Ni zacané ca familia ca guibánicaʼ galán
1. Ximodo gucané dxi sábadu que ca familia israelita.
1 Ley ni gudixhe Jiobá para guiziilaʼdxiʼ binni dxi sábadu que bisihuínnini nadxiibe ca familia israelita ne riuuláʼdxibe guibánicaʼ galán. Sábadu que nga riziilaʼdxiʼ guidxi que de ca dxiiñaʼ rúnicaʼ ne rápacaʼ jma tiempu para guiníʼ íquecaʼ pabiáʼ nachaʼhuiʼ Jiobá né laacaʼ ne ximodo nuucaʼ nezalube. Laaca gucaneni ca binni ni napa xiiñiʼ para gunda gucanecaʼ ca xiiñicaʼ gápacaʼ Ley que ndaaniʼ ladxidoʼcaʼ (Deu. 6:6, 7). Zaqué nga gupa xquidxi Dios tiempu guiráʼ sábadu para si guni adorarcaʼ laabe.
2. Xi rizíʼdinu de Jiobá pur ley ni caníʼ guiziilaʼdxiʼ binni dxi sábadu.
2 Dxandíʼ, yanna maʼ qué rinabaʼ Jiobá guiziilaʼdxiʼ ca familia ca dxi sábadu casi na ley ni gudíxhebe que. Neca zacá, rusiidiruʼ ley ca laanu ti cosa de Dios: qué huayuudxí gusaanabe de guyúbibe modo guiziidiʼ xquídxibe para guibánicaʼ modo riuuláʼdxibe (Isa. 48:17, 18). Yanna riʼ, rusihuínniruʼ Dios rizaalaʼdxiʼ laanu purtiʼ maʼ nuu ti dxi para guni adorarnu laabe né binnilídxinu.
3. Xi para guʼtaʼ ti dxi guni adorar binni Dios né binnilidxi.
3 Xi para guʼtaʼ ti dxi guni adorar binni Dios né binnilidxi. Lu beeu enero 2009, guendaridagulisaa ni láʼ: Grupu ni Ruundaʼ Libru stiʼ ca Binni Ridagulisaa maʼ bizulú gúcani dxi ca raca Scuela stiʼ cani Rucheeche Diidxaʼ ne Guendaridagulisaa stiʼ Dxiiñaʼ Stinu. Xiñee bidxaa dxi raca ni yaʼ. Gúcani zacá para ganda quixhe ca familia ca ti dxi lu ti semana para guni adorarcaʼ Dios juntu ne zacá chuʼcaʼ jma gaxha de Jiobá. Nga runi guluucabe gana ca familia ca para gúʼyacaʼ pa zanda iquiiñecaʼ dxi gúpacaʼ guendaridagulisaa ni láʼ Grupu ni Ruundaʼ Libru stiʼ ca Binni Ridagulisaa para gúʼndanecaʼ familia sticaʼ, ne iquiiñecabe tiempu ca para gúʼndacabe Biblia chaahuiʼ chaahuiʼ ne gúʼndacabe xcaadxi tema ni caquiiñeʼ ganna cada familia.
4. Ñee ti hora si nga naquiiñeʼ guidúʼndanenu ca binnilídxinu la? Bisiene ni.
4 Dxi riuunu guendaridagulisaa ni láʼ: Grupu ni Ruundaʼ Libru stiʼ ca Binni Ridagulisaa biquiiñenu tiempu para guzuchaahuinu, chuunu lugar ra rácani ne gúninu xcaadxi cosa. Neca ti hora si raca guendaridagulisaa riʼ, peru stale de laanu dede rixhínninu ora riuunu ni. Yanna, ra maʼ bidxaa ora raca ca guendaridagulisaa ca galán iquiiñenu tiempu ca para guni adorarnu Jiobá né binnilídxinu ne zanda guindaani jma de ti hora. Galán guidúʼyanu xi caquiiñeʼ familia stinu ne pabiáʼ tiempu nápacaʼ para quíxhenu pabiáʼ guindaani.
5. Ñee guidubi naca tiempu nexheʼ guʼndaʼ familia ca nga naquiiñeʼ chúʼcabe juntu la? Bisiene ni.
5 Ñee guidubi naca tiempu nexheʼ guʼndaʼ ca familia ca nga naquiiñeʼ chúʼcabe juntu la? Ora guʼndaʼ ca familia ca juntu ne ca guendaxheelaʼ ni qué gapa xiiñiʼ xiixa tema ni zeeda lu Biblia riguusaacaʼ gana laacaʼ (Rom. 1:12). Riuu ca familia ca tobi si. Nga runi, ca tema ni zeeda lu Biblia nga ni jma naquiiñeʼ gúʼndacabe ora guni adorárcabe Dios né binnilídxicabe. Peru laaca galán guʼndaʼ cada tobi de laacabe xiixa tema ni zeeda lu Biblia stúbicabe. Despué de guʼndaʼ guidubi familia ca xiixa tema, gastiʼ naca guʼndaʼ cada tobi de laacabe gadxé gadxé tema neca nuucabe juntu, casi pa nuu de laacabe caʼruʼ guiluxe guʼndaʼ cani chitiidiʼ lu guendaridagulisaa o xiixa revista. Nuu familia qué liica rinacaʼ gucaaguicaʼ televisión sticaʼ gueelaʼ ca.
6. Ximodo zanda gúʼndanenu binnilídxinu.
6 Ximodo zanda gúninu ni. Cadi guiráʼ biaje gúninu ni naquiiñeʼ guinabadiidxanu ne guicábicabe laanu. Nuu de ca familia ca runi adorarcaʼ Dios né binnilídxicaʼ casi raca ca guendaridagulisaa ni rápanu ndaaniʼ semana ti chuuláʼdxicabe ni ne cadi guireecabe gana. Rúnicabe ni chupa chonna ndaa ne gadxé gadxé modo rúnicabe cani. Casi gúʼndacabe Biblia juntu, ruundacabe tobi de ca ndaa ni chitiidiʼ lu ca guendaridagulisaa ne runi ensayárcabe modo zanda gucheechecabe diidxaʼ. Lu yaza 6 zeeda xcaadxi modo zanda gácani.
7. Xi naquiiñeʼ gúnitu para guni sentir ca xiiñitu galán ora gúʼndanetu laacaʼ.
7 Xi naquiiñeʼ gúnitu para guni sentir ca xiiñitu galán ora gúʼndanetu laacaʼ. Pa gusihuinni binni nadxii xiiñiʼ ora gusiidiʼ laacabe la? jma zucaa íquecabe guiziidicabe. Pa galán nuu tiempu la? zanda gúʼndatu fuera. Ne ora caquiiñeʼ guiziiláʼdxitu ti ratu, zanda gúnitu ni. Nuu familia rúnicaʼ xiixa cosa huiiniʼ para gocaʼ ora maʼ guiluxe gúʼndacaʼ. Ne pa caquiiñeʼ cani napa xiiñiʼ ca ti tiempu huiiniʼ para gúʼyacaʼ ximodo zanda gaca chaahuiʼ xiixa ni cadi cayaca jneza o pa nuu tobi de ca xiiñicabe napa xiixa guendanagana, cadi galán diʼ tindenécabe laacaʼ o uguu jnézacabe laacaʼ ora maʼ cayuni adorárcabe Dios né binnilídxicabe. Pa tobi de ca xiiñicabe biʼniʼ xiixa cosa ni cadi jneza la? jma galán guiniʼnécabe laasibe sti dxi ti cadi gusituícabe lube nezalú ca bíʼchibe ne ca bizáʼnabe. Dxi nexheʼ guni adorarnu Dios né binnilídxinu ca cadi naquiiñeʼ diʼ cueeni gana laanu, zacá zusihuínninu cayuni adorarnu ti Dios nayecheʼ (1 Tim. 1:11, NM).
8, 9. Xi caquiiñeʼ guni cani naca xaíque ndaaniʼ ti yoo.
8 Xi naquiiñeʼ guni cani naca xaíque ndaaniʼ ti yoo. Pa dede ante quíxhebe xi gúʼndacabe ora guni adorárcabe Dios né binnilídxicabe ne guyúbibe modo gúnibe ni jneza la? zacá jma zanda cueendúcabe ni galán (Pro. 21:5). Laaca galán guinabadiidxaʼ hombre ca xheelaʼ de laani (Pro. 15:22). Ziuu ora laaca zanabadiidxabe ca xiiñibe de ni chiguundacabe. Pa gúnicabe zacá zánnacabe xi riuulaʼdxiʼ ca xiiñicabe o xi naguu xizaa laacaʼ.
9 Cadi guiráʼ diʼ biaje caquiiñeʼ cuee bixhózecabe stale tiempu para guʼyaʼ xi zanda guʼndané laacabe. Zándaca riuulaʼdxiʼ familia stibe gácani ti modo si guiráʼ semana. Pa zacá ni la? cadi naquiiñeʼ guchaabe modo rácani guiráʼ semana. Ne zándaca jma galán gúʼyabe xi zanda gúʼndanebe binnilídxibe sti biaje ora guiluxe gúʼndanebe laacaʼ, purtiʼ óraca jma rietenaláʼdxibe xi caquiiñeʼ guiziidicaʼ. Nuu de cani naca xaíque ndaaniʼ ti yoo rucaacaʼ ca tema ni chiguundanecaʼ ca binnilídxicaʼ lu ti guiʼchiʼ ne rucaacaʼ ni ti lugar ra zanda guʼyaʼ guirácabe, casi lu refrigerador. Ora gúnicabe zacá jma riuu ca binnilídxicabe gana ne maʼ cabézasicaʼ guedandá dxi ca, zacá zánnacabe pa caquiiñeʼ gúʼndacabe xiixa dede ante.
10. Xi zanda guni cani nuu stubi dxi nexheʼ guni adorar ca xpinni Cristu Dios né binnilídxicaʼ.
10 Xi zanda guneʼ pa nuaaʼ stubeʼ yaʼ. Cani nuu stubi zanda iquiiñecaʼ dxi nexheʼ guni adorar ca xpinni Cristu Dios né binnilídxicaʼ para gúʼndacaʼ xiixa tema stúbicaʼ. Caadxi de ca cosa ni jma naquiiñeʼ gúnibe luni nga: gúʼndabe Biblia, gúʼndabe dede ante cani chitiidiʼ lu ca guendaridagulisaa ca ne gúʼndabe revista Torre stiʼ ni rapa ne ¡Despertad! Xcaadxi xpinni Cristu ruyúbicaʼ gánnacaʼ jma de xiixa tema ora naguíxhecaʼ gúʼndacaʼ stúbicaʼ. Laaca zanda guni invitárcabe sti ni rucheeche diidxaʼ o sti familia para gúʼndacabe xiixa tema zeeda lu Biblia ni zanda gacané laacabe.
11, 12. Bizeeteʼ chupa chonna de ca cosa ni ribeendunu ora runi adorarnu Dios né binnilídxinu guiráʼ semana.
11 Xi ribeendunu ora runi adorarnu Dios né binnilídxinu guiráʼ semana. Ora runi adorarnu Dios de guidubi ladxidoʼno riuʼnu jma gaxha de Jiobá. Ne ora riuu ca familia ca juntu laaca racaneni laacaʼ para gannaxhiicaʼ jma. Ti guendaxheelaʼ guníʼ sicaríʼ de ca ndaayaʼ ca: «Guirópadu precursor laadu ne qué gápadu xiiñidu, nga runi maʼ cabézasidu ora ganda dxi guni adorardu Dios né binnilídxidu. Runi sentirdu jma nadxiisaadu ne riuʼdu jma gaxha de Bixhózedu ni nuu guibáʼ. Ora guirá gueelaʼ dxi runi adorardu Dios né binnilídxidu, rinabadiidxasaadu laadu: “Ñee rietenalaʼdxuʼ xi rúninu yannadxí la? ¡Runi adorarnu Dios né binnilídxinu!”».
12 Ora gata ti dxi para guni adorar ca familia ca Dios né binnilídxicaʼ la? racaneni laacabe ne laaca racaneni ca familia ni nabé nuu xhiiñaʼ. Ti gunaa ni naca precursora regular ne laasi cusiniisi chupa hombrehuiiniʼ stiʼ, bicaa sicaríʼ: «Dxiqué huaxiéʼ ruundaniáʼ familia stinneʼ. Cumu nabé ridxagaʼ la? ngue runi cadi guiráʼ diʼ biaje randa rúnidu ni ne rindaa para gúnidu ni sti biaje. Qué runeʼ ni purtiʼ qué ridxelaʼ pora guneʼ ni. Nga runi, cucaaʼ ca diidxaʼ riʼ ra nuutu para gudieeʼ xquíxepeʼ laatu pur gudíxhetu ti dxi para guni adorar binni Dios né binnilidxi. Yanna maʼ guiráʼ semana ruundaniáʼ binnilidxeʼ ne maʼ cabeendudu ni galán».
13. Xii naquiiñeʼ guni ti familia para ganda cueendú ni galán.
13 Ley ni gudixhe Jiobá para guiziilaʼdxiʼ binni dxi sábadu que beeda gácani casi xiixa ni bisigáʼdebe ca familia israelita que, zacaca nga zeeda gaca dxi runi adorarnu Dios né binnilídxinu, purtiʼ racaneni ca familia ca guibánicaʼ galán (Sant. 1:17). Dxiqué, ca familia israelita ni yenanda ley ni gudixhe Jiobá dxi sábadu que, gucaneni laacaʼ para guyuucaʼ gaxha de laabe. Zacaca nga yanna, pa guni adorarnu Dios né binnilídxinu dxi nexheʼ gúninu ni la? laaca zabeendunu stale cosa ni galán (2 Cor. 9:6; Gál. 6:7, 8; Col. 3:23, 24). Pa iquiiñeʼ familia stiluʼ dxi riʼ jneza la? zuni sentirtu cásica biʼniʼ sentir salmista que ora guníʼ: «Peru naa la? guizáʼ galán runeʼ sentir chuaaʼ gaxha de Dios. Runeʼ cré zanda gapa Jiobá naa, Señor ni jma nandxóʼ» (Sal. 73:28).
[Blurb on page 5]
Dxi nexheʼ guni adorarnu Dios né binnilídxinu ca cadi naquiiñeʼ diʼ cueeni gana laanu, zacá zusihuínninu cayuni adorarnu ti Dios nayecheʼ
[Box on page 6]
PARA IQUIIÑEʼ
Cani zanda guidúʼndanu ora guni adorarnu Dios né binnilídxinu
Biblia:
• Laguundaʼ ti ndaa de ra riuundaʼ Biblia guiráʼ semana. Pa lu relatu ni cayuundatu ca nuu tobi ni cayuíʼ historia ca ne cayeeteʼ xcaadxi binni luni la? tobi de laatu zanda guʼndaʼ casi ora laa cayuíʼ historia ca ne xhupa xhonna de ca binnilídxiu zanda gúʼndacaʼ casi ora laacaʼ nga ca binni ni cayeeteʼ luni.
• Laguni xiixa ni bizaaca ca binni ni cayeeteʼ lu relatu ni cayuundatu semana ca.
• Laguundaʼ dede ante ca capítulo nexheʼ gúʼndatu lu Biblia, ne cada tobi de laatu gucaa tobi o chupa guendarinabadiidxaʼ de relatu ni bíʼndatu ca. De racá, guiratu laguyubi ximodo guicábitu ca guendarinabadiidxaʼ ca.
• Guiráʼ semana laguni ti tarjeta ra gucaatu ti textu zeeda lu Biblia ne laguni stipa pur guiziiditu ni de memoria ne gusiénetu ni. Laguindisaʼ chaahuiʼ ca tarjeta ni gúnitu ca ne guiráʼ semana laguuyaʼ panda de ca textu ca rietenaláʼdxitu.
• Lagucaadiaga grabación stiʼ ca capítulo nexheʼ guiuundaʼ semana ca ne lachinanda ni lu Biblia stitu.
Ca guendaridagulisaa ca:
• Laguundaʼ juntu tobi de ca ndaa ni chitiidiʼ lu ca guendaridagulisaa ca.
• Laguni ensayar ca diidxaʼ riuundaʼ ni nexheʼ gúʼndatu stiʼ semana ca.
• Pa tobi de laatu chitiidiʼ lu Scuela stiʼ cani Rucheecheʼ Diidxaʼ, o lu Guendaridagulisaa stiʼ Dxiiñaʼ Stinu la? galán guiníʼ ximodo cá ique gutiidiʼ ni, o guni ensayar ni nezalú ca binnilidxi.
Ni caquiiñeʼ familia ca:
• Zanda iquiiñetu ni zeeda lu libru Los jóvenes preguntan o Guizíʼdinu de Maestru ni Jma Nanna Gusiidiʼ.
• Laguni ensayarné ca xiiñitu xi zanda gúnicaʼ ora guidxaagalucaʼ xiixa guendanagana ra scuela.
• Laguni casi ora laatu nga ca xiiñitu ne ca xiiñitu gúnicaʼ casi ora nácacaʼ laatu. Ca xiiñitu guʼndaʼ de ti tema ne guyúbicaʼ modo gusiénecaʼ ni laatu.
Para gucheechetu diidxaʼ:
• Laguni ensayar modo guiníʼnetu binni ora gucheechetu diidxaʼ sábadu ne domingu.
• Laguuyaʼ xi zanda guni familia stitu para gápacaʼ jma tiempu gucheeche diidxaʼ ca beeu rietenaláʼdxinu guendaguti stiʼ Cristu ne ora rápatu vacación.
• Laguiquiiñeʼ chupa chonna minutu para guʼndaʼ cada tobi de laatu ximodo guicabi cani zándaca guinabadiidxacabe laa ora maʼ zigucheeche diidxaʼ ne de racá guni ensayar ni.
Xcaadxi cosa ni zanda gúnitu:
• Guiratu laguundaʼ tobi de ca tema ni zeeda lu ca revista ni jma nacubi.
• Dede ante guʼndaʼ cada tobi de laatu ti tema ni jma guyuulaʼdxiʼ lu ca revista ni jma nacubi, ne despué gusiene xiixa de laani.
• Ora ganda la? galán guni invitartu ti ni rucheecheʼ diidxaʼ o ti guendaxheelaʼ ora guni adorartu Dios né binnilídxitu, ne zanda guinabadiidxatu laacabe xiixa.
• Laguuyaʼ tobi de ca videu stinu ne laguiníʼ xi biziiditu de laani.
• Laguundaʼ ca tema ni láʼ «Los jóvenes preguntan» o «Actividades para la familia» ni zeeda lu revista ¡Despertad!
• Laguundaʼ ca tema ni láʼ «Ni gusiiditu ca xiiñitu» o «Para ca hombrehuiiniʼ ne ca dxaapahuiiniʼ» ni zeeda lu revista Torre stiʼ ni rapa.
• Laguundaʼ ne laguuyaʼ xi zanda guiziiditu lu tobi de ca ndaa stiʼ Anuario de iza nuunu o xiixa libru nacubi biree lu guendaridagulisaa de chonna gubidxa.
• Despué de chetu guendaridagulisaa de ti dxi, de chupa gubidxa o de chonna gubidxa, laguiníʼ xi jma bieeteʼ lúcani.
• Laguuyaʼ guiráʼ ni bizáʼ Jiobá ne despué laguiníʼ xi rusiidicani laatu de Dios ni bizáʼ cani.
• Laguni xiixa dxiiñaʼ huiiniʼ juntu, casi ti maqueta, ti mapa, o ti dibuju.