“Ven, sé mi seguidor”
1. Xi zazíʼdinu lu Guendaridagulisaa ra Riuundaʼ Biblia lu ca beeu ni zeeda ca.
1 Guidapaʼ Evangeliu ca ruzeetecaʼ stale cosa de modo bibani Xiiñiʼ Dios ndaaniʼ Guidxilayú riʼ. Cumu racaláʼdxinu gúninu «casi biʼni Cristu» la? nga runi galán guiduʼndaʼ chaahuinu dede ante ne gucaadiáganu ora guiuundaʼ libru “Ven, sé mi seguidor” lu Guendaridagulisaa ra Riuundaʼ Biblia, ni chiguzulú semana 1 stiʼ marzo (1 Ped. 2:21; Mar. 10:21). Ni jma zacá íquenu nga guidúʼyanu cani uguu gana laanu para gucheechenu diidxaʼ.
2. Ximodo zanda gacané ejemplu stiʼ Jesús laanu para guni huantarnu.
2 Ejemplu stiʼ Jesús. Xi runi sentirluʼ ora maʼ zigucheecheluʼ diidxaʼ de yoo pur yoo ne gúʼyaluʼ qué riuulaʼdxiʼ binni gucaadiaga lii. Zándaca rietenaláʼdxiluʼ ca diidxaʼ ni guníʼ Jesús riʼ: «Pa huazabi nanda cabe naa, laca zazabi nanda cabe laatu» (Juan 15:20). Cadi purtiʼ si qué naʼ binni gucaadiaga laanu guininu canazananda laanu. Neca gudiʼdiʼ Jesús lu stale guendanagana gunda biʼniʼ huantarbe cani, purtiʼ nánnabe ziuube nayecheʼ pur cani chigudii Dios laabe. Ngaca nga laanu, pa jma guicá íquenu chuulaʼdxiʼ Jiobá ni cayúninu ne ni cabézanu gudiibe laanu pur guzúʼbanu stiidxabe la? laaca zápanu stipa para cadi guidxáganu ne cadi guireʼnu gana (Heb. 12:2, 3; Pro. 27:11). Pa qué gusaana de gucheechenu diidxaʼ la? zacané Cristu Jesús laanu para gúninu dxiiñaʼ riʼ (Mat. 28:20).
3. Ximodo zanda gucheechenu diidxaʼ cásica biʼniʼ Jesús.
3 «Para nga bendáʼ.» Jesús jma guníʼ de Reinu stiʼ Dios dxi bicheeche diidxaʼ ndaaniʼ Guidxilayú riʼ (Luc. 4:43). Bíʼnibe biaʼ gúndatiʼ lu dxiiñaʼ que. Cumu biiyabe naquiiñeʼ gúnibe dxiiñaʼ riʼ nagueendaca la? ngue runi biyúbibe modo guiniʼbe de Reinu ca guiráʼ ora. Yanna, xi zucaa ejemplu stiʼ Jesús laanu gúninu yaʼ. Ñee nuu binni ni ridxaaganu guiráʼ dxi ni zanda gábinu laacaʼ ca diidxaʼ nacubi ne galán ca la? Cumu nadxii Cristu laanu la? rucaa nga laanu gucheechenu ca diidxaʼ nacubi ne galán ca biaʼ gándatiʼ (2 Cor. 5:14).
4. Xi zanda gúninu para gucheechenu diidxaʼ jma jneza.
4 «Qué huayuu dxi chuʼ tuuxa iníʼ casi riníʼ hombre que.» Nabe bidxagayaa binni modo bisiidiʼ Jesús (Juan 7:46; Mat. 7:28, 29). Xiñee gadxe modo bisiidibe de xcaadxi maestru yaʼ. Purtiʼ guyuuláʼdxibe gusiidibe binni cani nánnabe, gunnaxhiibe binni ne biquiiñebe stale modo para bisiidibe laacaʼ. Pa chinándanu ejemplu stiʼ Maestru ni Jma Nanna Gusiidiʼ ca la? laaca zanda gucheechenu diidxaʼ jma jneza (Luc. 6:40).
5. Xi naquiiñeʼ guicá íquenu ora guiuundaʼ libru “Ven, sé mi seguidor”.
5 Cani maʼ bidúʼyanu lu ca párrafo ni maʼ gudiʼdiʼ ca nga chupa chonna de ca cosa galán ni zanda guizíʼdinu de Jesús. Xiruʼ zanda gánnaluʼ de laabe yaʼ. Ora guiuundaʼ libru ca lu Guendaridagulisaa ra Riuundaʼ Biblia la? gudixhe ique «guiene [luʼ] pabiáʼ nadxii be» lii ra guiniʼluʼ casi guniʼbe ne ra guʼnuʼ casi bíʼnibe (Efe. 3:19).