Naquiiñeʼ guni adorarluʼ Dios ne binnilídxiluʼ para ganda guilatu

ÑEE riníʼ íqueluʼ ximodo nga zaca «dxi uzulú [Dios ni jma nandxóʼ] cuidxi cuenta binni» la? (Apo. 16:14.) Sicaríʼ guníʼ Miqueas ni riguixhená que zaca dxi ca: «Ca dani ca ziácani [...], ne ca lugar ra napampa ni nuu ra jma xagueteʼ zacá bi cani, casi riá cera ora chuʼ lu guí, casi nisa ni rixii ti lugar ra nandagaa» (Miq. 1:4). Xi zazaaca ca binni ni cadi cayuni adorar Jiobá yaʼ. Nabé naná ni cabeza laacabe. Biblia na: «Cani guuti Jiobá dxi ca zátacaʼ dede ti lugar ra jma zitu stiʼ guidxilayú hasta stiʼ lugar ra jma zitu stiʼ guidxilayú» (Jer. 25:33).

Pur cani maʼ bidúʼndanu ca naquiiñeʼ guiníʼ ique cani napa xiiñiʼ o ni cusiniisi xiiñiʼ stubi si, pa zalá ca xiiñicaʼ, cani maʼ rudii cuenta, ora gueeda dxi stiʼ Jiobá ca. Biblia na zalácabe, peru pa nuucabe gaxha de Dios, ne zuuyabe pabiáʼ randa rúnicaʼ biaʼ iza nápacaʼ (Mat. 24:21).

Xiñee naquiiñeʼ cueeluʼ tiempu para guni adorarluʼ Dios ne binnilídxiluʼ

Laatu, cani napa xiiñiʼ, naquiiñeʼ gúnitu stipa pur gulídxetu ne gusiniisitu xiiñitu «modo na Señor» (Efe. 6:4). Nabé risaca nga gúʼndaneluʼ ca xiiñiluʼ Biblia. Racaláʼdxidu gaca ca hombrehuiiniʼ ne ca dxaapahuiiniʼ ca casi ca xpinni Cristu de Filipos, cani gudxi Pablu laacaʼ jneza cayúnicaʼ purtiʼ bizuubacaʼ stiidxaʼ Jiobá de guidubi ladxidoʼcaʼ. Sicaríʼ gúdxibe laacaʼ: «Hermanu stinne ni nadxiee caʼ, cásica bizuuba tu stiidxa dxi nuaa ra nuu tu la? jma rusi yanna nuaa zitu de laatu. Laucaalaʼdxi guni tu ni jneza, dede dxi ilá chaahui tu. Lagaca nadóʼ ne laidxibi» (Fili. 2:12).

Ñee ruzuubaʼ ca xiiñiluʼ stiidxaʼ Jiobá ora qué guínniluʼ la? Ximodo laacabe ora nuucabe ra scuela. Ximodo zanda gusiéneluʼ laacabe jma jneza nga chinándacabe ca ley stiʼ Jiobá ora tiica si neca cadi cayuuyaluʼ laacabe yaʼ.

Pa guni adorarluʼ Dios ne binnilídxiluʼ la? zacaneni ca xiiñiluʼ iguidxi fe sticaʼ. Guidúʼyanu chonna cosa ni zacané lii para cueenduluʼ ni galán ora guni adorarluʼ Dios ne binnilídxiluʼ.

Biʼniʼ stipa pur cadi gusaana de gúʼndaneluʼ binnilídxiluʼ

Biblia rusiidiʼ laanu rucaasaa Dios ca ángel stiʼ ti hora ni maca naguixhe gúnini (Job 1:6). Lii laaca zanda gúniluʼ zacaca. Gudixhe ti dxi ne ti hora para guni adorarluʼ Dios ne binnilídxiluʼ ne biʼniʼ ni dxi gudíxheluʼ gúniluʼ ni. Ne biyubi sti dxi ndaaniʼ semana para gúnitu ni ora chuʼ xiixa ni gucueeza laatu de gúnitu ni.

Peru naquiiñeʼ chuʼluʼ cuidadu, purtiʼ despué zándaca guiaandaʼ lii pabiáʼ risaca nga guni adorarluʼ Dios ne binnilídxiluʼ dxi maʼ gudíxheluʼ gúniluʼ ni, ne chaahuidugá maʼ gusaana de gúniluʼ ni. Cadi guiaandaʼ lii, ca xiiñiluʼ nga cani jma naquiiñeʼ gúʼndaneluʼ Biblia ne laacabe nga cani jma nanda Binidxabaʼ gusaba (1 Ped. 5:8). Pa lugar de guni adorarluʼ Dios ne binnilídxiluʼ, gúʼyaluʼ televisión o gúniluʼ sti cosa ni huaxiéʼ risaca la? gunna maʼ cayuni ganar Binidxabaʼ lii (Efe. 5:15, 16; 6:12; Fili. 1:10).

Biindané laacabe xiixa ni gacané laacabe

Ora guni adorarluʼ Dios ne binnilídxiluʼ cadi naquiiñeʼ si guiniʼtu xi naquiiñeʼ gúnitu, sínuque laaca naquiiñeʼ gusihuínnitu ximodo zanda gacané ni caziiditu ca laatu lu xquendanabánitu. Ximodo zanda gúnitu nga yaʼ. Zanda guiniʼtu de xiixa ni chiguidxaagalú ca xiiñitu despué. Laaca zanda gusiidiluʼ laacabe ximodo gucheechecabe diidxaʼ. Cadi guiaandaʼ lii, ca hombrehuiiniʼ ne ca dxaapahuiiniʼ ca riuuláʼdxicaʼ gúnicaʼ ca cosa ni riree laacaʼ jneza. Nga runi, pa guni ensayárcabe modo gucheechecabe diidxaʼ ne modo guicábicabe ora gucaalú binni laacabe la? jma qué zadxíbicabe gucheechecabe diidxaʼ (2 Tim. 2:15).

Laaca zanda guni ensayar ca xiiñitu ximodo zanda gúnicaʼ ora chuʼ tu gucaa laacaʼ gúnicaʼ ni cadi jneza. Lu capítulo 15 stiʼ libru Lo que los jóvenes preguntan. Respuestas prácticas (volumen 2) zeeda ni zanda gacané laacabe. Ndaa ra na «Estrategia contra la presión de grupo» (yaza 132 ne 133) neni caadxi conseju ni zacané laacabe. Laaca rucaa ni ca hombrehuiiniʼ ne ca dxaapahuiiniʼ guiníʼ íquecaʼ xi zanda gúnicaʼ ora guidxaagalucaʼ xiixa guendanagana. Ra maʼ ziluxe yaza 133 ca zeeda ca diidxaʼ riʼ: «Biʼniʼ ensayarné ti binnilídxiluʼ o tuuxa ni maʼ huaniisi ne nabé xhamíguluʼ laa». Nga runi, galán guni ensayartu cani maʼ guninu ca ora guni adorarluʼ Dios ne binnilídxiluʼ.

Ora runi adorarné cani napa xiiñiʼ ca Dios dxi naguíxhecaʼ gúnicaʼ ni la? racaneni laacabe gusiidicabe ca xiiñicabe gúʼyacaʼ pabiáʼ risaca nga quixhe íquecaʼ ugaandacaʼ xiixa guenda ndaaniʼ xquidxi Dios. Lu capítulo 38 stiʼ volumen 2 stiʼ libru Los jóvenes preguntan, ra na «¿Qué haré con mi vida?», zeeda caadxi conseju ni zacané laacabe gánnacabe xi zanda gúnicabe. Ora gúʼndatu ni, gucané ca xiiñiluʼ guiénecaʼ ni jma jneza nga gúnicaʼ ni na Jiobá lu xquendanabánicaʼ. Gucané laacabe chuláʼdxicabe gácacabe precursor, chigúnicabe dxiiñaʼ Betel, chécabe Scuela ra Riziidicabe Gúnicabe Xhiiñaʼ Dios o gúnicabe sti dxiiñaʼ ndaaniʼ xquidxi Dios.

Peru, nuu binni pur racalaʼdxiʼ ni galán para xiiñiʼ jma ricá ique xi guiráʼ zanda ugaanda xiiñiʼ despué, lugar de ñuuyacaʼ cani maʼ cugaanda xiiñicaʼ. Galán nga gacanécabe xiiñicabe para chiguni dxiiñaʼ Betel, gaca misioneru ne ugaanda xcaadxi guenda casi laacani. Peru bietenalaʼdxiʼ, pa gucaaluʼ laacabe gúnicabe ni racaláʼdxiluʼ la? zanda guchiichiluʼ laacabe ne guireecabe gana (Col. 3:21). Gudxi laacabe jneza ni cayúnicabe ne bisihuinni nuuluʼ nayecheʼ ne laacabe; cadi nisi maʼ cayuuyadxiluʼ ni cadi cayúnicabe. Gunna naquiiñeʼ gúnicabe ni na Jiobá purtiʼ nadxiicabe laabe ne cadi para gusiéchecabe lii (Mat. 22:37). Gucané laacabe gusisácabe ni huayuni Jiobá ne bidii lugar gúnicabe ni na Jiobá purtiʼ nadxiicabe laa.

Biyubi modo gúʼndaneluʼ laacabe sin guireecabe gana

Guionna cosa ni naquiiñeʼ guni binni ora guni adorar Dios ne binnilidxi nga guyubi modo chuulaʼdxiʼ ca xiiñiʼ ni. Ximodo zanda gúniluʼ nga yaʼ. Zanda gucaadiaganeluʼ ca binnilídxiluʼ ti drama o gúʼyaneluʼ laacabe ti videu ni huabee xquidxi Dios. Laaca zanda gúʼndaneluʼ laacabe Biblia ne gábiluʼ cada tobi de laacabe gúʼndacabe ra cayeeteʼ de gadxé gadxé binni ni zeeda lu historia ca o gudiiluʼ cada tobi de laacabe pabiáʼ naquiiñeʼ gúʼndacabe.

Lu ca revista Torre stiʼ ni rapa ne ¡Despertad! nuu stale ni zanda gúʼndaneluʼ binnilídxiluʼ ni zanda gacané laacaʼ. Casi lu yaza 31 stiʼ ¡Despertad! zeeda ti tema ra na «¿Qué respondería usted?». Lu Torre stiʼ ni rapa ni riree para guiráʼ binni zeeda ti tema ra na «Para ca hombrehuiiniʼ ne ca dxaapahuiiniʼ», laani rinábani cani nahuiiniʼ ca guyúbicaʼ gúʼndacaʼ jma de ca historia zeeda lu Biblia, ne ra na «Ni gusiiditu ca xiiñitu», laani rireeni para gacaneni cani jma nahuiiniʼ.

Pa nápaluʼ xiiñiluʼ ni maʼ caniisi la? galán gúʼndaneluʼ laacabe ni zeeda lu ¡Despertad! ra na «Los jóvenes preguntan», ne zaqueca volumen 2 stiʼ libru Los jóvenes preguntan. Ora gúʼndatu libru ca cadi guiaandaʼ laatu gúʼyatu cuadru ra na «Y tú, ¿qué piensas?», ni zeeda ra maʼ ziluxe cada capítulo stiʼ libru ca, purtiʼ cadi cá si ni racá para guiníʼ si cani nahuiiniʼ ca xi biziidicaʼ, sínuque para gacaneni cani napa xiiñiʼ ca guiníʼnecaʼ laacabe.

Peru ora gúʼndaneluʼ binnilídxiluʼ cadi galán diʼ puru si guinabadiidxaluʼ laacabe. Cadi gucaaluʼ ca xiiñiluʼ gúʼndacaʼ ni bicaacaʼ ra na «Tus reflexiones» nin sti ndaa ra rucaacabe ni canabadiidxaʼ libru ca laacabe. Lu guionna yaza stini zeeda ti ndaa ra caníʼneni bixhoze ne jñaa cani nahuiiniʼ ca ra na: «Pa racaláʼdxitu gucaa ca xiiñitu xipeʼ nga riníʼ íquecaʼ lu libru riʼ la? naquiiñeʼ gudii stiidxatu cadi liica gúʼndatu ni gucaacabe. Pa gúnitu nga la? zándaca laapecabe gábicabe laatu xi bicaacabe».

Gunna dxichi zaguu ndaayaʼ Jiobá ca stipa stiluʼ pa cadi gusaanaluʼ de gúʼndaneluʼ laacabe ne guyúbiluʼ xiixa ni gacané laacabe ne gúniluʼ ni modo chuuláʼdxicabe ni. Dxi runi adorarluʼ Jiobá ne binnilídxiluʼ ca zacaneni laatu chuʼtu jma gaxha de laabe.

[Cuadru ni zeeda lu yaza 31]

Zanda gúniluʼ xcaadxi cosa

«Dxi bidúʼndanedu ca dxaapahuiiniʼ stidu, naa ne xheelaʼ bidúʼndadu cani chiguiuundaʼ lu ca guendaridagulisaa ni rápadu ne rinábadu laacabe gúnicabe ti dibuju ni gusiene ni bidúʼndadu que. Nuu biaje rúnipedu casi cá lu historia ni cadúʼndadu que o runi ensayardu ximodo gucheechedu diidxaʼ. Laadu bisíʼdidu laacabe biaʼ ganda guiene cada tobi de laacabe, ne bínidu stipa gúnidu ni modo guyuuláʼdxicabe ne cadi guireecabe gana.» (J. M., Estados Unidos.)

«Ti gunaa ni bidúʼndanedu Biblia nápabe ti xiiñibe ni gúpadu gana nusíʼdidu laa ximodo biquiiñecabe ca rollo que dxiqué. Ngue runi, bínidu ti rollo stiʼ libru stiʼ Isaías. Biquiiñedu computadora para guleedu ti copia stiʼ guidubi libru ca sin ca númeru stiʼ ca capítulo ne stiʼ ca versículo ca. Despué biquíʼdidu ca yaza que ne cada guriá stini biquíʼdidu ti tubu. Ne gunábadu hombrehuiiniʼ que guni cásica biʼniʼ Jesús ndaaniʼ sinagoga stiʼ Nazaret. Lucas 4:16-21 na bixheleʼ Jesús rollo stiʼ Isaías ne bidxélabe ca diidxaʼ ni cuyúbibe luni (Isa. 61:1, 2). Peru hombrehuiiniʼ que nabé guca nagana para laa guidxela textu que purtiʼ nabé ziuulaʼ rollo que. Óraque biénebe pabiáʼ nanna Jesús iquiiñeʼ ca rollo que. Nabé bidxagayaabe dede guniʼbe: “¡Guirútiruʼ nanna biaʼ nanna Jesús!”.» (Y. T., Japón.)

[Dibuju/foto ni zeeda lu yaza 30]

Jma zanna xiiñitu xi guni pa guni ensayarnetu laacaʼ xi gúnicaʼ ora chuʼ tu gucaa laacaʼ gúnicaʼ ni cadi jneza

[Dibuju/foto ni zeeda lu yaza 31]

Ora guni adorarluʼ Dios ne binnilídxiluʼ biʼniʼ ni modo chuláʼdxicabe