«Laguni casi biʼni Cristu»
1. Ximodo zanda gusíʼdinu jma jneza ora gucheechenu diidxaʼ.
1 Nécaxa qué nizá Jesús scuela ra nuu caadxi maestru ni rusiidiʼ de religión la? gúcabe ti maestru ni jma nanna gusiidiʼ de Stiidxaʼ Dios, ne qué huayuuruʼ stobi casi laabe. Galán nga guyuu tu bicaa xi guiráʼ bíʼnibe ora bicheechebe diidxaʼ ti gacaneni laanu, purtiʼ pa racaláʼdxinu gusíʼdinu jma jneza ora gucheechenu diidxaʼ la? naquiiñeʼ gúninu «casi biʼni Cristu» (1 Ped. 2:21).
2. Xi zacané laanu gannaxhiinu binni cásica gunnaxhii Jesús laacabe.
2 Bisihuínnibe nadxiibe binni. Jesús nabé bizaalaʼdxiʼ binni nga runi bisiidibe laacaʼ (Mar. 6:30-34). Stale binni ni nuu neza ra rucheechenu diidxaʼ nabé cayacanacaʼ pur xiixa cosa ni cazaacacaʼ, nga runi, caquiiñeʼ gusíʼdinu laacabe Stiidxaʼ Dios yánnaca (Rom. 8:22). Pa guiníʼ íquenu pabiáʼ triste nuu ca binni ca ne pabiáʼ rizaalaʼdxiʼ Jiobá laacabe la? zucaani laanu gucheecherunu diidxaʼ ra nuucabe (2 Ped. 3:9). Ne jma zucaadiaga binni Stiidxaʼ Dios pa gúʼyacaʼ dxandíʼ rizaaláʼdxinu laacaʼ.
3. Paraa bicheeche Jesús diidxaʼ.
3 Guniʼbe de Stiidxaʼ Dios ratiica nuube. Jesús guniʼné binni de ca diidxaʼ nacubi ne galán ca ratiica guyé (Mat. 4:23; 9:9; Juan 4:7-10). Laanu laaca racaláʼdxinu chuʼnu listu para guinínenu binni de Stiidxaʼ Dios ora maʼ cayúninu ca dxiiñaʼ ni rúninu guiráʼ dxi. Caadxi de ca bíʼchinu ne bizáʼnanu rizanecaʼ ti Biblia o xiixa libru, ti chuʼcaʼ listu para gucheechecaʼ diidxaʼ ra dxiiñaʼ, ra scuela, ora maʼ zecaʼ luguiaa o ndaaniʼ carru, ne xcaadxi lugar.
4. Ximodo zanda guininu jma de Reinu stiʼ Dios ora maʼ zigucheechenu diidxaʼ.
4 Guniʼbe de Reinu stiʼ Dios. Dxi bicheeche Jesús diidxaʼ la? jma nga guniʼbe de ca diidxaʼ nacubi ne galán stiʼ Reinu stiʼ Dios (Luc. 4:43). Laanu la? zándaca cadi primé ca Reinu ca nga guzéʼtenu, peru naquiiñeʼ guluinu binni pabiáʼ caquiiñecaʼ Reinu stiʼ Dios. Neca guzéʼtenu ca cosa feu ni culuíʼ maʼ nabáninu lu ca últimu dxi la? jma nga zaninu ca «diidxa galán» stiʼ Reinu (Rom. 10:15).
5. Para gusíʼdinu jneza ora maʼ cucheechenu diidxaʼ, ximodo zanda iquiiñenu Biblia.
5 Guniʼbe ni cá lu Stiidxaʼ Dios. Biaʼ dxi bicheeche Jesús diidxaʼ la? guniʼbe ni cá lu Stiidxaʼ Dios. Ne qué liica nusiidibe ni riníʼ íquebe (Juan 7:16, 18). Biindabe Stiidxaʼ Dios, bíʼnibe ni nani ne biquiiñebe ni para gucaalube Binidxabaʼ (Mat. 4:1-4). Para ganda gusíʼdinu jneza la? naquiiñeʼ guidúʼndanu Biblia guiráʼ dxi ne gúninu ni nani (Rom. 2:21). Ora guicábinu ni guinabadiidxaʼ binni laanu ora maʼ cucheechenu diidxaʼ la? naquiiñeʼ guluinu laacabe paraa cá ni ndaaniʼ Biblia ne guidúʼndanu ni. Racaláʼdxinu guʼyaʼ binni cusíʼdinu ni na Dios ne cadi ni riníʼ íquenu.
6. Xi biʼniʼ Jesús para chindá cani bisiidibe ndaaniʼ ladxidóʼ binni.
6 Cani bisiidibe que yendácani ndaaniʼ ladxidóʼ binni. Ti biaje, ora gunabadiidxaʼ cani ruzaaquiʼ guʼxhuʼ ni jma risaca ne ca fariseu que caadxi soldadu xiñee qué ninaazecaʼ Jesús la? nacaʼ: «Qué huayuu dxi chuʼ tuuxa iníʼ casi riníʼ hombre que» (Juan 7:46). Jesús qué nusiidiʼ diʼ para ñanna si binni ni caníʼ, sínuque biyúbibe ximodo chindá cani bisiidibe que ndaaniʼ ladxidóʼ cani cucaadiaga laabe (Luc. 24:32). Biquiiñebe ejemplu ni runibiáʼ binni para ganda guiénecaʼ ni caniʼbe (Mat. 13:34). Qué nusiididibe laacaʼ stale cosa pa nánnabe qué zanda guiénecaʼ ni caniʼbe (Juan 16:12). Ne guiráʼ ni bisiidibe guniʼbe zeedani de Jiobá ne cadi de laadibe. Cásica Jesús que, laanu laaca zanda gácanu ti maestru ni rusiidiʼ jneza pa guʼyaʼ chaahuinu ximodo cusíʼdinu (1 Tim. 4:16).
7. Xiñee qué nusaana Jesús de nucheeche diidxaʼ.
7 Bicheecherube diidxaʼ neca nuu tu qué ñuulaʼdxiʼ nucaadiaga laabe ne bicaalú laabe. Neca biʼniʼ Jesús jma milagru la? stale binni qué nulabi diʼ laabe (Luc. 10:13). Dede lade ca binnilídxibe nuu tu guníʼ ique: «Cayaca ique be» (Mar. 3:21). Neca gudíʼdibe guiráʼ ngue la? biʼniʼ huantarbe. Qué nireedibe gana purtiʼ nánnabe nápabe ni dxandíʼ, o Stiidxaʼ Dios, ni zanda gulá binni (Juan 8:32). Laanu laaca maʼ gudixhe íquenu cadi guireʼnu gana purtiʼ nánnanu zacané Jiobá laanu (2 Cor. 4:1).
8, 9. Para chinándanu Jesús, xi naquiiñeʼ gúninu.
8 Bíʼnibe stale stipa para ganda gucheechebe diidxaʼ biá gándatiʼ. Jesús qué nicá ique diʼ ñapa cosa risaca sínuque, jma gudixhe ique gucheeche diidxaʼ (Mat. 8:20). Qué liica nidxágabe de nucheechebe diidxaʼ, ne nuu tiru dede guizáʼ maʼ huadxí bíʼnibe ni (Mar. 6:35, 36). Laabe maca nánnabe huaxiéʼ dxi nápabe para gúnibe dxiiñaʼ que. Yanna riʼ, cumu laaca «ma huaxiéʼ dxi riaadxa laanu» la? pa racaláʼdxinu gúninu casi biʼniʼ Cristu la? caquiiñeʼ gusaananu de gúninu ca cosa ni huaxiéʼ risaca para gápanu jma tiempu, stipa ne xcaadxi cosa ni zacané laanu gúninu ni (1 Cor. 7:29-31).
9 Ca xpinni Cristu ni bibani primé siglu que nabé jneza modo bicheechecaʼ diidxaʼ purtiʼ biziidicaʼ modo biʼniʼ Jesús (Hech. 4:13). Laanu la? laaca zanda gucheechenu diidxaʼ jneza pa chinándanu Maestru ni jma nanna gusiidiʼ Stiidxaʼ Dios (2 Tim. 4:5).