Iquiiñenu sitiu jw.org ora maʼ cucheechenu diidxaʼ: «Cani nabé rinabadiidxaʼ binni»

Lu ndaa ra na «Tu laadu», ni nuu lu jw.org/zai zeeda ti ndaa ni láʼ «Cani nabé rinabadiidxaʼ binni». Pa gánnanu xi tema nuu lu ndaa riʼ zacaneni laanu ora gucheechenu diidxaʼ. Xiñee yaʼ. Purtiʼ pa guinabadiidxaʼ binni laanu xiixa tema ne zeedani lu ndaa riʼ la? zanda guluinu laabe sitiu ni nápanu lu Internet ne luni guicábinu ni gunabadiidxabe ca. Laaca zanda iquiiñenu ca guendarinabadiidxaʼ zeeda luni para guzulú guinínenu binni. Zanda cuinu ti tema ni ziuulaʼdxiʼ binni nabeza neza ra rucheechenu diidxaʼ, zanda guinabadiidxanu laacabe xi riníʼ íquecabe de laani ne despué gusiénenu laacabe xi rusiidiʼ Biblia ra iquiiñenu sitiu jw.org. De racá gábinu binni ca bidxélanu ni gunabadiidxabe laanu ca lu jw.org ne guluinu laabe sitiu ca lu Internet. Sti modo zanda gúninu ni nga gudiʼnu lugar laabe gúʼndabe respuesta stiʼ ni gunabadiidxabe laanu ca lu sitiu stinu. Zanda guininu sicaríʼ: «Stale binni rinabadiidxaʼ xiñee rucheeche ca testigu stiʼ Jiobá diidxaʼ de yoo pur yoo. Ñuuláʼdxiluʼ ñánnaluʼ xiñee la? Nin ti minutu qué zandaaʼ para gusieneʼ ni lii». De racá zanda guluinu laabe tema ca lu jw.org lu celular o tableta stinu. Maʼ para guilúxenu zanda gusaananenu laabe tobi de ca publicación stinu.