Ñee cacaaluʼ guiráʼ ni cudii xquidxi Dios lii órapeʼ caquiiñeluʼ cani la?

NABÁNINU lu ca dxi jma nagana (2 Tim. 3:1-5). Guiráʼ dxi naquiiñeʼ gusihuínninu pa dxandíʼ nadxiinu Jiobá ne pa zinándanu ca ley stibe lu xquendanabáninu. Maca bizeeteʼ Jesús de ca dxi nagana riʼ ne gúdxibe ca discípulo stibe zaguube gana laacaʼ para guni huantarcaʼ dede dxi guiluxe guidxilayú stiʼ Binidxabaʼ (Mat. 24:3, 13; 28:20). Pur nga gulibe ti mozo ni nuu xpiaaniʼ para «gudii ni iquiiñe» ca xpínnibe órapeʼ caquiiñeʼ ni (Mat. 24:45, 46).

Dede lu iza 1919 gulí Jiobá mozo ni nuu xpiaaniʼ ne ni runi jneza, ne dede dxi ca cudiibe ni caquiiñeʼ ca xpinni Dios lu guiráʼ diidxaʼ ne zacá millón de binni maʼ nuucaʼ tobi si ndaaniʼ xquidxi Dios (Mat. 24:14; Apoc. 22:17). Peru ni dxandíʼ nga nuu stale cosa ni cusiidiʼ xquidxi Dios ne gastiʼ cani lu guiráʼ diidxaʼ; ne cadi guiráʼ diʼ binni zanda guʼndaʼ cani lu Internet. Stale binni qué randa ruuyaʼ ca videu ne xcaadxi tema ni huaree lu sitiu jw.org. Ñee riníʼ nga runíticabe stale cosa risaca ni zanda gacané laacabe iguidxi fe stícabe la? Para guiene chaahuinu de ni caninu riʼ, naquiiñeʼ guicábinu tapa guendarinabadiidxaʼ nabé risaca.

1 Xipeʼ nga ni jma riquiiñeʼ Jiobá para gudii laanu ni caquiiñenu.

Dxi biquiinde Binidxabaʼ Jesús para ñuni ca guié que pan, laa bicabi laabe: «Cadi pan si nga ibani né binni sínuque irá ca diidxa ni iree de ruaa Dios» (Mat. 4:3, 4). Yanna, paraa nga zadxélanu ca diidxaʼ ni riree ruaa Dios yaʼ. Zadxélanu cani ndaaniʼ Biblia (2 Ped. 1:20, 21). Nga runi, ni jma riquiiñeʼ Jiobá para gudii laanu ni caquiiñenu nga Biblia (2 Tim. 3:16, 17).

Xquidxi Dios maʼ bidii laanu Traducción del Nuevo Mundo de las Santas Escrituras, ne nuuni lu 120 diidxaʼ, ne guiráʼ iza cabiʼxhiʼ ni lu jma diidxaʼ. Ne nuu mil millón de Biblia lu xcaadxi diidxaʼ. Ndiʼ rusihuinni cayaca ni na Jiobá; purtiʼ laa «racalaʼdxi ulá irá binni, ne ganna ca ni dxandíʼ» (1 Tim. 2:3, 4). Ne cumu «gasti nuu ndaani guidxilayú ni qué zanda guʼya Dios» la? zanda chuʼnu seguru zuchiña Jiobá ca binni ni «nanna naquiiñeʼ chuʼ gaxha de [laabe]» ne zudiibe laacaʼ ni iquiiñecaʼ (Heb. 4:13; Mat. 5:3, TNM, 6; Juan 6:44; 10:14).

2 Ximodo racané ca libru ne ca revista ni nápanu laanu para gápanu ni iquiiñenu ti iguidxi fe stinu.

Pa racaláʼdxinu gaca fe stinu naguidxi la? cadi caquiiñeʼ si guidúʼndanu Biblia. Laacaʼ naquiiñeʼ guiénenu ni cadúʼndanu ne gúninu ni nani lu xquendanabáninu (Sant. 1:22-25). Ne nga nga ni biʼniʼ ti hombre de Etiopía ni bibani lu primé siglu. Laa cayuundaʼ Stiidxaʼ Dios ora gunabadiidxaʼ Felipe laa: «Rieʼnu [...] ni cayuunda lu ca» la? Óraque bicabi etíope que laabe: «Ximodo ndi guieneʼ pa iruti tu usiene naa» (Hech. 8:26-31). Óraque gucané Felipe laabe para biene chaahuibe Stiidxaʼ Dios. Nabé guyuulaʼdxiʼ hombre que ni biziidiʼ ne ngue bicaa laa chúʼnisa (Hech. 8:32-38). Ne zacaca nga rizaaca ni yanna. Ca libru ne ca revista ni nápanu huayacané cani laanu guiénenu cani rusiidiʼ Biblia. Rindácani dede ndaaniʼ ladxidoʼno ne rucaa cani laanu gúninu lu xquendanabáninu cani cazíʼdinu (Col. 1:9, 10).

Ca xpinni Jiobá nápacaʼ stale libru ne revista ni racané laacaʼ chuʼcaʼ gaxha de Dios (Is. 65:13). Casi revista Torre stiʼ ni rapa, rireeni lu jma de 210 diidxaʼ, rusiéneni ca profecía ni zeeda lu Biblia ne racané ni laanu guiénenu ca cosa risaca zeeda luni ne chinándanu ca principiu stini lu xquendanabáninu. Ne revista ¡Despertad!, ni riree lu 100 diidxaʼ, rusiidiʼ ni laanu de ca cosa sicarú ni bizáʼ Dios ne rizíʼdinu modo chinándanu ca conseju stiʼ Biblia lu xquendanabáninu (Prov. 3:21-23; Rom. 1:20). Mozo ni nuu xpiaaniʼ riʼ rudii laanu libru ne revista ni cusiene de Biblia ¡lu jma de 680 diidxaʼ! Ñee ribeeluʼ ti tiempuhuiiniʼ para gúʼndaluʼ Biblia guiráʼ dxi la? Ñee ruundaluʼ guiráʼ revista ne libru cubi ni caree lu stiidxaluʼ la?

Peru cadi libru ne revista si nga nápanu. Xquidxi Jiobá laaca riguixhe chaahuiʼ ca libana ni rucaʼdiáganu lu ca guendaridagulisaa ne lu ca guendaridagulisaa roʼ ni rápanu. Cadi dxandíʼ nabé riuuláʼdxiluʼ gucaadiágaluʼ ca libana, gúʼyaluʼ ca drama, ca demostración ne ca entrevista ni ridiʼdiʼ lu ca guendaridagulisaa riʼ la? ¡Guizáʼ galán nga cani rusigaʼdeʼ Jiobá laanu! (Is. 25:6.)

3 Pa lu stiidxaluʼ qué riree ca libru ne ca revista ca, ñee ziaadxaʼ lii xiixa para iguidxi fe stiluʼ la?

¡Coʼ njaʼ! Cadi naquiiñeʼ guidxagayaanu ora gánnanu nuu xpinni Cristu napa jma libru ne revista que xcaadxi. Guiníʼ íquenu ni bizaaca ca apóstol. Jma bisiidiʼ Jesús laacabe que xcaadxi discípulo ni bibani lu primé siglu (Mar. 4:10; 9:35-37). Peru cadi pur nga guininu biaadxaʼ laacabe xiixa para chúʼcabe galán nezalú Dios, sínuque gúpacabe guiráʼ ni caquiiñecabe para iguidxi fe stícabe (Efes. 4:20-24; 1 Ped. 1:8).

Ne laaca naquiiñeʼ gánnanu stale de ca cosa ni guníʼ Jesús ne ni biʼniʼ dxi bibani ndaaniʼ Guidxilayú riʼ qué rieeteʼ cani lu ca Evangeliu ca. Sicaríʼ guníʼ apóstol Juan: «Nuu ru stale ni biʼni Jesús, pa nicá cada tobi ni la? rabe nin qué nugaanda guidxilayú nidxá irá guiʼchi ra nicá ni» (Juan 21:25). Neca cani guzané Jesús dxiqué gúnnacaʼ jma de laabe que laanu la? qué riníʼ nga huaxiéʼ nánnanu de Jesús, purtiʼ Jiobá maʼ bisiidiʼ laanu ni caquiiñeʼ gánnanu de laabe, ti ganda chinándanu ejemplu stibe (1 Ped. 2:21).

Yanna guiníʼ íquenu ca carta ni biseendaʼ ca apóstol que ra nuu ca neza binni ridagulisaa guyuu dxiqué. Nánnanu nuu ti carta ni bicaa Pablu ni cadi zeeda lu Biblia, ne zándaca nuu xcaadxi (Col. 4:16). Ñee zanda guininu riaadxaʼ laanu xiixa para iguidxi fe stinu la? Coʼ njaʼ. Nanna Jiobá xi caquiiñenu para chuʼnu nazaaca nezalú ne maʼ bidiibe ni laanu (Mat. 6:8).

Ca dxi stinu riʼ, zándaca nuu xpinni Cristu nápacaʼ jma libru ne revista que xcaadxi. Ñee chupa chonna si libru ne revista nuu lu stiidxaluʼ la? Cadi guizaaláʼdxiluʼ; laaca zapa Jiobá lii. Biindaʼ guiráʼ guiʼchiʼ ni maʼ huabee xquidxi Dios lu stiidxaluʼ, ne pa ruuyaluʼ zanda la? guyé ca guendaridagulisaa ni raca lu ti diidxaʼ ni riéneluʼ. Gunna dxichi zacané Jiobá lii para iguidxi fe stiluʼ (Sal. 1:2; Heb. 10:24, 25).

4 Pa qué randa ruuyaluʼ xi guiráʼ nuu lu sitiu jw.org, ñee zará fe stiluʼ la?

Lu sitiu ni nápanu lu Internet, zanda guʼndaʼ binni revista, libru ne xcaadxi cosa ni maʼ gulee xquidxi Dios ni cusiene de Biblia. Laaca zeeda conseju para cani maʼ bichaganáʼ, para ca hombrehuiiniʼ ne dxaapahuiiniʼ, ne laaca nuu para cani napa xiiñiʼ ne para cani nahuiiniʼ, ne zanda gacané cani binni para guʼndané binnilidxi Biblia. Ne laaca ruzeeteni de xcaadxi guendaridagulisaa risaca casi ca graduación stiʼ Galaad o guendaridagulisaa ni raca guiráʼ iza. Ne laaca rieeteʼ de ca desgracia ni huayuniná binni ne laaca riniʼni de ca ley ni riquiiñeʼ gobiernu para guniná ca Testigu ne de ca cosa galán ni huabeendú ca xpinni Cristu (1 Ped. 5:8, 9). Sitiu ni nápanu lu Internet guizáʼ racané ni laanu para guireeche diidxaʼ dede ca lugar ra raca nagana ca xpinni Cristu gúnicaʼ ni o ra qué riná ca gobiernu ca guireeche diidxaʼ.

Peru pa nápaluʼ Internet o pa qué gápaluʼ zanda gaca fe stiluʼ naguidxi. Mozo ni nuu xpiaaniʼ maʼ huayuni stale dxiiñaʼ para gudii cada tobi de ca xpinni Cristu libru ne revista ni racané laa chuʼ gaxha de Dios. Nga runi, cadi guiníʼ íqueluʼ naquiiñepeʼ siluʼ xiixa computadora para chuʼluʼ lu sitiu jw.org. Zándaca chuʼ tuuxa gacalaʼdxiʼ guni imprimir chupa chonna guiʼchiʼ ni nuu lu sitiu ca para ca xpinni Cristu ni qué gapa Internet, peru ca neza binni ridagulisaa cadi naquiiñeʼ gucaacaʼ tuuxa gúnini.

Jesús cayuni ni maʼ bidii stiidxaʼ: gudii ni caquiiñenu para iguidxi fe stinu. ¡Ne nabé rudiʼnu xquíxepeʼ laabe! Nanna dxíchinu qué zusaana Jiobá de «gudii ni iquiiñe[nu]» órapeʼ caquiiñenu ni dede dxi guinitilú guidxilayú stiʼ Binidxabaʼ.