Caquiiñeʼ gánnanu guiʼchiʼ para gusiidiʼ Jiobá laanu
1 Maʼ raca jma de chonna mil gaayuʼ gayuaa iza Jiobá bicaa chii mandamientu lu chupa guié ne bidiibe ni guidxi Israel para gánnacaʼ xi naquiiñeʼ gúnicaʼ. Despué, Dios biquiiñeʼ cuarenta hombre lu ti mil xhoopaʼ gayuaa iza para bicaacaʼ sesenta y seis libru ni zeeda lu Biblia. Dede dxiqué, cazíʼdinu gúninu guiráʼ ni canabaʼ Dios laanu ne riquiiñebe Stiidxabe para gusiidibe laanu (2 Tim. 3:16, 17). Peru nuu de ca xpinni Jiobá qué gánnacaʼ guiʼchiʼ. Guidúʼyanu ximodo zanda gacanenu laacabe casi modo maʼ gudixhe «mozo ni nuu xpiaaniʼ ne ni runi jneza» gúninu ni (Mat. 24:45).
2 Gusíʼdinu binni guiʼchiʼ. Ca binnigola ca maʼ nánnacaʼ xi naquiiñeʼ gúnicaʼ para gusiidicabe cani rucheeche diidxaʼ ni maʼ guyuu nisa ne cani caʼruʼ chúʼnisa para gúʼndacaʼ ne gucaacaʼ. Ca binnigola ca zuyúbicaʼ ti hombre ni nanna guʼndaʼ ne ni nanna modo riníʼcabe ne modo ricá diidxaʼ ni chigusiidibe ca. Pa gastiʼ hombre la? zanda guni ti gunaa dxiiñaʼ riʼ, peru caquiiñeʼ ganna chaahuibe diidxaʼ ni chigusiidibe ca ne gácabe ti binni ni zanda chinanda binni ejemplu stiʼ. Ne ora chigusiidibe naquiiñeʼ guxhiibe ti lari íquebe (1 Cor. 11:3-10; 1 Tim. 2:11, 12). Pa cuícabe lii para gusiidiluʼ, zándaca guinabadiidxaluʼ: «Ximodo guneʼ ni yaʼ».
3 Cumu ca binnigola nga gulí binni ni chigusiidiʼ ca la? zúnibe stipa pur chinándabe cani cá lu libru Beneficiese yaza 285 ne cani cá lu folletu Biʼniʼ stipa gúʼndaluʼ ne gucaaluʼ. Ora gusiidibe zuyúbibe modo cadi gusidxágapebe xquendabiaaniʼ cani cusiidibe. Nga runi, zanda gusiidibe chupa o chonna biaje ndaaniʼ ti semana. Rinábadu lii cadi tindeneluʼ laacabe, sínuque guluu gana laacabe. Gunabaʼ laacabe iquiiñecabe nagueendaca guiráʼ ni maʼ biziidicabe. Biʼniʼ respetar laacabe ne cadi gusituiluʼ lúcabe. Ora guiluxe gusiidiluʼ bisaanané laacabe taria ni gúnicabe ra lídxicabe. Ca binnigola ca zuuyacabe pora jma zanda chuʼ cani chiguiziidiʼ ca ti cuáquicabe ti hora gácani. Laaca zanda guiziidiʼ ti binni si pa caquiiñeʼ, peru naquiiñeʼ gápacabe stale cuidadu para gúnicabe ni.
4 Bicaa ique gacaneluʼ. Qué gánnanu pándapeʼ binni nga biʼniʼ copiar ne bitiixhi Biblia ca lu stiʼ diidxaʼ, peru ni nánnanu nga dxiiñaʼ ni bíʼnicabe ca maʼ huayacaneni laanu. Dxandipeʼ maʼ bihuinni, pa nanna binni guiʼchiʼ la? zanda guiziidiʼ jma. Nga runi, rinábadu laatu iquiiñetu cani maʼ nánnatu para ganda gacanetu xcaadxi binni guiziidicaʼ gúʼndacaʼ Biblia ne gúʼndacaʼ ca libru ne revista ni nápacaʼ lu stiidxacaʼ (1 Tes. 2:8).