Guendaridagulisaa de Chonna Gubidxa stiʼ ca Testigu stiʼ Jiobá 2009
1. 1) Xi guiráʼ ndaayaʼ nga zacaanu pa chuunu guionnaʼ gubidxa gaca guendaridagulisaa roʼ ca. 2) Xi naquiiñeʼ gúninu dede ca nagasi.
1 Guiranu nga racaláʼdxinu guedandá dxi gaca guendaridagulisaa de chonna gubidxa 2009, purtiʼ raríʼ zadúʼyanu xcaadxi xpinni Jiobá ni nánnacaʼ caquiiñeʼ chuʼcaʼ gaxha de Dios cásica laanu (Mat. 5:3). Cumu nabé nagueenda nga cadxiña dxi stiʼ Jiobá la? guiranu caquiiñeʼ chuunu guionnaʼ gubidxa gácani, zacá nga zanda guidúʼyanu pabiáʼ nadxiisaa ca xpinni Cristu ne zacaanu stipa para guzuhuaʼnu dxiichiʼ lu Stiidxaʼ Dios (Sof. 1:14). Racaláʼdxinu ganna ca maestru ne ca patrón stinu nabé risaca chuunu ca guendaridagulisaa ca para guni adorarnu Jiobá. Galán pa dede ca nagasi quixhe chaahuiluʼ tiempu stiluʼ ne gunabaʼ Jiobá uguu ndaayaʼ cani chigunuʼ, gunna dxichi zacanebe lii (Isa. 50:10).
2. Neca qué guni invitárcabe laanu chuunu ti guendaridagulisaa stiʼ caadxi guidxi roʼ, xiñee laaca zanda guni sentirnu casi ora ñuunu tobi ni ruluíʼ stiʼ caadxi guidxi roʼ.
2 Guendaridagulisaa stiʼ caadxi guidxi roʼ. Maca nuu si guidxi nga ra chigaca ca guendaridagulisaa riʼ, nga runi naquiiñeʼ cheʼ cani guca invitar si. Galán guzúʼbanu diidxaʼ para cadi guidxá ca lugar riʼ jma de biaʼ nexheʼ chinécani (1 Cor. 14:40; Heb. 13:17). Nuu xcaadxi guendaridagulisaa laaca zuluíʼ stiʼ stale guidxi roʼ ni, purtiʼ ziuu misioneru, betelita ni nuu sti guidxi ne xcaadxi siervu ni runi dxiiñaʼ gadxé gadxé guidxi ni ziecaʼ guendaridagulisaa chigaca xquídxicaʼ.
3. Ximodo zanda gusihuínninu nadxiinu ca xpinni Cristu ni ridagulisaanenu.
3 Gucané xcaadxi cheʼ. Ñee nuu tuuxa de cani ridagulisaaneluʼ ni caquiiñeʼ gacanécabe para ganda cheʼ guendaridagulisaa riʼ la? Ora gacanenu xcaadxi de ca xpinni Cristu culuinu «cadi sti si [n]u ma cá ique [n]u, sínuque» ne «ni caquiiñe stobi» (Fili. 2:4).
4, 5. Xi naquiiñeʼ gúniluʼ pa cheluʼ ti guendaridagulisaa ra qué zié cani ridagulisaaneluʼ.
4 Ximodo zanda gánnanu paraa chigácani. Ante guiniʼtu Betel para guinabadiidxatu padxí ne paraa chigaca ca guendaridagulisaa ca la? rinábadu laatu gúʼndatu ni rizaané Xhiiñaʼ Reinu ni Rúninu stiʼ marzo 2009 o guinabadiidxatu secretariu stitu de xiixa ni nuutu gánnatu.
5 Pa cheluʼ sti guendaridagulisaa roʼ ra qué zié cani ridagulisaaneluʼ ne racaláʼdxiluʼ guiaanaluʼ raqué la? bicaa ti carta ra nuu cani chiguuya gaca guendaridagulisaa ra cheluʼ ca para guinábaluʼ ti Lista de hoteles recomendados, deche guiʼchiʼ Solicitud de alojamiento para los que tienen necesidades especiales stiʼ iza riʼ cá paraa zanda guseendaluʼ carta ca. Qué zandaa zacaa ca secretariu caadxi de ca guiʼchiʼ ca. Para guicábicabe lii la? biseendaʼ sti sobre ndaaniʼ carta guseendaluʼ ca, ne bicaa timbre luni ne paneza nabézaluʼ.
6. Xi naquiiñeʼ gaca ora guinabaʼ ti ni rucheeche diidxaʼ gacanécabe laa guidxela ti lugar ra guiaana.
6 Cani naquiiñeʼ gacanenu.Pa guinabaʼ ti ni rucheeche diidxaʼ gacanécabe laa para guidxela ti lugar ra guiaana la? Grupu ni Ruuyaʼ Dxiiñaʼ stiʼ ca Binni Ridagulisaa zuuyaʼ pa zanda guicaa ni rucheeche diidxaʼ ca ti Solicitud de alojamiento para los que tienen necesidades especiales. Óraca zuundaʼ grupu ca guiʼchiʼ ca ne carta 14 stiʼ diciembre 2008 ni gucuaa ca binnigola, ante guseendaʼ secretariu guiʼchiʼ ca ra nuu Cani Ruyubi ra Guiaana binni.
7. 1) Ximodo zanda guinábaluʼ cuartu ndaaniʼ ti hotel. 2) Xi zacané laanu para guihuinni galán xpiaʼnu nezalú ca binni ni runi dxiiñaʼ ndaaniʼ ti hotel (biiyaʼ cuadru ra na «Xi naquiiñeʼ gúninu ora guyúbinu ra guiaananu»).
7 Ximodo guinábanu cuartu. Ora guiluxe Guendaridagulisaa stiʼ Dxiiñaʼ Stinu ni chigaca lu semana 4 stiʼ mayo la? zucaacabe lu tableru ti guiʼchiʼ ni láʼ Lista de hoteles recomendados, ne lu lista riʼ cá xi guiráʼ hotel nga zanda iquiiñeʼ. Ante guinabuʼ cuartu ndaaniʼ xiixa hotel biindaʼ ni cá lu cuadru ra na «Xi naquiiñeʼ gúninu ora guyúbinu ra guiaananu». Para guinábaluʼ cuartu ndaaniʼ ti hotel:
◼ Guníʼ pur teléfono hora dxiiñaʼ, ne biquiiñeʼ númeru ni cá lu lista ca.
◼ Gudxi laacabe cheluʼ guendaridagulisaa stiʼ ca testigu stiʼ Jiobá.
◼ Guníʼ xi dxi nga chiguiaanuʼ ndaaniʼ hotel ca ne xi dxi zareeluʼ.
◼ Pa maʼ gastiʼ cuartu la? guníʼ ndaaniʼ sti hotel zeeda lu lista ca.
◼ Gunabaʼ xcuártuluʼ ne gunabaʼ númeru ni rudiicabe para gannuʼ pa dxandíʼ guleecabe ni para lii.
◼ Gudixené tarjeta de créditu, cheque, o giro postal, rudiicabe chii gubidxa para laani. Pa quiʼxuʼ ne cheque o giro postal la? bicaa númeru ni gudii hotel ca lii luni. Qué chuʼ dxi guseenduʼ bueltu.
8. Ximodo zanda gacanenu guidxela guiráʼ xpinni Cristu cuartu ndaaniʼ ti hotel ra quíxecaʼ biaʼ nexheʼ guiaxa.
8 Nánnadu nuu tu riuulaʼdxiʼ guiaana ndaaniʼ xcaadxi hotel ni cadi zeeda lu lista ca. Pa guiaanatu ndaaniʼ cani o quíxetu jma de biaʼ nexheʼ guiaxa la? zaguutu lu guendanagana cani ruyubi paraa guiaana binni. Cadi guinabuʼ cuartu pa cadi cá íqueluʼ iquiiñeluʼ ni ne cadi guni cancelarluʼ ti cuartu maʼ dxi que para si guidxaaluʼ de hotel. Pa gúninu cani cayeeteʼ riʼ la? zacanenu guiráʼ tu guyubi hotel quixe biaʼ nexheʼ (1 Cor. 10:24).
9. Xii nga jma naquiiñeʼ quixhe íquenu ante ne ora maʼ ziuunu guendaridagulisaa de chonna gubidxa 2009.
9 Gusisácanu Dios pur ni gúninu. Gusihuínninu nápanu ca guenda stiʼ espíritu pur ni guininu ne pur ni gúninu. Jmaruʼ si ora guinínenu cani runi dxiiñaʼ ndaaniʼ hotel ne xcaadxi binni de guidxi ca. Pa gúninu sicaríʼ la? zaníʼ binni galán de xquidxi Jiobá ne qué zápacaʼ xi pur guiniʼcaʼ laanu (1 Cor. 10:31; 2 Cor. 6:3, 4). Cada tobi de laanu quixhe íquenu gusisácanu Dios pur ni gúninu lu guendaridagulisaa de chonna gubidxa 2009 riʼ (1 Ped. 2:12).
[Box on page 5]
Hora guzulú ni
Jueves
(Para ca guendaridagulisaa stiʼ caadxi guidxi roʼ)
1.20 a 4.55 huadxí
Viernes ne sábadu
9.20 siadóʼ a 4.55 huadxí
Domingu
9.20 siadóʼ a 4.00 huadxí
[Box on page 6]
Xi naquiiñeʼ gúninu ora guyúbinu ra guiaananu
◼ Cadi guinabuʼ ti cuartu ndaaniʼ xiixa hotel ante gaca Guendaridagulisaa stiʼ Dxiiñaʼ Stinu semana 4 stiʼ mayo.
◼ Gunabaʼ cuartu lu beeu septiembre.
◼ Biyubi guiaanaluʼ ndaaniʼ hotel si ni zeeda lu Lista de hoteles recomendados.
◼ Gudixe biaʼ cá si lu lista ca.
◼ Naquiiñeʼ guicá lá ca binni ni chiguiaana ndaaniʼ cuartu ca ora guinábacabe ni.
◼ Para guʼnuʼ ni maca nexheʼ gaca ndaaniʼ hotel ca ora guicá guí xiixa la? naquiiñeʼ uguuluʼ ndaaniʼ cuartu ca biaʼ binni si ni cá lu lista stiʼ hotel ca.
◼ Pa maʼ gunabuʼ ti cuartu la? cadi guchaaluʼ ni (Mat. 5:37).
◼ Cadi cuídxiluʼ ca hotel ni cadi zeeda lu lista ca para guinabadiidxuʼ pa nápacabe ti preciu para cani cheʼ guendaridagulisaa roʼ.
◼ Ora maʼ guniʼluʼ ndaaniʼ GUIRÁʼ ca hotel zeeda lu lista ca ne qué guidxeʼluʼ cuartu o gapuʼ xiixa guendanagana la? guniʼné secretariu ni nuu ra ridagulisaaluʼ. Laabe zaniʼbe ra nuu Cani Ruyubi ra Guiaana Binni.
◼ Pa pur xiixa maʼ qué zanda guiaanuʼ ndaaniʼ cuartu stiʼ hotel ca la? guniʼné laacabe nagueendaca, ne biiyaʼ guxhiácabe laluʼ ne gudiicabe lii númeru stini.