Ca familia ni naca xpinni Cristu naquiiñeʼ chuʼcaʼ listu
«Ni cayabe laatu ri la? cayabe irá binni: chuʼ listu.» (MAR. 13:37)
1, 2. Xiñee naquiiñeʼ gucaadiáganu conseju ni bidii Jesús ora guníʼ: chuʼnu listu.
XI ZAZAACA familia stiluʼ «dxi ibigueta Hombre Biseenda Dios [...] casi rey» ne cuee «chu be caadxi [binni de] lade xcaadxi» yaʼ (Mat. 25:31, 32). Cumu zeeda Jesús ti hora cadi cabézanu laa la? risaca stale nga gucaadiáganu conseju bidiibe riʼ: «Cayabe irá binni: chuʼ listu» (Mar. 13:37).
2 Lu tema gudídinu ca bidúʼyanu zanda gataná guiráʼ familia ni naca xpinni Cristu pa guni cada tobi de ca binnilídxicaʼ dxiiñaʼ ni maʼ nexheʼ guni. Yanna guidúʼyanu xcaadxi modo zanda gacané cada tobi de ca binni ni nuu ndaaniʼ ti familia para chúʼcabe galán nezalú Dios.
Cadi gusaana de gúʼyanu ni jneza
3, 4. 1) Xi huabeechú stale familia ni naca xpinni Cristu. 2) Ximodo rusihuinni tuuxa ruuyadxí ni jneza si.
3 Pa racaláʼdxinu gúʼyanu familia stinu nexhená ora gueeda Cristu la? cadi gudiʼnu lugar chuʼ xiixa ni guchiiñaʼ laanu lu xhiiñaʼ Jiobá; naquiiñeʼ gatananu guiráʼ ora casi runi tuuxa ni cayapa. Stale familia huareechú de ndaaniʼ xquidxi Dios purtiʼ jma ricá ique gapa bidxichi, zacá nga casi ora ñábacaʼ lu ti trampa. Nga runi, nabé jneza conseju ni bidii Jesús ora bizeeteʼ naquiiñeʼ guuyadxinu ni jneza si (biindaʼ Mateo 6:22, 23). Cásica ruzaaniʼ ti lámpara neza ziuunu para cadi guiábanu la? zacaca nga zanda gacané xquendabiaaninu laanu para cadi gúninu xiixa ni guniná laanu lu xquendanabáninu (Efe. 1:18).
4 Para ganda guʼyaʼ tuuxa galán, naquiiñeʼ gaca guielú nazaaca ne ganda guʼyaʼ chaahuiʼ ca cosa ni gacalaʼdxiʼ. Zacaca nga rizaaca né xquendabiaaninu. Guʼyaʼ binni ni jneza nga guicá ique guni ti cosa si. Laaca laani nga quixhe ique binni guni xhiiñaʼ Dios, lugar de guibani para si gutale bidxichi o para si gudii guiráʼ ni caquiiñeʼ binnilidxi (Mat. 6:33). Ni na ca diidxaʼ ca nga chuʼnu nayecheʼ ne ni nápasinu ne gúninu xhiiñaʼ Dios primeru lu xquendanabáninu (Heb. 13:5).
5. Ximodo bisihuinni ti baʼdudxaapaʼ de Etiopía naguixhe ique guni xhiiñaʼ Dios.
5 Stale nga cosa galán ribeendú xiiñiʼ binni ora riziidicaʼ guuyadxicaʼ ni jneza si. Guidúʼyanu ti ejemplu stiʼ ti baʼdudxaapaʼ de Etiopía. Cumu nabé bicaa íquebe guiziidibe dxi guzabe scuela la? ngue runi bidiicabe laabe ti beca dxi bilúxebe para chebe scuela roʼ purtiʼ nabé nánnabe. Peru bicaanabe ni, purtiʼ maʼ gudixhe íquebe gácabe precursora. Qué nindaa biree ti dxiiñaʼ ra zanda guni ganarbe 3,000 euro guiráʼ beeu, nabé stale ngue biaʼ nácabe quíxecabe laabe pa guchaaganu ni ne biaʼ riaxa binni ndaaniʼ xquídxibe. Laaca qué ninabe nicaabe ni purtiʼ maʼ gudixhe íquebe gácabe precursora. Ne qué ninabadiidxabe bixhózebe ne jñaabe pa zaa gucaanabe dxiiñaʼ que. Ximodo biiyaʼ bixhózebe ne jñaabe ni bíʼnibe yaʼ. Biéchecaʼ stale ne gúdxicaʼ laabe jneza ngue ni bíʼnibe.
6, 7. Xiñee naquiiñeʼ chuʼnu cuidadu ne «enda ruyubi gapa bidxichi».
6 Ca diidxaʼ ni zeeda lu Mateo 6:22, 23 laaca caguixhená cani binni para cadi gachelú stiʼ stobi. Lu textu ca bizeeteʼ Jesús de tuuxa ni ruyubi «guʼya [...] ni jneza» ne de tuuxa ni ruyubi «guʼya [...] ni cadi jneza». Diidxaʼ griegu ni biquiiñeʼ para gucuá ca diidxaʼ ra na «guʼya [tuuxa] ni cadi jneza», laaca riniʼni malu binni ca ne rachelú gapa jma. Yanna xi riníʼ ique Jiobá de ca binni ni rachelú gapa jma yaʼ. Biblia na: «Cadi lica guiete enda rapa jnadxii lade tu, nin guni tu gasti ru ni nadxabaʼ, nin uyubi tu gapa tu xiixa para laasi tu» (Efe. 5:3).
7 Nagueenda rudiʼnu cuenta pora nga cayachelú binni gapa jma, peru nagana nga para gudiʼnu cuenta pa zacá laanu. Nga runi, galán chinándanu conseju bidii Jesús riʼ: «Laguuya gá laatu ne enda ruyubi gapa bidxichi» (Luc. 12:15). Para ganda gúninu ni na textu ca, naquiiñeʼ guʼyaʼ chaahuinu xipeʼ nga nuu ndaaniʼ ladxidoʼno. Guiráʼ ca familia ni naca xpinni Cristu naquiiñeʼ guiníʼ íquecaʼ pabiáʼ tiempu ne bueltu riquiiñecaʼ para chizacaʼ ne para gápacaʼ jma bidxichi.
8. Ximodo zanda gusihuínninu nuu xpiaaninu ante sinu xiixa.
8 Ante sinu xiixa, naquiiñeʼ guidúʼyanu primeru pa zanda sinu ni, peru cadi ngasi, laaca nuu xcaadxi cosa ni naquiiñeʼ guidúʼyanu. Zanda guinabadiidxanu laca laanu: «Ñee zapaʼ tiempu para iquiiñeʼ ni ne para chuaaʼ cuidadu ni para guihuínnini galán la? Ñee zuniteʼ stale tiempu luni para guiziideʼ iquiiñeʼ ni la?». Ca hombrehuiiniʼ ne ca dxaapahuiiniʼ ca laaca galán guinabadiidxacaʼ: «Ñee nannaʼ gucueezaʼ naa la? o rudieeʼ lugar cubayú guiráʼ ca cosa ni nacubi caree ca naa, ne nisi maʼ canabaʼ bixhozeʼ ne jñaaʼ sicaʼ lari de xiixa marca ni nabé caru ne xcaadxi cosa ni risaca». Guiráʼ cani nuu ndaaniʼ ti familia galán guiníʼ íquecaʼ sicaríʼ: «Pa sieʼ xiixa cosa, ñee zanda iquiiñeʼ ni para gacaniáʼ binnilidxeʼ chuʼ listu ora gueeda Hombre Biseenda Dios la?». Qué chuʼ dxi gusaananu de guni crenu ca diidxaʼ guníʼ Jiobá: «Qué zusaana laatu ne qué ziaana dxie de acaniá laatu» (Heb. 13:5).
Quixhe íquenu ugaandanu xiixa dxiiñaʼ ndaaniʼ xquidxi Dios
9. Xi ribeendú ca familia ca ora quixhe íquecaʼ ugaandacaʼ xiixa dxiiñaʼ ndaaniʼ xquidxi Dios.
9 Sti modo zanda guquidxi ca familia ca fe sticaʼ ne chuʼcaʼ galán nezalú Dios nga: quixhe íquecabe xiixa ni dxandíʼ risaca ne gúnicabe stipa pur ugaandacabe ni. Nga zacané laacabe gúʼyacabe pabiáʼ cayúnicabe lu xhiiñaʼ Jiobá ne gudiicabe cuenta xii nga ca cosa ni jma risaca naquiiñeʼ gúnicabe (biindaʼ Filipenses 1:10).
10, 11. Xi maʼ gudixhe ique familia stiluʼ guni, ne xi rábiluʼ zanda quixhe íquecabe ugaandacabe despué.
10 Dede ca cosa ni nahuiiniʼ quixhe ique binni ugaanda laaca galán cani pa guidubi familia ca guni dxiiñaʼ para ugaanda ni. Tobi de laani nga guiaacabe gúʼndacabe textu guiráʼ dxi. Modo guicábicabe ora maʼ cayuundacabe textu ca zacané ni bixhózecabe gudii cuenta pabiáʼ ziniisi cada tobi de ca binnilidxi lu stiidxaʼ Dios. Laaca zabeendúcabe ni galán pa guidubi familia ca guʼndaʼ Stiidxaʼ Dios, purtiʼ zacaneni ca xcuidihuiiniʼ gúʼndacaʼ jneza ne guiénecaʼ ni cá lu Biblia (Sal. 1:1, 2). Laaca galán guizíʼdinu guni orarnu Dios jma jneza guiráʼ dxi. Yanna, xi zanda guininu de ca guenda ni rudii espíritu santu yaʼ. Galán gúninu stipa pur gusihuínninu cani jma lu xquendanabáninu (Gál. 5:22, 23). Sti cosa ni zanda gúninu nga chuʼnu lugar stiʼ ca binni ni rigucheechenu diidxaʼ ra nuu. Zacá zusíʼdinu ca xiiñinu guiacaʼ binni ne zándaca jma nagueenda ziale de ndaaniʼ ladxidóʼcabe gácacabe precursor regular o misioneru.
11 Xi xcaadxi cosa zanda quixhe íqueluʼ ugaandaluʼ ne ugaanda ca binnilídxiluʼ yaʼ. Ñee zanda cueetu jma tiempu para chigucheechetu diidxaʼ la? Ñee zanda gúnitu stipa para cadi guidxíbitu ora gucheechetu diidxaʼ pur teléfono, ndaaniʼ calle o ra nuu ca negocio ca la? Laga ximodo ruuyuʼ pa nigucheechetu stiidxaʼ Reinu ra jma caquiiñeʼ chuʼ tu guni dxiiñaʼ ca yaʼ. Ñanda niziidiʼ tobi de ca binnilídxiluʼ sti diidxaʼ para nigucheeche diidxaʼ ra nuu binni de sti guidxi la?
12. Ximodo zanda gacané xaíque stiʼ ti familia chuʼ binnilidxi naguidxi lu stiidxaʼ Dios.
12 Tuuxa ni naca xaíque ndaaniʼ ti familia galán guʼyaʼ xiruʼ naquiiñeʼ guni familia stiʼ para guiniisicabe jma lu stiidxaʼ Dios. De racá maʼ quíxhebe xi zanda gúnicabe para ugaandacabe ni. Cani quíxhebe guni cada tobi de ca binnilídxibe naquiiñeʼ gácani biaʼ laa ne biaʼ zanda guni (Pro. 13:12). Peru riquiiñeʼ tiempu nga para ugaanda binni xiixa ni dxandíʼ risaca. Nga runi, zándaca caquiiñeʼ cueenu tiempu lu caadxi cosa ni rúninu casi, gúʼyanu televisión ti gápanu jma tiempu para gúninu xhiiñaʼ Dios (Efe. 5:15, 16). Guiráʼ stipa guni ca familia ca zacaneni laacaʼ ugaandacaʼ ni maʼ gudixhe íquecaʼ (Gál. 6:9). Zacá zahuinni dxandíʼ ziniisicabe lu stiidxaʼ Dios (1 Tim. 4:15).
Cadi gusiáʼndanu gueelaʼ runi adorarnu Dios né binnilídxinu
13. Xi bidxaa lu ca guendaridagulisaa rápanu guiráʼ semana, ne xi zanda guinabadiidxanu laca laanu.
13 Lu primé dxi stiʼ enero iza 2009, bidxaa modo raca ca guendaridagulisaa stinu, ne nga huayacané stale familia chuʼcaʼ listu para dxi guedandá Hombre biseendaʼ Dios. Dxiqué guca ti guendaridagulisaa ni láʼ Grupu ni Ruundaʼ Libru stiʼ ca Binni Ridagulisaa ne gúcani ti dxi aparte ndaaniʼ semana, peru yanna maʼ gúcani tobi si né Scuela stiʼ cani Rucheeche Diidxaʼ ne Guendaridagulisaa stiʼ Dxiiñaʼ Stinu. Nga runi maʼ randa ribee ca familia xpinni Cristu ti gueelaʼ guiráʼ semana para guni adorarcaʼ Jiobá juntu ti ganda iguidxi fe sticaʼ. Yanna ra maʼ gudiʼdiʼ chupa iza galán guinabadiidxanu: «Ñee caquiiñeʼ tiempu ca para guneʼ adorar Dios né binnilidxeʼ o para guundaʼ stúbesiaʼ la? Ñee cahuinni cabeenduáʼ ni galán lu xquendanabaneʼ purtiʼ cayuneʼ ni maʼ guninu ca la?».
14. 1) Xi párapeʼ ribeenu ti gueelaʼ para guni adorarnu Dios ne binnilídxinu o para guidúʼndanu laasinu. 2) Xiñee caquiiñeʼ cueenu ti gueelaʼ para guidúʼndanu.
14 Razón ni jma risaca para cueenu ti gueelaʼ guni adorarnu Dios né binnilídxinu o guidúʼndanu laasinu nga: chuʼnu jma gaxha de laabe (Sant. 4:8). Ora ribeenu tiempu guiráʼ semana para gúʼndanu ne gunibiáʼ chaahuinu Jiobá ne gunibiaʼnu Stiidxabe la? raca xhamígunu laabe jma. Ne ora chuʼnu jma gaxha de laabe jma riale de laanu gannaxhiinu laabe de guidubi ladxidoʼno, guidubi xhiálmanu, guidubi xquendabiaaninu ne guiráʼ stipa stinu (Mar. 12:30). Ne laaca jma ziuuláʼdxinu guzúʼbanu stiidxabe ne gúninu casi rúnibe (Efe. 5:1). Casi maʼ bidúʼyanu ca, nabé risaca nga guni adorarnu Dios né binnilídxinu guiráʼ semana ti ganda chuʼ familia stinu listu ora maʼ gueeda ca dxi jma nagana (Mat. 24:21). Dxandíʼ, caquiiñeʼ gúninu ni para ganda guilanu.
15. Xi zabeendú ca familia ca pa guni adorarcaʼ Dios juntu.
15 Nápanu sti razón para cueenu ti gueelaʼ para guni adorarnu Dios né binnilídxinu, laani nga: chuʼ ca binnilídxinu tobi si. Ora ribee binni tiempu para guʼndané binnilidxi xiixa tema ni zeeda lu Biblia guiráʼ semana, racaneni cada tobi de laacabe para gúnicabe xcaadxi cosa, casi gannaxhiisaacabe jma. Casi ca guendaxheelaʼ la? racaneni laacaʼ chuʼcaʼ tobi si ne guiéchecaʼ ora guiziidicaʼ xiixa nacubi ni zeeda lu Biblia. Stiidxaʼ Dios na: «Ora stubi binni zanda gucaalú tuuxa laa, peru ora chúpacabe zanda gudxiilúcabe. Ne ti doo de chonna xcuaa qué zaruuguʼ diʼ nagueenda» (Eclesiastés 4:12). Ne ora runi adorárcabe Dios né ca xiiñicabe la? racaneni laacabe chúʼcabe tobi si ne gannaxhii xiiñicabe laacabe jma (Col. 3:14).
16. Xi huabeendú chonna gunaa xpinni Cristu, purtiʼ ribeecaʼ tiempu para gúʼndacaʼ Biblia guiráʼ semana.
16 Guidúʼyanu xi bizaaca chonna viuda ni maʼ huaniisi, laacabe huabeendúcabe ni galán purtiʼ runi adorárcabe Dios juntu. Cadi familia diʼ laacabe peru maʼ napa stale iza de xhamígacabe. Cumu ndaaniʼ ti guidxi si nabézacabe la? rápacabe gana chúʼcabe jma tiempu juntu, peru cadi para guiniʼsícabe ximodo nuucabe, sínuque para guiziidicabe jma de Dios. Ngue runi gudíxhecabe guidagulisaacabe ti gueelaʼ guiráʼ semana para gúʼndacabe Biblia. Bizulú biindacabe libru “Testimonio cabal” del Reino de Dios. Tobi de laacabe guníʼ sicaríʼ: «Nabé riuuláʼdxidu ni ridúʼndadu, nga runi rúnidu ni jma de ti hora. Rúnidu stipa pur guiníʼ íquedu xi guiráʼ gudiʼdiʼ ca xpinni Cristu ni bibani lu primé siglu, ne rinidu xi ñúnidu pa nizaacadu ni gudíʼdicabe ca. Ne despué ora maʼ zigucheechedu diidxaʼ rúnidu stipa pur gúnidu ni maʼ bizíʼdidu lu libru ca. Pur nga jma galán modo rucheechedu diidxaʼ ne modo rusíʼdidu binni ne jma cabeendudu stale cosa galán». Cadi cayacanésini laacabe chúʼcabe jma gaxha de Dios, sínuque jma xhamígacabe yanna. Sicaríʼ guníʼcabe: «Nabé rusisácadu tiempu ribeedu para guidúʼndadu Biblia juntu».
17. Xi guiráʼ zanda gúninu para cueendunu ni galán gueelaʼ runi adorarnu Dios né binnilídxinu.
17 Xi huabeendú familia stinu o cada tobi de laanu pur iquiiñenu ti gueelaʼ para guni adorarnu Dios yaʼ. Pa gúninu ni ora ganda si la? zaca nagana para cueendunu cani racaláʼdxinu. Laaca cadi naquiiñeʼ gudiʼnu lugar chuʼ xiixa ni qué risácapeʼ gucueeza laanu de gúninu ni. Guiráʼ cani nuu ndaaniʼ ti familia naquiiñeʼ chuʼcaʼ listu hora maʼ nexheʼ guni adorarcaʼ Dios. Laaca galán gúʼndatu de xiixa tema ni caquiiñeʼ binnilídxitu. Xi zanda gúninu para gácacani galán ne chuuláʼdxinu cani yaʼ. Guyúbinu modo jma galán gusíʼdinu ne gusihuínninu runi respetarnu binnilídxinu ne cadi chuʼdíndenu (Sant. 3:18).a
«Gataná nu» ne «[chuʼnu] listu»
18, 19. Xi naquiiñeʼ gúninu ne guni familia stinu purtiʼ nánnanu mayaca gueeda Hombre biseendaʼ Dios.
18 Guiráʼ ca guendanagana cadiʼdiʼ binni yanna, rusihuínnicani maʼ nuunu lu ca últimu dxi stiʼ guidxilayú stiʼ Binidxabaʼ, ni bizulú dede lu iza 1914. Cásica ricahui guibáʼ ora maʼ chiguiaba nisaguié la? zacaca nga nánnanu maʼ cadi candaa diʼ para gueeda Armagedón. Mayaca gueeda Hombre biseendaʼ Dios para gusabanáʼ cani cucheené Jiobá (Sal. 37:10; Pro. 2:21, 22). Cadi dxandíʼ naquiiñeʼ gucaa nga laanu guiníʼ íquenu ximodo nuunu ne ximodo nuu familia stinu la?
19 Ñee zinanduʼ conseju ni bidii Jesús de guuyadxiluʼ ni jneza si la? Binni guidxilayú dede qué rasi purtiʼ cá ique gaca tuuxa, guni mandar stobi ne gapa bidxichi, peru lii yaʼ. Ñee cayúniluʼ stipa né binnilídxiluʼ pur ugaandatu xiixa dxiiñaʼ risaca ndaaniʼ xquidxi Dios la? Ximodo cayeni lii né gueelaʼ guliluʼ para guni adorarluʼ Dios né binnilídxiluʼ o para gúʼndaluʼ stúbiluʼ yaʼ. Ñee cugaandaluʼ cani gudixheʼ íqueluʼ la? Casi bizeeteʼ tema gudídinu ca, pa cayúniluʼ dxiiñaʼ ni naquiiñeʼ gúniluʼ ndaaniʼ lídxiluʼ la? zacaneluʼ para gataná familia stiluʼ (1 Tes. 5:6). Pa cayúniluʼ cani maʼ guninu ca, zacaneluʼ para chuʼ familia stiluʼ listu dxi gueeda Hombre biseendaʼ Dios.
[Cani cá ñee yaza]
a Para gannuʼ xi tema zanda gúʼndaneluʼ binnilídxiluʼ ne ximodo gacané ni laacabe ne chuuláʼdxicabe ni la? biiyaʼ Torre stiʼ ni rapa 15 stiʼ octubre 2009, yaza 29 dede 31.
Rietenalaʼdxuʼ la?
• Ximodo racané cani zeeda raríʼ ca familia ca para chuʼcaʼ listu.
Ora guuyadxicaʼ ni jneza si
Ora quixhe íquecaʼ ugaandacaʼ xiixa dxiiñaʼ ndaaniʼ xquidxi Dios
Ora cueecaʼ ti gueelaʼ para guni adorarcaʼ Dios né binnilídxicaʼ
[Dibuju/foto ni zeeda lu yaza 13]
Ora ruuyadxinu ni jneza si la? zacané nga laanu para gucáʼnanu guiráʼ ni ridúʼyanu lu guidxilayú riʼ