiyacabe dxandíʼ Stiidxaʼ Dios ni, ne gúdxicabe xcaadxi gúʼndacaʼ ni. Cumu huaxiéʼ copia gúpacabe dxiqué la? guizáʼ bisisácacabe cani gúpacabe (Col. 4:16; 2 Tim. 2:15; 3:14-17; 4:13; 1 Ped. 1:1). Ca testigu stiʼ Jiobá riquiiñecaʼ guiráʼ aparatu nacubi nuu para gúnicaʼ stale millón de Biblia, gayuaa millón de libru tratadu, folletu ne revista lu stale diidxaʼ.

Ora gucheecheluʼ diidxaʼ biquiiñeʼ guiráʼ guiʼchiʼ ni rudii «mozo ni nuu xpiaani ne ni runi jneza» laanu (Mat. 24:45). Lu Xhiiñaʼ Reinu ni Rúninu rieeteʼ cani zanda gusaananenu binni guiráʼ beeu. Laaca zanda gusaananu revista dxi maca nexheʼ gúninu ni o xcaadxi dxi lu ti beeu.

«Mozo ni nuu xpiaani» ca rusihuinni pabiáʼ nachaʼhuiʼ Jiobá ne laanu, purtiʼ nécapeʼ dxiiñaʼ stiʼ mozo riʼ nga gudii guiráʼ ni caquiiñeʼ xquidxi Dios para guiziidicaʼ jma de laabe la? laaca rudiicabe ni caquiiñeʼ xcaadxi binni ni rapa gana gunibiáʼ chaahuiʼ Dios. Pa lii guiníʼ íqueluʼ xi huabeenduluʼ pur ruundaluʼ ca libru ne revista stiʼ ca testigu stiʼ Jiobá la? nga zucaa lii guiníʼneluʼ sti binni de ni maʼ nánnaluʼ (Heb. 13:15, 16). Dede ne cani nacubi nuu ndaaniʼ xquidxi Jiobá zanda gucheechecaʼ diidxaʼ jneza pa iquiiñecaʼ guiráʼ guiʼchiʼ ni nápanu.

GUCHEECHENU DIIDXAʼ RATIICA NUUNU

Jesús gudxi ca discípulo stiʼ: «[Laatu nga] casi ñaca cuzaani tu. [...] lagaca casi biaani que ti guʼya binni pabiáʼ jneza runi tu ne usisaca ca Bixhoze tu ni nuu ibáʼ» (Mat. 5:14-16). Ca xpinni Cristu naquiiñeʼ gusihuínnicaʼ nápacaʼ ca guenda stiʼ Jiobá ra chinándacaʼ modo biʼniʼ Jesús, purtiʼ guniʼbe: «Naa zeda gaca casi biaani ni ruzaani binni guidxilayú». Jesús gudixhe ejemplu chinanda ca xpinni ra bidiibe lugar guzaaniʼ «biaani ni rudii enda nabani» stibe ti ganda guicaa cani racalaʼdxiʼ gucaadiaga stale ndaayaʼ (Juan 8:12).

Apóstol Pablu laaca gudixhe ti ejemplu ni zanda chinándanu (1 Cor. 4:16; 11:1). Ora guyuube ndaaniʼ guidxi Atenas, guiráʼ dxi bicheechebe diidxaʼ ndaaniʼ luguiaa que (Hech. 17:17). Ca xpinni Cristu ni guyuu Filipos yenándacaʼ ejemplu stibe, ne gúdxibe laacaʼ: «Lade binni ni runi ni na ique sin gapa xpiaʼ. Zeda gaca tu casi biaani ndaani guidxilayú cahui riʼ» (Fili. 2:15). Ca dxi stinu riʼ, cani guininu ne cani gúninu zanda gacané cani binni gunibiáʼ stiidxaʼ Reinu stiʼ Dios ti zacá gusaanini ora guiníʼnenu binni de ca diidxaʼ nacubi ne galán stiʼ Reinu ca. Dxandíʼ, ora gácanu nachaʼhuiʼ ne gúninu ni jneza la? binni ruuyaʼ gadxé laanu de xcaadxi. Peru, pa guinínenu binni de Stiidxaʼ Dios ne cayuuyacaʼ cayúninu ni jneza la? ziénecaʼ xiñee gadxé laanu de xcaadxi binni.

Stale testigu stiʼ Jiobá rucheechecaʼ diidxaʼ ora nuucaʼ ra dxiiñaʼ, ra scuela, ne ora tiica. Ora chuunu ndaaniʼ carru zanda guinínenu ca binni zuba cueʼnu de stiidxaʼ Dios. Naquiiñeʼ chuʼnu listu para ganda guinínenu binni Stiidxaʼ Dios ratiica nuunu.

Pa guietenaláʼdxinu Jiobá nga rusisácanu ora rucheechenu diidxaʼ la? nga zucaa laanu gucheecherunu diidxaʼ ne stale gana. Ne laaca zanda gacanenu xcaadxi binni gunibiaʼcaʼ Jiobá, gúnicaʼ ni nabe ne guicaacaʼ guendanabani ni qué zaluxe. Ne nga zanda guicaacabe ni pa guni crécabe Jesucristu. Guiráʼ cani bizéʼtenu riʼ xhiiñaʼ Jiobá cani ne rusiecheʼ cani laabe (Heb. 12:28; Apo. 7:9, 10).