Zanda iquiiñeʼ guiráʼ binni sitiu ni nápanu lu Internet
Jesús bisaanané laanu ti dxiiñaʼ: gucheechenu ca diidxaʼ nacubi ne galán stiʼ Reinu lu «idubi naca guidxilayú para ganna irá xixé guidxi modo runi mandar» (Mat. 24:14). Ne para ganda gucheechenu diidxaʼ biaʼ gándatiʼ la? maʼ guca ti sitiu nacubi ni láʼ jw.org/es ra zeeda guirá ni guyuu lu watchtower.org, jw-media.org ne jw.org (2 Tim. 4:5).
Lu «idubi naca guidxilayú». Biaʼ 30% de binni ni nabeza lu Guidxilayú riʼ riquiiñeʼ Internet. Ne stale binni jma riquiiñecaʼ ni para guyúbicaʼ intiica tema ni racaláʼdxicaʼ guiénecaʼ ne jmaruʼ si cani nahuiiniʼ. Lu sitiu riʼ rusiénenu guiráʼ ni rinabadiidxaʼ binni de Biblia ne zanda guni crecaʼ ni rusíʼdinu luni. Ne luni zanda gunibiáʼ binni xquidxi Jiobá ne cadi nagana zaca para laacaʼ guinábacaʼ gusiidicabe laacaʼ de Biblia. Laaca zacaneni para ganda guiziidiʼ binni de ca diidxaʼ nacubi ne galán dede ca lugar ra qué riuudiaga binni de stiidxaʼ Dios lu Guidxilayú.
«Irá xixé guidxi.» Para ganda ganna ca binni ni nabeza ndaaniʼ «irá xixé guidxi» de stiidxaʼ Dios la? laanu ca testigu stiʼ Jiobá naquiiñeʼ gusíʼdinu laacaʼ de laani lu stale diidxaʼ. Nga runi lu sitiu ni nápadu riʼ nuu stale libru ne revista ni zanda guʼndaʼ binni lu biaʼ tapa gayuaa diidxaʼ, ne gástiruʼ sti sitiu lu Internet ni napa stale diidxaʼ casi laani.
Biquiiñeʼ guiráʼ ni zeeda luni. Sitiu jw.org ni nacubi riʼ, cadi guca diʼ ni para si gacaneni binni guiziidiʼ de stiidxaʼ Dios, sínuque laaca guca ni para ca testigu stiʼ Jiobá. Pa napuʼ Internet la? rinábadu lii guyubi chaahuiluʼ guiráʼ ni zeeda lu sitiu jw.org. Yanna, chiguluidu lii caadxi cosa ni zanda gacané lii gánnaluʼ iquiiñeluʼ guiráʼ ni zeeda lu sitiu riʼ.
[Foto ni zeeda lu yaza 3]
(Para gúʼyaluʼ ca letra ni zeeda ra rihuinni ximodopeʼ bireeni la? biiyaʼ ni lu libru o revista ra bireeni)
Biiyaʼ pa zanda guʼnuʼ ni
1 Bicaa www.jw.org/zai ra rucaacabe xiixa diidxaʼ ni chiyúbicabe lu Internet.
2 Binibiáʼ chaahuiʼ sitiu riʼ ra gudiiluʼ clic lu guiráʼ ndaa stini, casi lu menú ne lu ca vínculo ni nápani. (Nuu de ca ndaa stiʼ sitiu riʼ caʼruʼ diʼ chuʼ cani lu diidxazá. Para gúʼyaluʼ cani guyé lu sitiu jw.org/es.)
3 Zanda chuʼluʼ lu sitiu jw.org dede lu computadora laptop o celular stiluʼ. Yaza ni nuuluʼ lu ca zuchaa ni de medida ne zácani biaʼ pantalla ni napa computadora laptop o celular stiluʼ, peru ngueca ni cusiidiʼ ni.