Ndaa ra rinabadiidxaʼ

◼ Ñee ne stiidxaʼ «mozo ni nuu xpiaaniʼ ne ni runi jneza» nga ridagulisaa caadxi grupu de Testigu para gúʼndacaʼ laasicaʼ ne guiniʼcaʼ de caadxi tema ni zeeda lu Biblia la? (Mat. 24:45, 47.)

Coʼ, cadi ne stiidxacabe. Neca zacá, nuu caadxi de ca Testigu de gadxé gadxé guidxi huayúnicaʼ grupu sticaʼ para gúʼndacaʼ laasicaʼ ca tema ni zeeda lu Biblia. Nuu de ca binni riʼ ricá íquecaʼ guiziidicaʼ diidxaʼ hebreu ne griegu ni guníʼ binni dxi gucuá Biblia ti gúʼyacaʼ pa jneza ni cá lu Traducción del Nuevo Mundo; xcaadxi ruundacaʼ de ciencia ti gúʼyacaʼ pabiáʼ si rusiene Stiidxaʼ Dios de laani. Maʼ nápacabe ti lugar lu Internet ne ra zanda guiniʼnécabe binni diidxaʼ o ra guiníʼcabe de caadxi tema ni zeeda lu Biblia. Laaca rúnicabe guendaridagulisaa para gábicabe binni xi maʼ bidxélacabe ne maʼ huabeecabe libru stícabe. Huayúnicabe nga purtiʼ nácabe zacá zanda gánnanu xcaadxi de cani rizíʼdinu ra ridagulisaanu ne de ca libru ne revista ni rudii xquidxi Dios laanu.

Lu guidubi naca Guidxilayú, xquidxi Jiobá napa stale de ni guiziidiʼ. Jiobá rusiidiʼ ne ruguu gana laanu ora ridagulisaanu guiráʼ semana. Zaqueca ora riuunu guendaridagulisaa de ti dxi, de chupa gubidxa ne de chonna gubidxa ne ora ridúʼndanu ca libru ne ca revista ni rudii xquídxibe laanu. Jiobá riquiiñeʼ espíritu santu stiʼ ne guiráʼ ni rusiidiʼ Biblia ti ganda chuʼ xquidxi «tobi si de irá ni iníʼ ique[caʼ] ne ni quixhe[caʼ]» gúnicaʼ ti ganda guzuhuaa dxiichicaʼ lu ni runi crecaʼ (1 Cor. 1:10; Col. 2:6, 7). Dxandipeʼ rudiʼnu xquíxepeʼ Jiobá pur guiráʼ ni cusiidiʼ laanu lu ca últimu dxi riʼ. Nga runi, cadi ne stiidxaʼ diʼ «mozo ni nuu xpiaaniʼ ne ni runi jneza» nga huabeecabe ca libru ne revista stícabe, huayúnicabe ca guendaridagulisaa stícabe ne nápacabe ti lugar lu Internet (Mat. 24:45-47).

Rudiʼdu xquíxepeʼ cani racalaʼdxiʼ iquiiñeʼ guiráʼ ni nanna para gacané lu xhiiñaʼ Reinu. Peru, nin ti cosa ni guni binni cadi naquiiñeʼ gusihuinni jma risaca ni rusiidiʼ que cani rusiidiʼ Jesucristu laanu pur xquidxi. Lu primé siglu, apóstol Pablu gudxi ca xpinni Cristu gusaanacaʼ de gúnicaʼ xiixa ni cuee tiempu sticaʼ ne ni gusidxaga laacaʼ, casi gacaláʼdxicaʼ «usirooba ca historia sti ca bixhoze gola[caʼ. Purtiʼ nabe] rutinde diidxa si ni laacabe, ne qué racané ni ganna binni ni gudixhe Dios gaca ra guni cre binni laa» (1 Tim. 1:3-7). Nga runi, guiráʼ ca xpinni Cristu caquiiñeʼ gúnicaʼ stipa para cadi gudiicaʼ «lugar icaa yu né ca[ʼ] diidxa huati, nin usirooba ca[ʼ] historia sti ca bixhoze gola ca[ʼ] nin tinde diidxa ca[ʼ] pur ley sti Moisés, purti enda huati si nga riuu né ca[ʼ] ne gasti zabee ndu ca[ʼ] ne laani» (Tito 3:9).

Cani gacalaʼdxiʼ guiziidiʼ ne ganna jma de lu Biblia, rinábadu laatu gúʼndatu Perspicacia para comprender las Escrituras ne “Toda Escritura es inspirada de Dios y provechosa”, zaqueca zanda gúʼndatu xcaadxi libru ne revista ni maʼ gulee xquidxi Dios. Zanda gúʼndatu ca libru ni zeeda gusiene ca diidxaʼ riguixhená stiʼ Dios ni zeeda lu libru stiʼ Daniel, Isaías ne Apocalipsis. Racá zadxélatu stale cosa ni zanda gacané laatu gánnatu jma de lu Biblia ne ni zanda guiníʼ íquetu, ti ganda gápatu guendabiaaniʼ ni ganda gacané «laatu ti ganna pe tu xi racalaʼdxi be guni tu, para ganda sa tu modo naquiiñe sa ca xpinni [Jiobá] ne guni tu ni jma chuʼlaʼdxiʼ. Zacá zaree ndu xpida tu, ne jma ziyunibiáʼ chaahui tu Dios» (Col. 1:9, 10).