Jiobá cusiidiʼ laanu gúninu xhiiñaʼ jneza

Capítulo 9

Modo zanda gucheechenu diidxaʼ

RA RUCHEECHENU DIIDXAʼ

JIOBÁ racalaʼdxiʼ guireeche stiidxaʼ Reinu modo nexheʼ gácani lu guidubi naca Guidxilayú, cásica rácani ndaaniʼ guidxi zaqueca ca ranchuhuiiniʼ ca. Nga runi, Betel ni nuu ndaaniʼ ca guidxi roʼ ca rábicabe ca neza binni ridagulisaa paraa zanda gucheechecaʼ diidxaʼ ne laaca Betel ruseendaʼ tu laa chigucheeche diidxaʼ ca lugar ni nuu zitu de guidxi (1 Cor. 14:40). Zacá gudixhe Dios gácani lu primé siglu (2 Cor. 10:13; Gál. 2:9). Cumu nabé nagueenda careeche stiidxaʼ Reinu lu ca últimu dxi riʼ la? caquiiñeʼ gata chaahuiʼ padxí riquiiñeʼ guireeche diidxaʼ xiixa lugar ti ganda gucaadiaga guiráʼ binni stiidxaʼ Dios.

Ndaaniʼ guiráʼ neza binni ridagulisaa nuu ti binnigola ni ruuyaʼ modo guireeche diidxaʼ, peru ti siervu ministerial zanda gabi ca binni ridagulisaa paraa zanda gucheechecaʼ diidxaʼ ne guchabe guiʼchiʼ ni láʼ Registro de asignación de territorio. Pa huaxiéʼ lugar napa ca neza binni ridagulisaa para gucheechecaʼ diidxaʼ la? ca binnigola ni rusiidiʼ ra riuundaʼ libru naquiiñeʼ gábicaʼ grupu sticaʼ paraa zanda gucheechecaʼ diidxaʼ.

Yanna, pa ra ridagulisaaluʼ nápatu stale lugar ra rucheechetu diidxaʼ la? zándaca chuuláʼdxiluʼ gápaluʼ ti lugar ni nuu gaxha de ra liʼdxuʼ para gucheecheluʼ diidxaʼ lii si, o sti lugar ra chuuláʼdxiluʼ ti ganda iquiiñeluʼ tiempu stiluʼ jneza ora maʼ cucheecheluʼ diidxaʼ. Ne zándaca chuuláʼdxiluʼ guni invitarluʼ tuuxa chigucheechené lii diidxaʼ.

Ora gacaláʼdxiluʼ gápaluʼ ti lugar para gucheecheluʼ diidxaʼ lii si la? gunábani ni riguiizi ca lugar para guireeche diidxaʼ ne gudxi ni laabe cada guilúxeluʼ ni. Chaahuidugá zunibiaʼluʼ stale binni ni nabeza ladu ra rucheecheluʼ diidxaʼ ne pa qué guireeluʼ gana la? zándaca gacaneluʼ xcaadxi binni gusisácacaʼ ni bidii Dios laacaʼ para guilacaʼ.

Cadi guiaandaʼ lii, pa guicaaluʼ ti lugar para gucheecheluʼ diidxaʼ la? naquiiñeʼ guiníʼneluʼ guiráʼ ca binni ni nabeza lugar ca. Pa qué guidxélaluʼ laacabe ra lídxicabe la? nápaluʼ xidé guibiguétaluʼ chigánnaluʼ laacabe. Cani gusihuinni riuulaʼdxiʼ guiziidiʼ de stiidxaʼ Dios la? naquiiñeʼ gacaneluʼ laacaʼ. Lu Xhiiñaʼ Reinu ni Rúninu gatigá rieeteʼ ximodo zanda gucheechenu diidxaʼ ra nuu guiráʼ binni ni nabeza neza ra rucheechenu diidxaʼ, ne gusaananenu laacabe Biblia, libru, folletu, tratadu ne xcaadxi casi laani ni rudii «mozo ni nuu xpiaaniʼ ne ni runi jneza» laanu. Zándaca nuu binni nabeza ca lugar ra raca nagana guiníʼnecabe laacaʼ, purtiʼ cadi tutiica si binni riuu ca lugar ca ne modo zanda si guidxélacabe ca binni ca nga pur carta, pur teléfono o sti modo casi guinínenu binni lu calle. Binnigola ni ruuyaʼ modo rireeche diidxaʼ ne binnigola ni rusiidiʼ ra riuundaʼ libru ca zacanecaʼ lii gánnaluʼ ximodo zanda gucheecheluʼ diidxaʼ ca lugar ca, purtiʼ laacabe nánnacabe ximodo zanda gúniluʼ ni ne pabiáʼ zanda gúniluʼ.

Ora guiráʼ cani nuu ndaaniʼ neza binni ridagulisaa ca gacané gaca dxiiñaʼ jneza la? stale binni rucaadiaga ne riziidiʼ de Dios. Ne ca Testigu cadi naquiiñeʼ diʼ gucheechecaʼ diidxaʼ lugar ra cucheeche xcaadxi Testigu diidxaʼ, purtiʼ zándaca gucaani ca binni nabeza ca lugar ca guinabadiidxacaʼ xiñee chupa biaje cadíʼdicabe ra lídxicaʼ o guidxiichicaʼ. Pa guninu zacá la? qué zuchíʼñanu ca bíʼchinu ora maʼ cucheechecaʼ diidxaʼ ne zusihuínninu runi respetarnu ca binni nabeza ca lugar ca.

GUCHEECHENU DIIDXAʼ RA NUU BINNI NI RINÍʼ GADXÉ GADXÉ DIIDXAʼ

Guiráʼ binni ni nabani lu Guidxilayú riʼ caquiiñeʼ guiziidicaʼ de Jiobá, de Xiiñibe ne de Reinu stiʼ Dios (Apo. 14:6, 7). Racaláʼdxinu gacanenu ca binni riníʼ sti diidxaʼ gusisácacaʼ Jiobá ne zacá ganda guilacaʼ ne gacanenu laacaʼ guchaacaʼ modo nabánicaʼ (Rom. 10:12, 13; Col. 3:10, 11). Peru, xi zanda gúninu ora guidxaaganu ti binni ni qué riníʼ stiidxanu ora maʼ zigucheechenu diidxaʼ ne gusihuínninu rizaaláʼdxinu laabe yaʼ.

Jesús guníʼ: «Irá ni racalaʼdxi tu guni binni laatu la? ngue ca laguni laacaʼ» (Mat. 7:12). Ora gácanu nachaʼhuiʼ ne binni de sti guidxi la? rusihuínninu rizaaláʼdxinu laacabe (Rom. 15:7). Zacá nga naquiiñeʼ gúninu ora gucheechenu diidxaʼ ca lugar ra nabeza binni de sti guidxi, ne nga zacané laanu guidúʼyanu ca binni ca casi modo ruuyaʼ Jiobá laacabe (Hech. 10:34, 35; 17:26).

Ora guidxaagaluʼ ti binni ni qué riníʼ stiidxaluʼ la? biyubi modo gánnaluʼ xi diidxaʼ riniʼbe ne biluíʼ laabe ca diidxaʼ cá lu folletu Buenas nuevas para gente de todas las naciones. Pa nuu ti neza binni ridagulisaa o ti grupu ni riníʼ diidxaʼ ni nanna binni ca la? biyubi modo chebe ra nuu grupu ca. Pa ra ridagulisaaluʼ nuu ti ni rucheeche diidxaʼ ni riníʼ stiidxabe la? zanda chigánnabe binni ca ti chuulaʼdxiʼ guiziidiʼ jma. Ne pa qué guidxélaluʼ ti binni ni riníʼ stiidxabe la? gudxi laabe chiyúbiluʼ ti libru o revista ni nuu lu stiidxabe para chisaanaluʼ ra nuube, ne gunabadiidxaʼ bíʼchinu ni rudii libru ne revista ra ridagulisaaluʼ xi guiráʼ guiʼchiʼ nuu lu diidxaʼ ni riníʼ binni ca.

Stale xpinni Cristu huayúnicaʼ stipa pur guiníʼnecaʼ binni ni riníʼ sti diidxaʼ de ni cá lu Biblia ne huayúnicaʼ ni purtiʼ riziidicaʼ chupa chonna diidxaʼ ni riníʼ binni ca. Ne nuu tu laa huayuni stipa pur gusiidiʼ binni ni riníʼ sti diidxaʼ ni cá lu Biblia ne para gúnicabe ni huaquiiñecabe ca libru ne revista ni nuu lu stiidxaʼ binni ca. Pa iquiiñeluʼ ca dibuju ni zeeda lu ca guiʼchiʼ ca ne gábiluʼ binni ca guʼndaʼ ca textu stiʼ Biblia (pa nápabe tobi lu stiidxabe), ni cayuundaneluʼ ca ziénebe chupa chonna de cani jma rusiidiʼ Biblia. Ne pa napa ni cayuundaneluʼ ca ti binnilidxi ni riníʼ stiidxaluʼ ne stiidxabe la? zanda gábiluʼ laa gacané lii gutiixhi cani gábiluʼ laabe.

Cumu racaláʼdxinu gaca binni cadúʼndanenu ca xpinni Cristu la? guluu gana laabe ti ganda chebe ca guendaridagulisaa ni raca ra rieluʼ pa gastiʼ ti neza binni ridagulisaa ni riníʼ stiidxabe. Ra guieegube ca bíʼchinu ne bizáʼnanu zaguucabe gana ne zacanécabe laabe guiniisibe jma lu Stiidxaʼ Dios.

Pa neza ra rucheechetu diidxaʼ nabeza caadxi binni de stiʼ ladu la? ca binnigola ca nápacaʼ xidé quixhe chaahuicaʼ pora zanda guireeche diidxaʼ neza ra nabézacabe ti gacanécabe cani riuulaʼdxiʼ guiziidiʼ. Pa ca binni riníʼ sti diidxaʼ ca nabézacaʼ neza ra rucheeche chupa o jma neza binni ridagulisaa diidxaʼ la? ca binnigola ni riganna ca binni ridagulisaa zacanécabe ca binnigola gúnicaʼ modo maca naguixhe Betel guireeche diidxaʼ. Zándaca gacalaʼdxiʼ ca binnigola gutiidicaʼ gatigá ti libana ni ridiʼdiʼ para guiráʼ binni o guiuundaʼ revista Torre stiʼ ni rapa para gúʼyacaʼ panda binni cheʼ ora gaca ca guendaridagulisaa ca.

Zanda chuʼ ti grupu ni riníʼ sti diidxaʼ pa cayúnicabe cani chiguzéʼtenu riʼ: 1) pa nuu ni rucheeche diidxaʼ o binni ni riuulaʼdxiʼ guiziidiʼ, ne maʼ riene chaahuicaʼ ca diidxaʼ nacubi ne galán stiʼ Reinu stiʼ Dios lu diidxaʼ ca; 2) pa nuu ti binnigola (o ti siervu ministerial) ni nanna ne zanda sániruʼ lu grupu ca ne ganda gúnibe neca ti guendaridagulisaa guiráʼ semana, ne 3) pa nuu ti grupu de binnigola ni gacané grupu de binni riníʼ sti diidxaʼ ca. Ora maʼ bizaa guiráʼ ni maʼ bizéʼtenu riʼ la? grupu de binnigola ni cayacané laacabe ca zucaacaʼ Betel ti gácani ti grupu, ne maʼ laacaʼ gábicaʼ laacabe ximódoruʼ zanda gúnicabe dxiiñaʼ.

Primé guendaridagulisaa ni rapa ca grupu riʼ guiráʼ semana nga guendaridagulisaa ra riuu Grupu ni Ruundaʼ Libru. De racá zándaca ca binnigola guiniʼcaʼ zaa gaca sti guendaridagulisaa casi ni raca para guiráʼ binni o ra riuundaʼ revista Torre stiʼ ni rapa. Guiropa, guionna ne guidapa libana ni ridiʼdiʼ lu Scuela stiʼ cani Rucheeche Diidxaʼ la? zanda tiidiʼ cani ndaaniʼ ca yoohuiiniʼ ni nuu ndaaniʼ ca Yoo stiʼ Reinu pa nuu ti binnigola (o ti siervu ministerial) ni riníʼ diidxaʼ riníʼ grupu ca ne gudii conseju laacabe. Laaca zanda quixhe chaahuicabe pora guidagulisaa grupu ca para chigucheechecaʼ diidxaʼ. Sicaríʼ ca nga naquiiñeʼ gaca ora guzulú sti grupu riníʼ sti diidxaʼ.

Guiráʼ cani nuu lu ti grupu ni riníʼ sti diidxaʼ la? rúnicaʼ dxiiñaʼ modo na grupu de binnigola ni cayuuyaʼ dxiiñaʼ sticaʼ. Ca binnigola riʼ zacanecaʼ ca binni nuu lu grupu riʼ lu intiica si ni iquiiñecabe. Ora binnigola riganna ca neza binni ridagulisaa chiganna neza binni ridagulisaa ra nuu grupu riníʼ sti diidxaʼ ca ne guninebe grupu ca dxiiñaʼ la? zuseendabe ti carta Betel ra guiniʼbe ximodo caniisi dxiiñaʼ cayuni grupu ca, ne xiruʼ caquiiñeʼ gúnicabe. Pa guiráʼ cani cayacané ra nuu binni ni riníʼ sti diidxaʼ chinándacaʼ modo na Biblia ne modo na xquidxi Dios gaca dxiiñaʼ la? zusisácanu lá Jiobá (1 Cor. 1:10; 3:5, 6).

CA LUGAR RA NABEZA BINNI RINÍʼ STALE DIIDXAʼ

Cani rucheeche diidxaʼ ni nuu ndaaniʼ ca guidxi naroʼbaʼ ca, naquiiñeʼ guyúbicabe guiníʼnecabe ca binni riníʼ stiidxacabe. Rácani zacá purtiʼ ca lugar ra nabeza binni riníʼ stale diidxaʼ la? maca nexheʼ tu laa chigucheeche diidxaʼ ra nuucabe. Ca binnigola ni ruuyaʼ modo rireeche diidxaʼ ni nuu ndaaniʼ ca neza binni ridagulisaa ni rucheeche diidxaʼ ca lugar ra nabeza binni riníʼ stale diidxaʼ la? zaguixhe chaahuicabe ximodo guireeche diidxaʼ neza ra nabeza ca binni ca. Ne ca binni ni chuulaʼdxiʼ guiziidiʼ jma la? zacanécabe laacaʼ checaʼ ca guendaridagulisaa ra riníʼcabe stiidxacaʼ. Naquiiñeʼ gácani sicaríʼ, purtiʼ zándaca ziuu tiru ti lugar si zucheeche stale neza binni ridagulisaa diidxaʼ ti siadóʼ o ti huadxí, ne laanu qué riuuláʼdxinu gúninu «xiixa ni ucueeza» de gucheechenu «stiidxa Cristu» (1 Cor. 9:12).

Ora gucheechetu diidxaʼ lu calle o ra tiica nuutu zanda chinetu libru o revista de gadxé gadxé diidxaʼ. Peru ora maʼ zigucheechetu diidxaʼ de yoo pur yoo la? jma jneza chinetu ca libru ne revista ni nuu lu diidxaʼ riníʼ ca binni ridagulisaanetu. Cadi guiaandaʼ lii, ca lugar ra nabeza binni riníʼ stale diidxaʼ la? ca binni ridagulisaa ni riníʼ stiidxacabe nga rie ra nuucabe. Nga runi ca bíʼchinu ne bizáʼnanu ni gusaanané xiixa libru o revista ca binni riuulaʼdxiʼ guiziidiʼ jma la? zanda chinécabe ca binni ca guendaridagulisaa raca lu stiidxacaʼ (1 Cor. 14:9). Pa guyúbinu ca binni riníʼ diidxaʼ riníʼ ca binni ridagulisaanenu o cani riuulaʼdxiʼ ni la? zanda gacanenu guilá jma binni.

GUCHEECHENENU GRUPU DIIDXAʼ

Ca xpinni Cristu ni maʼ bidiicaʼ xquendanabánicaʼ Dios la? naquiiñeʼ gucheechecaʼ ca diidxaʼ nacubi ne galán stiʼ Reinu stiʼ Dios. Nuu stale modo zanda gúninu ni, peru jma stale tu laa riuulaʼdxiʼ chiné stobi laa ora maʼ zigucheeche diidxaʼ (Luc. 10:1). Nga runi, ndaaniʼ ca neza binni ridagulisaa raca caadxi guendaridagulisaa ante chigucheechecaʼ diidxaʼ ca sábadu ne domingu ne ndaaniʼ semana. Ca dxi qué raca dxiiñaʼ la? laaca guizáʼ galán gucheechenu diidxaʼ ne grupu, purtiʼ dxi ca riree ca bíʼchinu ne bizáʼnanu ni qué ñuni dxiiñaʼ. Ca guendaridagulisaa raca ante chigucheechenu diidxaʼ raca cani ora zanda chuʼ cani rucheeche diidxaʼ ne zanda gácacani ndaaniʼ Yoo stiʼ Reinu o ra lidxi ca bíʼchinu ne bizáʼnanu ra ridagulisaa grupu ni ruundaʼ libru o sti lugar ra zanda gácani.

Ni chindee grupu ca zanda guiníʼ xiixa ni gacané cani nacubi cucheeche diidxaʼ. Nuu lugar la? jma jneza cheʼ chupa o stale binni chigucheeche diidxaʼ pur xcaadxi razón. Ora rucheeche chupa binni diidxaʼ juntu la? zanda gacanésaacaʼ ne uguusaacaʼ gana laacaʼ. Neca guiníʼ íqueluʼ guireeluʼ stúbiluʼ, pa cheluʼ guendaridagulisaa ra riuu grupu ca la? zaguuluʼ gana ca bíʼchiluʼ ne ca bizáʼnaluʼ. Ne nuu tiru gánnasiluʼ nuu tu laa cucheecheʼ diidxaʼ neza ra canazaluʼ zacaneni lii gúniluʼ dxiiñaʼ sin guidxíbiluʼ.

Pa chinándanu ejemplu stiʼ Jesús ne ca apóstol stiʼ la? zaguu Jiobá ndaayaʼ stipa gúninu pur gucheechenu ca diidxaʼ nacubi ne galán stiʼ Reinu stiʼ Dios, ti dxiiñaʼ nabé risaca (Luc. 9:57-62).