Ca familia ni runi adorar Jiobá
1 Ca xpinni Cristu ni bibani dxiqué, bíʼninecaʼ binnilídxicaʼ dxiiñaʼ ndaaniʼ lídxicaʼ ne bíʼnirucaʼ xcaadxi cosa juntu. Peru biʼniʼ adorárcabe Jiobá juntu, ne ngue nga ni jma risaca (Lev. 10:12-14; Deu. 31:12). Ca dxi nabáninu riʼ, maʼ gadxé costumbre napa ca familia ca purtiʼ cada tobi runi ni racalaʼdxiʼ. Laanu ca xpinni Cristu nánnanu pabiáʼ risaca nga gúninu intiisi dxiiñaʼ ne binnilídxinu, jmaruʼ si ora cayúninu xhiiñaʼ Dios. Dxandíʼ, riecheʼ ni gulaquistí ca familia ca ne riuube nayecheʼ ora gúʼyabe cani nahuiiniʼ ca ne bixhózecaʼ cayuni adorarcaʼ laabe juntu.
2 Gucheechenu diidxaʼ juntu. Gucheeche ca familia ca diidxaʼ juntu la? racaneni laacaʼ chuʼcaʼ tobi si. Nga runi, ca binnigola ca neca rireenécabe cani rucheeche diidxaʼ de yoo pur yoo, laaca zareenécabe xheelacabe ne ca xiiñicabe gatigá para gucheechecabe diidxaʼ (1 Tim. 3:4, 5). Ca binnigola ni riganna ca neza binni ridagulisaa laaca ribeecaʼ tiempu para gucheechenecaʼ xheelacaʼ diidxaʼ.
3 Ora rié cani nahuiiniʼ ca de yoo pur yoo la? riziidicaʼ gucheechecaʼ diidxaʼ jma jneza. Cadi ruuyasícabe pabiáʼ nayecheʼ riuu bixhózecabe, sínuque laaca ruuyacabe pabiáʼ nadxii bixhózecabe Jiobá ne nadxiicaʼ sti binni (Deu. 6:5-7). Ne laaca naquiiñeʼ gusiidirucabe xiiñicabe ora maʼ ziniisicaʼ. Ti guendaxheelaʼ ni napa chonna hombrehuiiniʼ de 15 dede 21 iza, rucheechenérucabe ca xiiñicabe diidxaʼ gatigá. Bixhózecabe guníʼ sicaríʼ: «Qué rusaanadu de gusíʼdidu laacabe xiixa. Ruyúbidu modo chúʼcabe galán ne chuláʼdxicabe ni caziidicabe».
4 Guizíʼdinu modo gucheechenu diidxaʼ juntu. Stale bíʼchinu ne bizáʼnanu huadiicaʼ cuenta galán nga guyubinecaʼ binnilídxicaʼ xi guiniʼcaʼ ante chigucheechecaʼ diidxaʼ. Cani nahuiiniʼ ca riuuláʼdxicaʼ gacané tobi de ca binnilídxicaʼ laacaʼ guni ensayarcaʼ, tobi de laacaʼ gaca ni rucheeche diidxaʼ ne stobi ca gucaadiaga. Nuu tu laa ora guiluxe guʼndané binnilidxi ribee chupa chonna minutu para guni ensayarné laacabe ni guiníʼcabe ora maʼ chigucheechecabe diidxaʼ.
5 Ridxá tipa ladxidoʼno ne riuʼnu jma nayecheʼ ora runinenu binnilídxinu dxiiñaʼ ni nabé risaca riʼ. Dxandíʼ, gástiruʼ sti cosa jma galán que gucheechenu diidxaʼ de yoo pur yoo juntu, guibiguetaʼ chigánnanu binni ne chigúʼndanenu laacaʼ Biblia. Ora guni adorárnenu binnilídxinu Jiobá la? ne stale guendanayecheʼ zaninu ca diidxaʼ riʼ: «Naa ne ca binnilidxeʼ la? zúnidu ni na Jiobá» (Jos. 24:15).