Iquiiñenu jw.org ora maʼ cucheechenu diidxaʼ

Nabé cayacané sitiu nápanu lu Internet para careeche diidxaʼ nacubi ne galán ca lu «idubi naca guidxilayú» (Hech. 1:8). Peru stale binni qué runibiáʼ ni, ránnacabe de laani ora gabi ti ni rucheeche diidxaʼ laacabe nuuni o guluiʼni laacabe.

Ti superintendente viajante gundeteʼ videu ni láʼ Xiñee naquiiñeʼ gúʼndaluʼ Biblia lu celular stiʼ ne ruluiʼbe ni binni ora gúʼyabe zanda gúnibe ni. Casi, pa canagucheechebe diidxaʼ de yoo pur yoo rábibe binni: «Canagannaʼ binni ti ratuhuiiniʼ si para gacaniáʼ laacaʼ guicábicaʼ chonna guendarinabadiidxaʼ nabé risaca: Xiñee nuu stale cosa malu. Ximodo chiguni chaahuiʼ Dios guiráʼ ni. Xi zanda gúninu laga cabézanu dxi ca. Videuhuiiniʼ riʼ ricábini ca guendarinabadiidxaʼ riʼ». Nagueendaca riguube ni ne ribézabe xi guiníʼ binni ca de laani. Cumu biaʼsi modo rusiéneni ca guendarinabadiidxaʼ riʼ la? stale binni riuulaʼdxiʼ guʼyaʼ ni dede ra guiluxe ni. De racá xpinni Cristu ca riníʼ: «Casi binadiágaluʼ ca, zanda guinabuʼ guʼndanécabe lii Biblia lu sitiu ni nápadu lu Internet jw.org. Peru cumu maʼ nuaaʼ raríʼ la? zanda gusieneʼ lii ximodo nga rusíʼdidu binni de Biblia». Pa chuulaʼdxiʼ binni ca ni cayabi xpinni Cristu ca laa la? ruluiʼbe laa ximodo rusíʼdinu binni de Biblia né folletu Ca diidxaʼ sicarú ni zeeda de Dios. Pa qué gapa binni ca tiempu la? riaananebe laa sti biaje guibiguétabe ra nuu para gusiénebe ni laa. Ora riziiláʼdxibe ti ratu ndaaniʼ ti cafetería, ruíʼnebe binni zuba cueʼbe cásica maʼ bizéʼtenu ca. Yanna lanu yaʼ, caquiiñenu sitiu jw.org para gucheechenu diidxaʼ la?