Grupu de binnigola ni racané xquidxi Jiobá ora rapa guendanagana ne ley
1 Dede 1987 jma stale guendanagana gupa ca hombrehuiiniʼ ne ca dxaapahuiiniʼ ni naca testigu stiʼ Jiobá ra scuela. Betel nanna guyuu 4,000 baʼduscuela lu ti iza si ni bisihuínnicaʼ pa dxandíʼ fe sticaʼ purtiʼ qué ñuni saludarcaʼ bandera ne qué ñuundacaʼ himno nacional, peru gúpacaʼ respetu ora gúcani. Pur ni guca riʼ la? guleecabe caadxi de laacaʼ ra scuela o biʼniʼ castigárcabe laacaʼ sti modo (Éxo. 20:4, 5).
2 Lu 1990 guca caadxi grupu para gacané xquidxi Jiobá ora gapa guendanagana ne ley. Lade grupu riʼ nuu binnigola ne abogadu testigu stiʼ Jiobá. Ca grupu riʼ bizulú guyuucaʼ ndaaniʼ ca estadu ra jma biquiiñeʼ gacanécabe ca baʼduscuela. Dxiiñaʼ stiʼ grupu riʼ nga gucueezacaʼ ca guendanagana ni chuʼ ne gacanecaʼ binni ni caquiiñeʼ ni. Dxandipeʼ nga gucané ne guluu ca hombre riʼ gana laacabe ne binnilídxicabe (Col. 4:11b).
3 Bihuinni guluu ndaayaʼ Jiobá ca grupu riʼ purtiʼ huayuni ganarcaʼ nezalú juez ne pur cani gunabaʼ derechos humanos gaca para ca Testigu. Ne Secretaría de Educación Pública ni nuu ndaaniʼ gadxé gadxé estadu ne Dirección General de Asuntos Religiosos de la Secretaría de Gobernación bicaacaʼ gaca respetar derechu ni napa cani nahuiiniʼ para checaʼ scuela ne gaca respetar religión ni nápacaʼ.
4 Cumu guyuu 1,110 queja stiʼ ca Testigu ni napa xiiñiʼ la? nga runi, 14 stiʼ mayo 2003 que biseendaʼ Comisión Nacional de los Derechos Humanos ti Recomendación General número gaayuʼ ra nuu ca gobernador stiʼ guiráʼ estadu (biiyaʼ: http://www.cndh.org.mx/recomen/general/005.htm). Ni bicaacabe riʼ na cadi jneza diʼ nga guni castigárcabe ca baʼduscuela o ca maestru testigu stiʼ Jiobá pur qué runi saludarcaʼ bandera ne pur qué ruundacaʼ himno nacional. Ne laaca gucaneni para maʼ cadi gápapeʼ ca Testigu guendanagana ra scuela. Dede dxi bizulú cazaaca guiráʼ ndiʼ nabé huayanna binni de ni runi crenu.
5 Laaca racané grupu riʼ ora raca xcaadxi xhiiñaʼ Reinu. Ra zidiʼdiʼ dxi bihuinni laaca caquiiñeʼ gacané ca grupu riʼ lu xcaadxi dxiiñaʼ stiʼ Reinu. Ti biaje guyuu caadxi binni ni bichiá ti lugar ra ridagulisaa ca Testigu ne guládxicabe gaayuʼ familia de guidxi que. Grupu de binnigola ni racané xquidxi Jiobá ni nu raqué gucané laacabe para gaca chaahuiʼ guendanagana que nezalú juez ne para iguidxi fe stícabe, despué maʼ gunda bibiguétacabe xquídxicabe.
6 Ca grupu de binnigola riʼ laaca racanecaʼ para guidxela ra gaca guendaridagulisaa roʼ, para gaca chaahuiʼ guiʼchiʼ ra chití Yoo stiʼ Reinu ne riniʼnécabe cani rutiidiʼ noticia. Laaca rúnicabe dxiiñaʼ ne Grupu de Binnigola ni Riniʼné ca Doctor para guiniʼnécabe ca doctor ne ca juez ora chuʼ xiixa guendanagana (Pro. 15:22b). Betel qué rudii lá nin ti abogadu para guʼyaʼ xiixa guendanagana gapa tuuxa. Pa nuu xpinni Cristu ni naca abogadu ra ridagulisaatu ne racalaʼdxiʼ gacané xquidxi Jiobá ne chuʼ lade grupu riʼ la? naquiiñeʼ guiníʼnebe ca binnigola ni nuu ra ridagulisaabe ne ni riganna ca neza binni ridagulisaa, ne maʼ laacaʼ guseendacaʼ guiʼchiʼ stibe Betel (Sal. 110:3a).
7 Ti xpinni Cristu ni huayacané lu grupu riʼ dede 1992 guníʼ: «Maʼ bidiéʼ cuenta Jiobá nga racané xquidxi para guni ganar nezalú juez, neca ruluíʼ nabé nagana cani. Ne nabé riéchedu ora gúʼyadu modo ratadxí ladxidóʼ [ca xpinni Cristu] ora rinínedu juez para gaca chaahuiʼ ca guendanagana stícabe». Nabé riecheʼ Jiobá pur dxiiñaʼ runi ca hombre riʼ ne rihuinni zacá ni lu ti carta ni bicaa Grupu ni Zaniruʼ ra caníʼ de laacabe sicaríʼ: «Lagabi cani nuu lu ca grupu riʼ nabé rusisácadu tiempu ne stipa rúnicabe ora racanécabe Betel para guireeche stiidxaʼ Reinu ora chuʼ tu gucaalú ni» (Efe. 4:8; Fili. 1:7).
8 Yanna riʼ nuu 35 grupu de binnigola ni racané xquidxi Jiobá ora gapa guendanagana ne ley Méjicu. Ora chuʼ xiixa ni cucueeza xhiiñaʼ Reinu la? ca binnigola ca zaníʼnecaʼ tobi de ca grupu riʼ. Peru pa qué guidxélacabe nin ti grupu ni runi tender neza ra nuucabe la? zaniʼnécabe ca abogadu ni runi dxiiñaʼ lu Departamento de Asuntos Legales ni nuu Betel. Rinábadu Jiobá uguu ndaayaʼ dxiiñaʼ runi ca grupu riʼ, purtiʼ nabé rúnicaʼ stipa pur gacanecaʼ gaca xhiiñaʼ Reinu casi na Isaías 6:8: «Ne binadiagaʼ ridxi stiʼ Jiobá ora guníʼ: “Tu guseendaʼ, ne tu cheʼ pur laanu yaʼ”. Óraque gudxeʼ laabe: “¡Raríʼ nuaa! Biseendaʼ naa”».