«Lagüíʼ diidxa jneza, ni guiaba binni»
1. Xi riníʼ ca diidxaʼ «lagüíʼ diidxa jneza».
1 «Lagüíʼ diidxa jneza, ni guiaba binni. Lauyubi ganna tu modo icabi tu laacaʼ.» (Col. 4:6.) Ca diidxaʼ ca rusiidiʼ cani laanu naquiiñeʼ guyúbinu xi diidxaʼ gábinu binni ne cani guininu ca chuuláʼdxicabe ni. Naquiiñeʼ gúninu zacá ora maʼ canagucheechenu diidxaʼ.
2. Xi biʼniʼ Jesús para gunda bisiidiʼ ti gunaa de Stiidxaʼ Dios.
2 Ejemplu stiʼ Jesús. Dxi caziilaʼdxiʼ Jesús gaxha de ti bizé, bizulú guniʼné ti gunaa de Samaria diidxaʼ ni yecaa nisa raqué. Laga caníʼcabe diidxaʼ, stale biaje guníʼ gunaa que maʼ xadxí nanaláʼdxisaa ca judíu ne ca binni de Samaria. Laaca bizeetebe xiiñiʼ Jacob ca binni de Samaria, neca ca judíu que nacaʼ laacabe zeedacabe de sti guidxi. Xi biʼniʼ Jesús yaʼ. Qué ñábidibe gunaa que cadi jneza diʼ ni caníʼ, sínuque guníʼnebe laa diidxaʼ galán. Zaqué guníʼnebe gunaa que de Stiidxaʼ Dios ne ca binni de guidxi que (Juan 4:7-15, 39).
3. Ximodo zanda gusihuínninu cayúninu cásica biʼniʼ Jesús ora maʼ canagucheechenu diidxaʼ.
3 Ora maʼ canagucheechenu diidxaʼ naquiiñeʼ gánnanu caníʼnenu binni ca diidxaʼ nacubi ne galán stiʼ Dios (Rom. 10:15). Racaláʼdxinu gusaananu ndaaniʼ ladxidóʼcabe xiixa ni gacané laacabe, ne cadi naquiiñeʼ gusihuínninu cadi jneza ni runi crécabe. Pa binni guiníʼ xiixa ni cadi jneza, cadi caquiiñeʼ diʼ gábinu laacabe cadi jneza nuucabe. Pa guiniʼbe xiixa ni nuu jneza, ñee zanda guicaanu ni guniʼbe ca para gábinu laabe jneza modo riníʼ íquebe ca la? Zanda gúʼndanenu laabe ti textu zeeda lu Biblia pa gábinu laabe: «Ñee maʼ huaníʼ íqueluʼ casi modo na raríʼ la?».
4. Xi zanda gúninu pa racalaʼdxiʼ binni guchiichi laanu.
4 Xi zanda gúninu pa nuu binni guchiichi laanu ne racaláʼdxisibe tinde diidxabe yaʼ. Naquiiñeʼ gusihuínninu binni nadóʼ laanu ne nacháʼhuinu pur cani guininu ne pur cani gúninu (2 Tim. 2:24, 25). Peru pa binni ca qué racalaʼdxiʼ gunadiaga stiidxaʼ Reinu stiʼ Dios la? guyúbinu ximodo guireʼnu ra nuube sin guninanu laabe (Mat. 7:6; 10:11-14).
5. Xi guleendú ti gunaa Testigu pur bicabi ne diidxaʼ nadóʼ.
5 Ni zabeendunu. Guidúʼyanu xi bizaaca ti gunaa Testigu. Laabe gucaláʼdxibe niníʼnebe ti vecina stibe de Stiidxaʼ Dios, peru gunaa que bidxiichi ne bizulú guluu dí laabe. Ne diidxaʼ nadóʼ gudxi Testigu que laabe: «Neca ndaʼ sti dxi tideʼ, ora maʼ nuuluʼ galán. Sicarú guiaanaluʼ». Xhupa semana despué, guyé gunaa que yeuxhidxi náʼ ra puertaʼ lidxi Testigu que, gunábabe gutiidilaʼdxiʼ Testigu que donda stibe ne gúdxibe laa racaláʼdxibe gucaadiágabe ni zitidxi laabe que. Nga rusiidiʼ laanu, pa guicábinu ne diidxaʼ nadóʼ la? jma nagueenda zacanenu binni (Pro. 15:1; 25:15).
6. Xiñee naquiiñeʼ gúninu stipa pur guininu diidxaʼ ni guiaba binni ora maʼ canagucheechenu diidxaʼ.
6 Nga runi, gúninu stipa pur guininu diidxaʼ ni guiaba binni ora maʼ canagucheechenu diidxaʼ. Neca qué gucaadiaga binni laanu óraque, zándaca despué ora tiidiʼ sti testigu stiʼ Jiobá ra lídxibe gucaadiágabe laa.